មន្ត្រីជាន់ខ្ពស់ក្រសួងអប់រំ យុវជន និងកីឡា បានប្រកាសថ្កោលទោសជនដែលក្លែងបន្លំសញ្ញាបត្រមធ្សមសិក្សាទុតិយភូមិឬ បាក់ឌុប ដើម្បីយកទៅប្រឡងចូលរៀនសាលាពេទ្យ និងជំរុញទៅសមត្ថកិច្ចចាត់វិធានការច្បាប់ចំពោះអ្នកពាក់ព័ន្ធក្នុងរឿងនេះ។
ការលើកឡើងនេះ ក្រោយរដ្ឋលេខាធិការនៃទីស្ដីការគណៈរដ្ឋមន្ត្រី លោក ហ៊ីង ថូរ៉ាក់ស៊ី បានចេញលិខិតមួយកាលពីចុងខែមុន ដោយរកឃើញថា មានបេក្ខជនចំនួន ៤៣នាក់ បានប្រឡងពេទ្យជាប់តាំងពីឆ្នាំ២០១៩ ប៉ុន្តែក្រសួងសម្រេចលុបឈ្មោះរបស់ពួកគេវិញ ក្រោយរកឃើញថាពួកគេប្រើប្រាស់សញ្ញាបត្របាក់ឌុបក្លែងក្លាយដើម្បីចូលប្រឡងសាលាពេទ្យពេលនោះ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានប្រាប់វីអូឌីតាមសារអេសអឹមអេស(SMS) នៅថ្ងៃអង្គារនេះថា ក្រសួងកំពុងពិនិត្យមើលករណីនេះ ហើយក្រសួងថ្កោលទោសរាល់បទល្មើសក្លែងបន្លំឯកសារសាធារណៈ។
លោក រស់ សុវាចា បន្តថា៖ « ក្រសួងកំពុងតែពិនិត្យលើករណីនេះ ហើយអំពាវនាវដល់ភាគីមានសមត្ថកិច្ចពាក់ព័ន្ធឱ្យចាត់ការបុគ្គលពាក់ព័ន្ធទាំងនោះតាមផ្លូវច្បាប់»។
តាមលិខិតរបស់ប្រធានគណៈកម្មាធិការប្រឡងថ្នាក់ជាតិ និងជារដ្ឋលេខាធិការនៃទីស្ដីការគណៈរដ្ឋមន្ត្រី លោក ហ៊ីង ថូរ៉ាក់ស៊ី កាលពីថ្ងៃទី២៩ ខែមីនា បានឱ្យដឹងថា ក្នុងចំណោមបេក្ខជនទាំង៤៣នាក់ មានម្នាក់ប្រឡងជាប់ចូលរៀនថ្នាក់វេជ្ជបណ្ឌិត ហើយ២៨នាក់ ប្រឡងជាប់ចូលរៀនថ្នាក់បរិញ្ញាបត្ររងផ្នែកគិលានុបដ្ឋាក។
ដោយឡែក ៧នាក់ ប្រឡងជាប់ចូលរៀនថ្នាក់បរិញ្ញាបត្ររងផ្នែកបច្ចេកទេសមន្ទីរពិសោធន៍ ហើយ ៤នាក់ ប្រឡងជាប់ចូលរៀនថ្នាក់បរិញ្ញាបត្ររងផ្នែកទន្តគិលានុបដ្ឋាក និង៣នាក់ទៀត ប្រឡងជាប់ចូលរៀនថ្នាក់បរិញ្ញាបត្ររងផ្នែកឆ្មប។
ក្នុងលិខិតដដែលបញ្ជាក់ថា និស្សិតដែលត្រូវបានលុបឈ្មោះទាំងនោះ មានសិទ្ធិតវ៉ាក្នុងរយៈពេល ១៥ថ្ងៃ ដោយគិតចាប់ពីថ្ងៃដែលលោកចេញលិខិតស្តីពីការលុបឈ្មោះនេះ។
យ៉ាងណា ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានលើកថាប្រសិនបើករណីក្លែងបន្លំសញ្ញាបត្រដើម្បីចូលទៅប្រឡងពេទ្យនេះ មិនត្រូវបានចាត់វិធានការទេ នោះពួកគេនឹងបានរៀនទៅតាមវិជ្ជាជីវៈដោយជោគជ័យ ប៉ុន្តែប្រជាពលរដ្ឋអាចនឹងជួបហានិភ័យនៅពេលក្រោយ។
អ្នកស្រី អ៊ុក ឆាយ៉ាវី មានប្រសាសន៍ថា៖ «អ្នកខ្លះរៀនចប់គាត់ទៅព្យាបាលប្រជាពលរដ្ឋហើយជួបគ្រោះថ្នាក់ដោយសារការវះកាត់ ដូចយើងឃើញក្នុងបណ្តាញសង្គមចឹង ខ្លះវះកាត់ហើយមានកន្សែងពោះគោក្នុងពោះ។ នេះហើយដែលយកតែសញ្ញាបត្រទៅបម្រើការ»។
អ្នកស្រីបន្តថា នេះមិនមែនជាលើកទីមួយទេ ដែលមានករណីក្លែងបន្លំសញ្ញាបត្របែបនេះ ពោលគឺមានយូរណាស់មកហើយ គ្រាន់តែពីមុនគេបិទបាំងព័ត៌មាន ដូច្នេះ មហាជនមិនបានដឹងអំពីរឿងនេះ។
លោកស្រីបានបន្ថែមថា៖ «បើសិននៅតែមានបែបនេះតទៅទៀត មានន័យថាការអប់រំនៅប្រទេសកម្ពុជាយើងធ្លាក់ដល់ចំណុចសូន្យវិញហើយ»៕