រដ្ឋមន្ត្រីក្រសួងមហាផ្ទៃ លោក ស ខេង បញ្ជាទៅសមត្ថកិច្ចទាំងអស់ត្រូវអនុវត្តច្បាប់ឱ្យបានតឹងរ៉ឹង ដោយចាប់និងបណ្ដេញជនអន្តោប្រវេសន៍ខុសច្បាប់ចេញពីកម្ពុជាវិញ ហើយមិនត្រូវខ្វល់ថាជាជនបរទេសណានោះទេ។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅបន្ដរបស់អគ្គនាយកដ្ឋានអន្ដោប្រវេសន៍ នាថ្ងៃទី៦ ខែមេសា ឆ្នាំ២០២២នេះ លោក ស ខេង បានក្រើនរម្លឹកទៅកម្លាំងនគរបាលអន្ដោប្រវេសន៍ ពិសេសនៅតាមព្រំដែន ត្រូវពង្រឹងគ្រប់គ្រងការចេញចូលរបស់ជនបរទេស។ លោកថា ក្នុងករណីដែលពួកគេចូលមកកម្ពុជាដោយខុសច្បាប់ ត្រូវចាប់ខ្លួនបណ្ដេញចេញភ្លាមៗ។
ជាមួយគ្នានេះ លោកថា សមត្ថកិច្ចនៅតាមព្រំដែនទាំងអស់ត្រូវក្ដាប់ចំនួនជនអន្តោប្រវេសន៍ឱ្យច្បាស់លាស់ ដោយត្រូវដឹងនៅក្នុងមូលដ្ឋានរបស់ខ្លួន មានជនបរទេសប៉ុន្មាននាក់ដែលរស់នៅស្របច្បាប់និងមិនស្របច្បាប់។ ប្រសិនបើរកឃើញថា ពួកគេរស់នៅកម្ពុជាដោយខុសច្បាប់ សមត្ថកិច្ចត្រូវតែចាត់វិធានការបណ្ដេញចេញពីប្រទេសកម្ពុជាតាមនីតិវិធី។
លោកថា៖ «ត្រូវមានវិធានការម៉ឺងម៉ាត់ ជាប់ជាប្រចាំ ហើយមិនទុកឱ្យមានអ្នកដែលលួចមករស់នៅមិនស្របច្បាប់នៅកម្ពុជាយើងឡើយ។ នេះជាបញ្ហាមួយដ៏សំខាន់ណាស់ ពីព្រោះថា កន្លងទៅ យើងហាក់បានបើកយុទ្ធនាការក្នុងការដោះស្រាយបញ្ហានេះ ដូចបានបញ្ជាក់ខាងលើ។ អ៊ីចឹងយើងសន្មតថា អ្នកដែលចូលមកគ្មានក្រដាសស្នាម គឺខុសច្បាប់។ បើខុសច្បាប់ យើងត្រូវចាប់បណ្ដេញចេញតាមច្បាប់កម្ពុជា»។
អ្នកនាំពាក្យនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក កែវ វណ្ណថន មានប្រសាសន៍ថា ក្នុងឆ្នាំ២០២១ សមត្ថកិច្ចចាប់បណ្ដេញជនបរទេសចេញពីកម្ពុជាចំនួន៣ ៥៩៤នាក់ ដែលមាន៤៣សញ្ជាតិ ក្នុងនោះ ជនជាតិថៃមានជាង២ ០០០នាក់ និងចិនច្រើនជាងគេ។
លោក កែវ វណ្ណថន បន្តថា ចំពោះពលរដ្ឋវៀតណាមដែលរដ្ឋាភិបាលវៀតណាមមិនបើកផ្លូវទទួលយកទៅស្រុកកំណើតវិញនោះ មានតែពីរទៅបីគ្រួសារប៉ុណ្ណោះ។ សម្រាប់អ្នកដែលខុសច្បាប់ លោកអះអាងថា សមត្ថកិច្ចចាប់បញ្ជូនទៅភ្លាមៗ ប៉ុន្តែចំនួនប៉ុន្មាននោះ លោកសុំមិនធ្វើអត្ថាធិប្បាយទេ។
លោកថា៖ «គាត់អត់ចេញលិខិតបើកផ្លូវ ដើម្បីឱ្យពីរទៅបីគ្រួសារហ្នឹងត្រលប់ទៅវិញ គាត់ចង់ថាពួកហ្នឹងខ្មែរ តាមពិតពួកហ្នឹងជាជនបរទេសបែបអន្តោប្រវេសន៍ ដូចខ្ញុំនិយាយអ៊ីចឹង។ តិចតួចទេ! ហើយក្រៅពីហ្នឹង បញ្ជូនទៅអស់ហើយ។ អត់ទេ! ឆ្នាំ២០២១ យើងចាប់បានពេលណា គឺបញ្ជូនពេលហ្នឹង! ជនបរទេសដែលស្នាក់នៅខុសច្បាប់ ដែលប្រព្រឹត្តបទល្មើស ឬរត់ចេញពីប្រទេសសាម៉ីមក ហើយសំណាញ់ច្បាប់ មកលាក់ខ្លួននៅកម្ពុជាបានរយៈពេលមួយសប្ដាហ៍ យើងធ្វើប្រកាសបណ្ដេញចេញ ចាប់ពេលណាបណ្ដេញពេលហ្នឹង»។
បើតាមអ្នកនាំពាក្យនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក កែវ វណ្ណថន បញ្ជាក់ថា ជនបរទេសអន្តោប្រវេសន៍ដែលកាន់ឯកសារមិនប្រក្រតី និងត្រូវបានសមត្ថកិច្ចដកហូតកន្លងមក ភាគច្រើនជាជនជាតិវៀតណាម។
ប្រធានមជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្តិភាព លោក យង់ គិមអេង បង្ហាញការគាំទ្រចំពោះវិធានការនេះ ដើម្បីកុំឱ្យជនបរទេសទាំងនោះមកបង្កភាពវឹកវឹរក្នុងសង្គមកម្ពុជា និងប៉ះពាល់ដល់មុខមាត់របស់ប្រទេសជាតិ។
លោកបន្តថា រដ្ឋាភិបាលត្រូវហ៊ានចាត់វិធានការច្បាប់លើមន្ត្រីទាំងឡាយណាដែលគប់គិតជាមួយជនអន្តោប្រវេសន៍ខុសច្បាប់ និងត្រូវតាមដានចំពោះការអនុវត្តច្បាប់របស់អាជ្ញាធរ ទើបអាចទប់ស្កាត់បទល្មើសនេះមានប្រសិទ្ធភាព។
លោកថា៖ «រឿងទី២ បើសិនជាការចាប់បញ្ជូនទៅ គេមិនទទួល គេមិនអីអ៊ីចឹង គឺយើងមានវិធានការមួយ រឹតបន្តឹងច្រកព្រំដែនជាមួយប្រទេសហ្នឹង ឱ្យបានខ្លាំងបន្តិចទៅ កុំឱ្យគាត់យកលេសមិនទទួលអីអ៊ីចឹង នេះជារឿងមួយសំខាន់។ ម្យ៉ាងវិញទៀត ប្រទេសកម្ពុជាក៏មានចំណងការទូតស្និទ្ធជាមួយវៀតណាមគួរសមដែរ ហេតុអីបានជាយើងមិនធ្វើកិច្ចការទូតហ្នឹងឱ្យបានច្រើន ដើម្បីបញ្ជូនអ្នកខុសច្បាប់ហ្នឹងទៅវិញ»។
សារព័ត៌មានហ្វ្រេសញូ (Fresh News) បានស្រង់របាយការណ៍របស់អគ្គនាយកនៃអគ្គនាយកដ្ឋានអន្ដោប្រវេសន៍ លោក គៀត ច័ន្ទថារិទ្ធ ឱ្យដឹងថា ជនបរទេសអន្តោប្រវេសន៍ដែលបានពាក្យសុំប្រកាសទទួលស្គាល់ និងបណ្ណស្នាក់នៅអចិន្ត្រៃយ៍ គិតត្រឹមបិទឱសានវាទ ថ្ងៃទី៣០ ខែមិថុនា ឆ្នាំ២០១៩ នៃយុទ្ធនាការជំរឿនស្ថិតិនោះ សមត្ថកិច្ចបានដកហូតឯកសាររដ្ឋបាលមិនប្រក្រតីមានចំនួនជិត៣ម៉ឺនគ្រួសារ (២៨ ៩៤៥) ស្មើនឹងចំនួនជិត១សែននាក់ (៨៩ ៧៨៦)។
លោកបន្តថា ជនបរទេសអន្តោប្រវេសន៍ទាំងនោះ ក្រសួងមហាផ្ទៃបានផ្ដល់បណ្ណស្នាក់នៅអចិន្ត្រៃយ៍ជូនអ្នកដែលមានអាយុ១៨ឆ្នាំឡើង ចំនួនជាង៦ម៉ឺននាក់ (៦៥ ១៦៨)។ ជាមួយគ្នានោះ ក្រសួងបានផ្ដល់បណ្ណបន្តសុពលភាពដែលមានរយៈពេល២ឆ្នាំម្ដង សរុបជិត២ម៉ឺនបណ្ណ (១៩ ៥៦១)។
កាលពីថ្ងៃទី២៣ ខែកុម្ភៈ ឆ្នាំ២០២២ អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ លោក ប៉ោ ភក្តិ បានជំរុញឱ្យធ្វើវិសោធនកម្មច្បាប់អន្តោប្រវេសន៍ឆ្នាំ១៩៩៤ ជាបន្ទាន់ ដើម្បីធានាប្រសិទ្ធភាពគ្រប់គ្រងជនអន្តោប្រវេសន៍។ ការជំរុញនោះ ក្រោយពីរកឃើញថា ផ្នែកមួយនៃបញ្ហានេះ គឺអាជ្ញាធរវៀតណាមមិនព្រមទទួលយកពលរដ្ឋខ្លួនដែលរស់នៅខុសច្បាប់នៅកម្ពុជា ទោះបីពួកគេចង់ទៅវិញក៏ដោយ៕
