ប្រជាពលរដ្ឋមួយចំនួននៅស្រុកកណ្តាលស្ទឹង ខេត្តកណ្តាល នៅតែយល់ឃើញថា ការសេពគ្រឿងស្រវឹងមិនត្រឹមតែបង្កើតភាពស្និតស្នាលឬក៍បង្កើតមិត្តភាពរវាងគ្នានិងគ្នានោះទេ តែវាអាចការពារជំងឺកូវីដ-១៩ បានទៀតផងដោយសារតែវាមានជាតិអាល់កុល ដែលអាចកម្ចាត់មេរោគក្នុងខ្លូនមនុស្សបាន។
កម្មកររោងចក្រម្នាក់រស់នៅភូមិកំពង់តាឡុង ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល លោក ឆេង សុខ អាយុ៣៩ឆ្នាំ បានផ្ដល់បទសម្ភាសន៍ដល់វីអូឌីថា កន្លងមកលោកធ្លាប់លឺថា វាអាចការពារបានខ្លះដែរ បើទោះបីវាមិនអាចការពារបានច្រើន។ តែក្រោយមក លោកបានសម្រេចចិត្តទៅចាក់វ៉ាក់សាំងវិញ។
លោកបន្ដថា៖ «ដំបូងខ្ញុំក៏គិតចឹងដែរ តែក្រោយមកក៏ខ្ញុំសម្រេចថា ទៅចាក់វ៉ាក់សាំងវិញ វាអាចការពារបានច្រើនជាងការផឹកស្រា និងអនុវត្តន៍៣កុំ៣ការពារ»។
ប្រជាពលរដ្ឋម្នាក់ទៀតលោក យ៉ែម យ៉ា អាយុ៤៧ឆ្នាំ រស់នៅភូមិព្រៃតាថុក ឃុំព្រែកស្លែង បានថ្លែងថា លោកអាចស្រម៉ៃថា បើយើងដាំទឹកក្ដៅរួចយកទៅចាក់ក្នុងរុនដែលមានសត្វ គឺសត្វអាចចេញបានមកក្រៅដោយសារតែវាក្ដៅ។
តែលោកយល់ថា រឿងផឹកស្រាដែលមានជាតិអាល់កុលដើម្បីការពារមេរោគកូវីដ-១៩ ដូចជា មិនអាចទៅរួចនោះទេ។
លោកបន្ដថា៖ «ខ្ញុំមិនហ៊ាននិយាយថា វាយ៉ាងមិចទេ ព្រោះអីយើងមិនមែនអ្នកជំនាញទេ មានតែការអនុត្តន៍តាមការណែនាំរបស់ក្រសួងទេ ទើបប្រាកដថា វាមិនអី»។
ចំណែកលោក នៅ ណូត អាយុ៣៧ ជាម្ចាស់ការ៉ាស់សាំងម្នាក់ ស្ថិតនៅតាមបណ្ដោយផ្លូវជាតិលេខ២ បានថ្លែងថា មានតែអនុវត្តវិធានសុខាភិបាល៣កុំ៣ការពារ និងការចាក់វ៉ាក់សាំងប៉ុណ្ណោះ ទើបអាចការពារបាន ជាពិសេសត្រូវលាងដៃឲ្យបានញឹកញាប់ ត្រូវពាក់ម៉ាស់ កុំនៅកន្លែងគ្មានខ្យល់ ត្រូវរក្សាគម្លាតជាដើម។
ឆ្លើយតបទៅនិងការលើកឡើងប្រជាពលរដ្ឋខាងលើនេះ លោក វេជ្ជបណ្ឌិត គាម ពិសិដ្ឋ មន្ត្រីមន្ទីរសុខាភិបាលខេត្តកណ្ដាលបានផ្ដល់បទសម្ភាសន៍ដល់វីអូឌីតាមទូរសព្ទថា ការលើកឡើងរបស់ប្រជាពលរដ្ឋថា ការសេពគ្រឿងស្រវឹងអាចការពារជំងឺកូវីដ-១៩បានខ្លះនោះ វាជារឿងមិនត្រឹមត្រូវទាល់តែសោះ។
លោកបានរៀបរាប់បន្ដថា៖ «សូម្បីតែការលាងដៃនិងអាល់កុលក៏ដោយ ក៏វាមិនអាចការពារបានច្រើនដែរ គ្រាន់តែថា វាគ្រាន់បើជាងអត់ ហើយអាល់កុលដែលអាចយកមកប្រើបាន គឺអាល់កុលដែលមានកម្រិត៧៥ដឺក្រេទៀត ទើបអាចសម្លាប់មេរោគបានខ្លះ»។
លោកវេជ្ជបណ្ឌិតបានណែនាំបន្ថែមថា៖ «ការលាងដៃនឹងសាប៊ូឲ្យបានញឹកញាប់ចាប់ពីចន្លោះ៣០វិនាទី ទៅ ៤៥វិនាទី គឺដុសគ្រប់ចន្លោះម្រាមដៃ ក្រចកដៃទើបមេរោគអាចងាប់បាន បើមិនទាន់លាងដៃឲ្យបានស្អាតទេ កុំយកដៃទៅប៉ះច្រមុះអី វាអាចឆ្លងលឿនបាន»។
ទោះជាបែបនេះក្តី លោកវេជ្ជបណ្ឌិត បានអំពាវនាវសុំឲ្យប្រជាពលរដ្ឋអនុវត្តន៍វិធានសុខាភិបាល ៣កុំ និង៣ការពារ តាមការណែនាំរបស់ក្រសួងសុខាភិបាល ជាពិសេសត្រូវរក្សាគម្លាតពីគ្នាឬក៏នៅកន្លែងគ្មានខ្យល់ចេញចូលគ្រប់គ្រាន់ឱ្យសោះ។
គិតត្រឹមព្រឹកថ្ងៃអង្គារ ទី៥ ខែមេសានេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ១៣៥ ៨១២នាក់ ក្នុងនោះអ្នកជំងឺព្យាបាលជាសះស្បើយចំនួន ១៣២ ៣២៨នាក់ និងអ្នកស្លាប់មានចំនួន ៣ ០៥៥នាក់។ ចំណែក ករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ពេលនេះបានកើនដល់ ១៤ ០១៨នាក់៕
អត្ថបទដោយលោក ឃាង សុខមាន ពលរដ្ឋសារព័ត៌មានប្រចាំខេត្តកណ្តាល