សកម្មជន​ថា​បទល្មើស​ព្រៃឈើ​ក្នុង​តំបន់ការពារ​នៅ​ខេត្ត២​បន្ត​កើតមាន ខណៈ​មន្ត្រីជំនាញ​អនុវត្ត​ច្បាប់​ធូររលុង

ទីតាំងមន្ទីរបរិស្ថានខេត្តពោធិ៍សាត់។ (ហ្វេសប៊ុក៖ មន្ទីរបរិស្ថានខេត្តពោធិ៍សាត់-Pursat Provincial Department of Environment)

សកម្មជន​បរិស្ថានអះ​អាង​ថា បទ​ល្មើស​ព្រៃឈើក្នុង​ដែន​ជម្រក​សត្វ​ព្រៃ​ភ្នំ​ឱរ៉ាល់ និង​តំបន់​អភិរក្សជួយភ្នំក្រវាញ ស្ថិតក្នុងភូមិសាស្ត្រខេត្តពោធិ៍សាត់ និង​ខេត្តកោះកុង នៅ​តែបន្តកើត​មាន​ជា​រៀង​រាល់​ថ្ងៃ ដោយ​សារ​មន្ត្រី​ជំនាញ​​ធូររ​លុង​ក្នុងការអនុវត្តច្បាប់។

កាលពីដើមខែមីនា ឆ្នាំ២០២២​នេះ អង្គការ​ប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ បាន​ដាក់​លិខិត​មួយ​ទៅ​ក្រសួង​បរិ​ស្ថាន ដើម្បី​សុំ​ឱ្យលោក​រដ្ឋមន្ត្រី​ សាយ សំអាល់ អន្តរាគមន៍​​​ទៅ​មន្ទីរបរិស្ថាន​​ខេត្ត​ពោធិ៍សាត់ និងខេត្តកោះកុង ឱ្យបិទការដឹក​ឈើចេញ​​កាត់​​តាម​​ស្នាក់​ការរង​អំពិល និង​​ស្នាក់ការបឹងថ្លុង នៃដែនជម្រកសត្វព្រៃភ្នំឱរ៉ាល់។

លិខិតបន្តថា ក្រោយ​​ទទួល​បាន​ព័ត៌មាន​ពីពលរដ្ឋ​ ជុំវិញ​ការ​កាប់និងដឹកឈើ​ដោយ​ខុស​ច្បាប់​ចេញ​ពី​ដែនជម្រក​សត្វ​ព្រៃ​ភ្នំ​ឱរ៉ាល់ មន្ត្រី​របស់​អង្គការនេះ​បានចុះទៅ​អង្កេតនៅស្នាក់ការរងបឹងថ្លុង ​​ដោយឃើញមានការដឹកឈើជាហូរហែរ ដែលជាប្រភេទឈើសម្រាប់សាងសង់ផ្ទះ និង​គំន​រ​ឈើបាន​លាក់​ទុកក្បែរទីស្នាក់ការរងបឹងថ្លុង ដើម្បី​ត្រៀមដឹកចេញតាមគោយន្តនិងរទេះគោឆ្ពោះ​ទៅខេត្ត​កំពង់ស្ពឺ​ កាត់តាមច្រកស្នាក់ការ​រងអូរ​ត្រាវ ស្នាក់ការ​អន្លង់​អង្គុញ និងមួយផ្នែកដឹកកាត់តាមស្នាក់រងអំពិល។

បើតាមលិខិតដដែលនេះ មន្ត្រីអង្គការនេះក៏បានចុះទៅ​អង្កេតនៅតំបន់អភិរក្ស​នៃជួរភ្នំក្រវាញ ព្រំប្រទល់ខេត្តកោះកុង​ ស្ថិតក្នុងស្រុកថ្មបាំង និងស្រុកស្រែអំបិល បានជួបប្រទះការកាប់ឈើនិងការដឹកឈើចេញជាបន្ត​បន្ទាប់​ដូចគ្នា​នេះ​ផងដែរ។

ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ លោក ជា ហ៊ាន ប្រាប់វីអូឌីនៅថ្ងៃសុក្រនេះថា បន្ទាប់ពីអង្គការដាក់លិខិតទៅក្រសួងបរិស្ថាន មន្ត្រីជំនាញក្រោម​ឱវាទ​របស់​ក្រសួង និង​សមត្ថកិច្ច​ពាក់​ព័ន្ធ​ បានចុះទប់ស្កាត់ឬបង្ក្រាបបទល្មើសព្រៃឈើទាំងនោះ ប៉ុន្តែអនុវត្តបានតែរយៈពេល​ខ្លី​ ឬពេលមានបទបញ្ជាពីថ្នាក់លើតែប៉ុណ្ណោះ។

លោក ជា ហ៊ាន បន្ត​​ថា ថ្មីៗនេះ លោកបានចុះអង្កេតបទល្មើសព្រៃឈើនៅតំបន់ទាំង​នោះ​​ម្ដង​ទៀត ដោយប្រទះឃើញបទល្មើសកាប់និងដឹកឈើជាហូរហែដដែល ដោយគ្មានការទប់ស្កាត់ឬបង្ក្រាបពីសំណាក់​មន្ត្រី​ជំនាញ ឬ​អាជ្ញាធរ​ពាក់​ព័ន្ធ​ឡើយ។

ប្រធាន​អង្គ​ការ​រូបនេះ​បានដាក់ការសង្ស័យថា បទល្មើសកើតឡើងដដែលមិនអាចទប់ស្កាត់នេះ អាច​ជាប់ពាក់​ព័ន្ធ​អំពើ​ពុក​រលួយ​ណាមួយ​រវាងមន្ត្រីជំនាញជាមួយជនល្មើស និងជាកម្សោយនៃការអនុវត្តច្បាប់របស់​មន្ត្រីជំនាញ​ ជាដើម។

លោកបន្ថែមថា៖ «ធាតុផ្សំ គឺជា​មន្ត្រី​នៅ​គោលដៅទាំងអស់ហ្នឹង បានប្រព្រឹត្តនូវអំពើល្មើសច្បាប់ ដោយ​សារ​តែ​អនុញ្ញាត​ឱ្យមាន​ការ​កាប់​បំផ្លាញ​ព្រៃឈើ ដោយ​បាន​ទទួល​យក​សំណូក​ក្នុងមួយគោយន្ត ៧ទៅ៨ម៉ឺនរៀល ហើយឱ្យសកម្មភាពប្រព្រឹត្តបទ​ល្មើសនៅតែបន្ត។ នេះបើតាមការអះអាងរបស់អ្នកកាប់​ជញ្ជូន​ឈើតាម​គោយន្ត ដែលខ្ញុំសម្ភាសជាមួយគាត់។ គាត់ថា ពួកគាត់មកកាប់ឈើនេះ ដោយសារគាត់បង់លុយឱ្យមន្ត្រី​បរិស្ថានតាមតំបន់គោលដៅ»

វីអូឌី មិនអាចសុំការឆ្លើយតបពីប្រធាន​មន្ទីរ​បរិស្ថាន​ខេត្តពោធិ៍សាត់ លោក គង់ ពុទ្ធីរ៉ា បានទេ ពាក់ព័ន្ធករណីនេះ។

រដ្ឋលេខាធិការ និងជា​អ្នកនាំពាក្យក្រសួងបរិស្ថាន លោក នេត្រ ភក្រ្តា មានប្រសាសន៍ថា ក្រសួងតែងតែសហការជាមួយ​​អង្គការ​ដៃគូនានាដែលធ្វើការពាក់ព័ន្ធបរិស្ថាន​ ដើម្បីទប់ស្កាត់បទល្មើសព្រៃឈើ។ លោកថា ប្រសិន​បើ​មានបទល្មើសផ្សេងៗ អង្គការជាដៃគូត្រូវផ្ដល់នូវភស្តុតាងមកក្រសួង ដើម្បីចាត់វិធានការ។ លោកថា មន្រ្តីឧទ្យានុរក្សរបស់ក្រសួង តែងតែការពារនិងអភិរក្សធនធានធម្មជាតិប្រកបដោយការ​ទទួលខុស​ត្រូវ។

យ៉ាងណា លោក ភក្រ្តា ទទួលស្គាល់ថា បទល្មើសធនធានធម្មជាតិនៅតែកើតឡើងក្នុង​ទ្រង់ទ្រាយតូចៗ ដែល​ត្រូវការការចូលរួមសហការអនុវត្តច្បាប់ពីគ្រប់ភាគីពាក់ព័ន្ធ។ លោកថា ក្រសួងនៅតែផ្ដោតសំខាន់ទៅលើសេដ្ឋកិច្ចប្រជាពលរដ្ឋនៅមូលដ្ឋាន ដែលក្រសួងពិបាកនឹង​អនុវត្តច្បាប់ឱ្យបានល្អ ប្រសិនបើពលរដ្ឋនៅ​តែ​ត្រូវការប្រាក់ចំណូលជាមូលដ្ឋាននោះ។

លោកបន្ថែមថា៖ «អ្វីដែលយើងគ្រប់គ្នាត្រូវធ្វើនោះ គឺការបង្កើតសេដ្ឋកិច្ចនៅមូលដ្ឋាន ជម្រើសការងារដល់ប្រជាពលរដ្ឋ មុខរបរដល់ប្រជាពលរដ្ឋ។ រាប់ទាំងអង្គការក្រៅរដ្ឋាភិបាលទាំងឡាយ ស្រឡាញ់​បរិស្ថាន ការ​ពារ​បរិស្ថាន សូម​ឱ្យ​ពួក​គាត់​ចូល​រួម​រក​ដំណោះស្រាយ​ទាំង​អស់គ្នា​ ចៀសវាង​ត្រឹម​តែ​និយាយ​ឱ្យ​តែបាន»

ប្រធាន​​ផ្នែកកម្មវិធីស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង ធ្លាប់ប្រាប់វីអូឌីថា ដើម្បីទប់ស្កាត់បទល្មើសព្រៃឈើឱ្យមានប្រសិទ្ធភាព គឺរដ្ឋាភិបាល ជាពិសេសក្រសួងបរិស្ថាន​ ត្រូវ​​ពង្រឹង​ការ​អនុវត្ត​ច្បាប់​ឱ្យ​តឹង​រ៉ឹង និង​បើកទូលាយ​ឱ្យសាធារណជន​ ដូចជា អង្គការសង្គមស៊ីវិល សហគមន៍ និង​យុវជ​ន ​បានចូលរួមចុះល្បាតដោយសេរី ក្រោយពីក្រសួងបានរឹតត្បិតនាពេលកន្លងមក។

កាលពីថ្ងៃទី​១៧ ខែ​មិថុនា ឆ្នាំ​២០២១ ស្ថាន​ទូត​សហរដ្ឋអាមេរិកប្រចាំកម្ពុជា បានផ្ដាច់ជំនួយពីរដ្ឋាភិបាលកម្ពុជា លើគម្រោង​ «ព្រៃឡង់បៃតង» ឆ្លើយតបនឹងវិធានការរបស់រដ្ឋាភិបាលដែលបិទខ្ទប់សំឡេងនិងសកម្ម​ភាព​សកម្មជនការពារព្រៃឈើ មិនឱ្យចូលល្បាតបទល្មើសនៅតំបន់ព្រៃឡង់ ហើយព្រៃឈើក្នុងតំបន់ការ​ពារ​មួយ​នេះ​នៅបន្តរងការកាប់បំផ្លាញ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ