អគ្គនាយកពន្ធដារ​សម្រេច​ដក​អាជ្ញាបណ្ណ​ពី​ក្រុមហ៊ុន​មួយ​ដែល​ល្មើស​ច្បាប់​កេងបន្លំ​ប្រាក់ពន្ធរដ្ឋ

អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានសម្រេចដកហូតអាជ្ញាបណ្ណបញ្ឈប់សកម្មភាពអាជីវកម្មភ្នាក់ងារសេវាកម្មពន្ធដារជាស្ថាពររបស់ក្រុមហ៊ុន «ហ្វេតថាក់ ប៊ីហ្សនេស សឹលូសិន» ក្រោយរកឃើញថាក្រុមហ៊ុននេះល្មើសច្បាប់កេងបន្លំប្រាក់ពន្ធរដ្ឋ។

សេចក្ដីជូនដំណឹងរបស់អគ្គនាយកដ្ឋានពន្ធដារកាលពីម្សិលមិញ បាន​បញ្ជាក់​ថា ការសម្រេចនេះ ក្រោយមានការស៊ើបអង្កេត និងបានរកឃើញថាក្រុមហ៊ុន ហ្វេតថាក់ ប៊ីហ្សនេស សឹលូសិន ឯ.ក (FEDTAX BUSINESS SOLUTION CO., LTD.) ​មិនបានបំពេញកាតព្វកិច្ចជាភ្នាក់ងារសេវាកម្មពន្ធដារស្របតាមប្រការ១០ និងបានប្រព្រឹត្តអំពើខុសឆ្គងដូចមានចែងក្នុងប្រការ១៥ នៃប្រកាស​ចុះថ្ងៃទី១២ ខែមេសា ឆ្នាំ២០១៣ ស្ដីពីភ្នាក់ងារសេវាកម្មពន្ធដារ។

ភាពមិនត្រឹមត្រូវទាំងនោះ ដូចជា មិនប្រកាសនិងបង់ពន្ធក្រុមហ៊ុនខ្លួនឯងឱ្យបានត្រឹមត្រូវតាមច្បាប់និងបទប្បញ្ញត្តិ ផ្ដល់សេវាប្រកាសពន្ធឱ្យអតិថិជន គឺមានពុំមានវិជ្ជាជីវៈនិងសុចរិតភាពថែមទៀត ព្រមទាំងធ្វើសកម្មភាពលួចបន្លំប្រាក់ពន្ធ​ ជាដើម។  ​

ក្នុងលិខិតដដែលនេះបានសរសេរថា៖ «តាមរយៈការសម្រេចដកហូតអាជ្ញាបណ្ណបញ្ឈប់សកម្មភាពអាជីវកម្មជាស្ថាពរនេះ ក្រុមហ៊ុន ហ្វេតថាក់ ប៊ីហ្សនេស សឹលូសិន ឯ.ក ពុំមាននីតិសម្បទាជាភ្នាក់ងារសេវាកម្មពន្ធដារ និងមិនអាចបន្តប្រកបអាជីវកម្មជាភ្នាក់ងារសេវាកម្មពន្ធដារ ឬផ្ដល់សេវាកម្មពាក់ព័ន្ធនឹងពន្ធដារជូនអតិថិជនទៀតនោះទេ»។

អគ្គនាយកដ្ឋានពន្ធដារ ក៏បានអំពាវនាវដល់សាធារណជនទូទៅដែលធ្លាប់ឬមានបំណងប្រើប្រាស់សេវាកម្មពន្ធដាររបស់ក្រុមហ៊ុនខាងលើ បញ្ចប់ការប្រើប្រាស់សេវាកម្មពន្ធដាររបស់ក្រុមហ៊ុននេះចាប់ពីពេលជូនដំណឹងនេះតទៅ៕