ប្រមុខរដ្ឋាភិបាល ជំរុញឱ្យមានការជួយគាំទ្រ និងជួយលើកកម្ពស់ផលិតផលក្នុងស្រុក ស្របពេលផលិតផលកសិកម្មមួយចំនួនរបស់កសិករ ត្រូវបានទុកចោលដោយសារអត់ទីផ្សារលក់។
ក្នុងសារលិខិតមួយចុះថ្ងៃទី៤ ខែមេសា ឆ្នាំ២០២២ លោកនាយករដ្ឋមន្ត្រី ហ៊ុន សែន បានជំរុញទៅក្រសួងពាណិជ្ជកម្ម និងក្រសួងពាក់ព័ន្ធ រួមទាំងរដ្ឋបាលថ្នាក់ក្រោមជាតិ ត្រូវបន្តផ្សព្វផ្សាយឱ្យបានទូលំទូលាយពីផលិតផលខ្មែរ និងផ្តល់ជំនាញនានាដល់ផលិតករលើដំណើរការខ្សែសង្វាក់ផលិតកម្ម ការពង្រឹងគុណភាព សុវត្ថិភាពផលិតផល ការកែច្នៃ និងការវេចខ្ចប់ជាដើម ដើម្បីឆ្លើយតបទៅនឹងទីផ្សារក្នុងប្រទេស និងក្រៅប្រទេស។
សារលិខិតដដែលនេះ ក៏ណែនាំទៅគណៈកម្មាធិការជាតិជំរុញចលនាភូមិមួយផលិតផលមួយរាជធានី-ខេត្ត ក្រសួងពាណិជ្ជកម្ម និងស្ថាប័នពាក់ព័ន្ធ ត្រូវសហការជាមួយវិស័យឯកជនរៀបចំទីផ្សារអនទ្បាញ ជួយផលិតផលខ្មែរក្នុងការទិញ លក់ និងដាក់បង្ហាញក្នុងព្រឹត្តិការណ៍ពិព័រណ៍ផលិតផលនានាទាំងក្នុងប្រទេស និងក្រៅប្រទេស តាមស្ថានតំណាងកម្ពុជាប្រចាំនៅបរទេសផងដែរ។
មួយទៀតនោះ ត្រូវរៀបចំចងក្រងផលិតផលក្នុងស្រុកដែលមានសក្តានុពលនៅក្នុងមូលដ្ឋានរបស់ខ្លួន ដោយបញ្ចូលជាផលិតផលភូមិមួយផលិតផលមួយ ដើម្បីតាមដាន និងវាយតម្លៃវឌ្ឍនភាព នៃការងារជួយដល់ផលិតផលក្នុងស្រុកពីបណ្តាក្រសួងស្ថាប័នពាក់ព័ន្ធទាំងនោះ និងកៀរគរការវិនិយោគនានាលើផលិតផលក្នុងស្រុក ស្របតាមគោលនយោបាយជាតិស្តីពី ការជំរុញចលនាភូមិមួយផលិត ផលមួយ សម្រាប់ឆ្នាំ២០១៦ដល់២០២៦។
តាមរយៈសាលិខិតនេះ លោកនាយករដ្ឋមន្ត្រី ហ៊ុន សែន ក៏ជំរុញដល់ប្រជាពលរដ្ឋគ្រប់រូបត្រូវចូលរួមគាំទ្រលើកកម្ពស់ផលិតផលខ្មែរតាមការជួយទិញផងដែរ។
កសិករនៅស្រុកកោះធំ ខេត្តកណ្តាល លោក ពោ សុខ សាទរចំពោះយន្តការរបស់ប្រមុខរដ្ឋាភិបាលនេះ ប៉ុន្តែលោកហាក់មិនមានជំនឿថា យន្តការនេះអាចជួយកសិករបាននោះទេ ខណៈបច្ចុប្បន្នកសិករកំពុងជួបទុក្ខលំបាក ដោយសារគ្មានទីផ្សារលក់ផលិតកសិកម្មរបស់ពួកគាត់។
កសិកររូបនេះ ឱ្យដឹងទៀតថា ស្វាយរបស់លោកប្រហែលជាង ១០តោន កំពុងទុកឱ្យទុំធ្លាក់ចោលពេញចំការ ដោយសារតែគ្មានទីផ្សារសម្រាប់លក់។ លោកថា តម្លៃស្វាយកែវល្មៀត ១គីឡូ ត្រឹមតែ១៥០រៀលប៉ុណ្ណោះ ខណៈថ្មាំ និងជីបានឡើងថ្លៃទ្វេដង។
លោក ពោ សុខ បន្តថា មិនមែនតែផ្លែស្វាយនោះដែលគ្មានទីផ្សារសម្រាប់លក់ សូម្បីតែស្រូវ និងផ្លែចេកក៏ចុះថោកគ្មានទីផ្សារសម្រាប់លក់ផងដែរ នាពេលបច្ចុប្បន្ននេះ។
លោកបន្ថែមថា៖ «ធ្វើស្រូវក៏វាអត់ចំណេញ វាអត់ទីផ្សារ។ កាប់ស្វាយ ដាំចេក ឥលូវអាចេកហ្នឹងវាក៏ធ្លាក់ថ្លៃដែរ។ បើនិយាយឱ្យចំទៅរឿងកសិកម្មនៅស្រុកខ្ញុំពូកែណាស់រឿងធ្វើហ្នឹង ប៉ុន្តែងាប់រឿងធ្វើបានហើយអត់ទីផ្សារហ្នឹងហ្មង។ ឥលូវកសិករជួបការលំបាកខ្លាំងណាស់ អ្នកដែលខ្វះខាតខ្លះសឹងរកអ្វីសងគេមិនបាន ខ្លះលក់ដីលក់ធ្លីសងគេមិនគ្រប់ ដោយសាររឿងដាំដំណាំហ្នឹង»។
កសិករដាំបន្លែនៅស្រុកស្អាង លោក តៃ សុង ឱ្យដឹងថា បច្ចុប្បន្នលោកកំពុងដាំបន្លែខាត់ណា និងស្លឹកខ្ទឹមសរុបប្រហែលជា៣០០តោន។ លោកថា ដំណាំ២មុខនេះ មិនសូវជាជួបបញ្ហាទីផ្សារនោះទេ ខណៈកសិករភាគច្រើនមិនសូវដាំដំណាំ២ប្រភេទនេះទេ ដោយសារពិបាកដាំ និងត្រូវចំណាយដើមទុនច្រើន។
យ៉ាងណា លោកថា សម្រាប់ដំណាំផ្សេងៗ ដូចជា សាឡាត និងបន្លែផ្សេងទៀត គឺជួបបញ្ហាទីផ្សារស្ទើរតែរាល់ឆ្នាំ។ កន្លងមក លោក តៃ សុង ក៏ធ្លាប់បានឈូសដំណាំសាឡាតចោលរាប់រយតោន ដោយសារបញ្ហាគ្មានទីផ្សារសម្រាប់លក់នេះដែរ។
លោកបន្ថែមថា៖ «ប្រសិនជាដំណាំណាដែលដាំទៅបានផលច្រើន ចាល់នៅតែថោកដដែល ដោយគ្មានខាងណាមកជួយនាំយកទៅលក់ផង គឺនៅតែឈូសឆាយចោលភ្ជួរចោលដដែល។ គ្មានខាងក្រសួងឬមន្ទីរកសិកម្មណាជួយរកទីផ្សារឱ្យផង។ តាមពិតឥលូវហ្នឹង សាឡាតនៅតែថោកអត់ទីផ្សារដូចរាល់ឆ្នាំដដែលហ្នឹង ប៉ុន្តែកសិករគាត់អត់ហ៊ានផុស អត់ហ៊ានដូចខ្ញុំដោយសារគាត់ខ្លាច»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ជារឿងត្រឹមត្រូវមួយដែលប្រមុខរដ្ឋាភិបាល អំពាវនាវឬជំរុញឱ្យមានការគាំទ្រ និងលើកកម្ពស់ផលិតផលក្នុងស្រុកនេះ ប៉ុន្តែលោកសង្កេតឃើញកន្លងមក ផលិតផលមួយចំនួនក្នុងស្រុកតែងតែជួបបញ្ហាទីផ្សារ ជាពិសេសនៅរដូវប្រមូលផលដំណាំផ្សេងៗរបស់ប្រជាកសិករ។
មន្ត្រីសង្គមស៊ីវិលរូបនេះ បន្តថា ដើម្បីជំរុញឱ្យតម្លៃផលិតផលក្នុងស្រុកមានទីផ្សារល្អប្រសើរ ឬមានការពេញនិយមការប្រើប្រាស់ក្នុងស្រុកនោះ រដ្ឋាភិបាលត្រូវមានយន្តការច្បាស់លាស់ដោយឱ្យក្រសួងពាក់ព័ន្ធរៀបចំយុទ្ធសាស្ត្រក្នុងការដោះស្រាយបញ្ហានេះ តាមរយៈការជជែក និងប្រមូលក្តីកង្វល់ពីសំណាក់អ្នកផលិត ឬកសិករ យកមកដោះស្រាយរួមគ្នា។
លោកបន្ថែមថា៖ «មួយទៀត ត្រូវរៀបចំធនធានមនុស្សសម្រាប់ការឆ្លើយតប និងដោះស្រាយបញ្ហាទាំងនេះ ឱ្យទាន់ពេលវេលាជូនពលរដ្ឋ ហើយត្រូវផ្តល់បរិយាកាស ឬប្រមូលឱ្យមានការចូលរួមពីគ្រប់វិស័យទាំងសង្គមស៊ីវិល វិស័យឯកជន និងអ្នកមានបញ្ហាផ្សេងៗ ក្នុងការពិភាក្សារកដំណោះស្រាយ។ ហើយមួយទៀតនោះធ្វើយ៉ាងជំរុញឱ្យមានការផ្សព្វផ្សាយឱ្យបានទូលំទូលាយអំពីផលិតផលក្នុងស្រុកទាំងអស់ហ្នឹង ជាពិសេសការផ្ញើរសារតាមរូបភាពផ្សេៗ»៕