ដំណាំស្រូវរបស់ប្រជាពលរដ្ឋរាប់រយហិកតា នៅឃុំសំពៅពូន និងឃុំព្រែកស្ដី ស្រុកកោះធំ ខេត្តកណ្ដាល បានរងការខូចខាតដោយសារជំនន់ទឹកភ្លៀង ដែលធ្វើឱ្យពលរដ្ឋកាន់តែរងប៉ះពាល់ធ្ងន់ធ្ងរដល់ជីវភាព ស្របពេលទីផ្សារទិញ-លក់ស្រូវនៅមានកម្រិតទាប។
ប្រជាពលរដ្ឋរស់នៅភូមិក្បាលកោះទាវ ឃុំសំពៅពូន ស្រុកកោះធំ ខេត្តកណ្ដាល លោក គី្រ ហ៊ត បានឱ្យដឹងនៅថ្ងៃព្រហស្បតិ៍នេះថា ជំនន់ទឹកភ្លៀងក្នុងរយៈពេល៣ទៅ៤ថ្ងៃកន្លងមកនេះ បានធ្វើឱ្យប៉ះពាល់ដល់ដំណាំស្រូវរបស់ប្រជាពលរដ្ឋអស់រាប់រយហិកតា។ លោកបន្តថា ករណីនេះបានធ្វើឱ្យពលរដ្ឋដែលប្រកបមុខរបរធ្វើកសិកម្ម រងផលប៉ះពាល់កាន់តែធ្ងន់ធ្ងរដល់ជីវភាព ខណៈទីផ្សារទិញ-លក់ស្រូវនៅមានកម្រិតទាប។
លោកនិយាយថា៖ «ដំណាំស្រូវប៉ះពាល់ដោយសារជំនន់ទឹកភ្លៀង វាលិច ស្រូវវាដួល មិនទាន់បានផល ដូចថាពីមុនធ្លាប់បានជាង១០០ស្បោង ឥលូវទទួលបាន៣០ទៅ៤០ស្បោង។ ប៉ះពាល់ដល់ប្រជាពលរដ្ឋធ្វើស្រូវទៅវាខាត បើជ្រុលទៅហើយមិនដឹងធ្វើម៉េច! បើដាក់ចិត្តត្រូវធ្វើហើយ ថាធ្វើទៅស្រូវ វាបានថ្លៃ! បើវាជួបឧបសគ្គជំនន់ទឹកភ្លៀងអ៊ីចឹង ស្រូវវាថោកហើយ»។
ចំណែកពលរដ្ឋរស់នៅឃុំព្រែកស្ដី ស្រុកកោះធំ ខេត្តកណ្ដាល លោក ជួន ប៊ុនឈឿន និយាយប្រហាក់ប្រហែលនឹងពលរដ្ឋនៅឃុំសំពៅពូនដែរ ដោយថា នៅឆ្នាំនេះ គាត់ដាំស្រូវប្រហែលជា៥ហិកតា ប៉ុន្តែស្រូវរងការខូចខាតស្ទើរទាំងស្រុងដោយសារតែជំនន់ទឹកភ្លៀង ខណៈថ្នាំ ជី និងសាំង ឡើងថ្លៃទ្វេដង។
ករណីនេះ លោកអំពាវនាវទៅរដ្ឋាភិបាលជួយរកទីផ្សារជូនប្រជាកសិករឱ្យបានតម្លៃសមរម្យ ដោយសារឈ្មួញយកឱកាសដែលស្រូវរងផលប៉ះពាល់ដោយជំនន់ទឹកភ្លៀង ទៅទម្លាក់តម្លៃមកត្រឹម ៧៥០រៀល ទៅ៨០០រៀល ក្នុងមួយគីឡូតែប៉ុណ្ណោះ។
លោកអំពាវនាវដូច្នេះថា៖ «សំណូមពរឱ្យក្រសួងពាក់ព័ន្ធជួយរកទីផ្សារឱ្យពលរដ្ឋយើងទាំងអស់គ្នាទូទាំងប្រទេស មិនមែនតែនៅស្រុកកោះធំទេ ព្រោះអីជីឡើងថ្លៃ [១គុណនឹង២] ជីក៏ឡើងថ្លៃ ហើយបើនិយាយពីផលកសិករវិញ ថោក! ខាតច្រើន! និយាយឱ្យចំ វាអត់ទីផ្សារ! ភ្លៀងអ៊ីចឹង ស្រូវខូច ស្រូវចេះតែចុះថោក»។
ពលរដ្ឋម្នាក់ទៀតនៅឃុំព្រែកស្ដី លោក ជា ស៊ាង និយាយថា ជំនន់ទឹកភ្លៀងធ្វើឱ្យប៉ះពាល់ដំណាំស្រូវរបស់គាត់និងប្រជាកសិករផ្សេងទៀត ដោយស្រូវពលរដ្ឋខ្លះបានរងការខូចខាតពី៥០ទៅ៧០ភាគរយ និងខ្លះទៀតបានខូចខាតទាំងស្រុង ខណៈស្រូវដែលលក់បានមានតម្លៃទាបថែមទៀតផង។ ករណីនេះ លោកថា បើរដ្ឋាភិបាលមិនរកទីផ្សារដែលអាចលក់ស្រូវឱ្យបានតម្លៃសមរម្យទេ នឹងធ្វើឱ្យគ្រួសារពួកគាត់ជាប់បំណុលកាន់តែច្រើន។
លោកនិយាយថា៖ «ខ្ញុំថាម៉េចៗមានតែលក់គោដោះស្រាយលុយបំណុលគេដែលខ្ញុំនៅជំពាក់ មានតែធ្វើអ៊ីចឹង! ខាតដោយសារអាគ្រោះធម្មជាតិដែលវាមកបំផ្លាញស្រូវខ្ញុំឱ្យវារលួយអស់រលីងហ្នឹង»។
វីអូឌី មិនអាចសុំការបញ្ជាក់ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានទេ នៅថ្ងៃព្រហស្បតិ៍នេះ។
ប្រធានសមាគមសម្ព័ន្ធសហគមន៍កសិករកម្ពុជា (CCFC) លោក ថេង សាវឿន អំពាវនាវទៅរដ្ឋាភិបាលជួយទំនុកបម្រុងដល់ប្រជាកសិករដែលរងផលប៉ះពាល់ដោយសារគ្រោះធម្មជាតិនេះ ដើម្បីជួយកាត់បន្ថយការលំបាករបស់ពួកគេបានមួយផ្នែក។
លោកថា៖ «រដ្ឋាភិបាលគួរតែបញ្ចេញនូវធនធានរបស់រដ្ឋ តាមរយៈការផ្ដល់ជំនួយជាគ្រាប់ពូជ ឬក៏សម្ភារផ្សេងៗ ឬក៏ថវិកា ដើម្បីជួយដល់ប្រជាពលរដ្ឋក្នុងគ្រាមានគ្រោះអាសន្នបែបនេះ ពីព្រោះនរណាក៏មិនចង់ជួបគ្រោះអាសន្នដែរ»។
លោកបន្ថែមថា៖ «ខ្ញុំគិតថារដ្ឋ និងមន្ទីរកសិកម្មខេត្តកណ្ដាល អាចពិចារណាសម្រាលបន្ទុកនេះជូនកសិករ ពីព្រោះយើងមានកម្មវិធីគាំពារសង្គម និងជំនួយសង្គមជួយ និងមានថវិកាទំនុកបម្រុងទុក ដើម្បីជួយដល់ប្រជាពលរដ្ឋនៅពេលដែលពួកគាត់ជួបគ្រោះអាសន្នបែបនេះ»។
ក្រសួងកសិកម្ម បានឱ្យដឹងតាមរយៈសេចក្ដីប្រកាសព័ត៌មានកាលពីថ្ងៃទី១១ ខែមករា ថាការនាំចេញស្រូវទៅប្រទេសជិតខាងនៅចន្លោះឆ្នាំ២០២១ ឈានចូលដើមឆ្នាំ២០២២ មានចំនួន៣,៥៣លានតោន មានការកើនឡើងចំនួន៦១,១៦ភាគរយ បើធៀបទៅឆ្នាំ២០២០។ ដោយឡែក ចំពោះតម្លៃស្រូវដែលធ្លាក់ចុះ មានគម្លាតគ្នាចំនួន៥ភាគរយ បើប្រៀបធៀបទៅឆ្នាំ២០១៨ និងឆ្នាំ២០១៩ ដែលការធ្លាក់ចុះនេះមកពីបញ្ហាវិបត្តិកូវីដ-១៩។
បើតាមរបាយការណ៍របស់ក្រសួងដដែល ការប្រមូលផលស្រូវនៅប្រទេសកម្ពុជានៅឆ្នាំ២០២១ ទទួលបានទិន្នផលសរុបប្រមាណជាង១២,២១លានតោន ដែលមានការកើនឡើងប្រមាណ១១,៦ភាគរយ បើធៀបទៅឆ្នាំ២០២០ ក្នុងនោះការនាំចេញស្រូវទៅប្រទេសជិតខាងបានចំនួន៣,៥៣លានតោន។ ដោយឡែក ចំពោះការនាំចេញអង្ករផ្លូវការសម្រេចបានចំនួន០,៦១៧លានតោន ថយចុះប្រមាណ១០,៦៨ភាគរយ បើធៀបទៅឆ្នាំ២០២០៕