អ្នកសារព័ត៌មានអនឡាញម្នាក់កំពុងស្វែងរកអ្នកច្បាប់ការពារភាពស្អាតស្អំរបស់ខ្លួន ដោយបារម្ភពីការចាប់ឃុំខ្លួន ក្រោយពីសាលាដំបូងខេត្តព្រះវិហារ បានចេញដីកាឱ្យនាំខ្លួនទៅបំភ្លឺ ជុំវិញសំណុំរឿងព្រហ្មទណ្ឌ បន្ទាប់ពីបានចុះថតរូបភាពគ្រឿងចក្រឈូសឆាយដីរដ្ឋមួយកន្លែងនៅក្នុងខេត្តនេះ។
លោក ទ្រី សុផល អ្នកសារព័ត៌មានគេហទំព័រព័ត៌មានអនឡាញឈ្មោះ «រាល់ថ្ងៃ» និងជាអតីតអ្នកសារព័ត៌មានទូរទស្សន៍ NiceTV របស់ក្រសួងមហាផ្ទៃ ឱ្យ VOD ដឹងនៅថ្ងៃចន្ទនេះថា គាត់មានការបារម្ភខ្លាចមានការចាប់ឃុំខ្លួនដាក់ពន្ធនាគារ ក្រោយពីតំណាងអយ្យការអមសាលាដំបូងខេត្តនេះ គឺលោក វុធ សាវី ចេញដីកាឱ្យសមត្ថកិច្ចនាំខ្លួនទៅឆ្លើយបំភ្លឺក្នុងសំណុំរឿងព្រហ្មទណ្ឌ ដែលចោទពីបទ «លួច និងកំហែងយក» នៅចំណុចឃុំស្រយង់ ស្រុកគូលែន ខេត្តព្រះវិហារ កាលពីថ្ងៃទី២ ខែធ្នូ ឆ្នាំ២០២១ តបតាមបណ្ដឹងរបស់បុគ្គលដែលសមត្ថកិច្ចធ្លាប់ឃាត់គ្រឿងចក្រឈូសឆាយដីរដ្ឋមួយកន្លែងនៅក្នុងឃុំនេះ។
លោកអះអាងថា លោកមិនបានធ្វើអ្វីខុសដូចការចោទប្រកាន់ទេ ដោយថា ពេលសមត្ថកិច្ចឃាត់គ្រឿងចក្រមួយគ្រឿងទៅរក្សាទុក ពេលនោះលោកគ្រាន់តែជាអ្នកថតរូបប៉ុណ្ណោះ។
បើតាមលោក សុផល ការចុះស្វែងរកបទល្មើសពេលនោះ ក្រៅពីរូបលោក ក៏មានមន្ត្រីយោធាខេត្តម្នាក់ នាយកសង្កាត់រដ្ឋបាលព្រៃឈើ និងមន្ត្រីនគរបាលសេដ្ឋកិច្ចប្រចាំខេត្តនេះ រួមទាំងអ្នកកាសែតផ្សេងទៀតផងដែរ ដែលអ្នកទាំងនោះសុទ្ធតែរងបណ្ដឹងនៅតុលាការដែរ។ លោកបញ្ជាក់ទៀតថា ពេលនេះ លោកកំពុងពឹងពាក់មេធាវីឱ្យដាក់លិខិតសុំអន្តរាគមន៍ពីក្រសួងយុត្តិធម៌ ឱ្យធ្វើអធិការកិច្ចដល់កន្លែងកើតហេតុ ជុំវិញការចោទប្រកាន់នេះ ដើម្បីផ្ដល់យុត្តិធម៌ជូនលោក។
លោកថា៖ «ចោទថាខ្ញុំលួច ខ្ញុំប្លន់អីហ្នឹង មានន័យថា ពេលហ្នឹងខ្ញុំទៅដកសោរអាត្រាក់ ឬក៏ដកហូតស្អីមួយពីភាគីជនល្មើស អាហ្នឹងបានចោទខ្ញុំបាន។ ប៉ុន្តែខ្ញុំឃើញបទល្មើសខ្ញុំថតឬរាយការណ៍ ម៉េចបានជាមកចោទខ្ញុំពីបទហ្នឹង»។
លោក ទ្រី សុផល យល់ថា ការដែលព្រះរាជអាជ្ញារងសាលាដំបូងខេត្តព្រះវិហារ ចេញដីកាឱ្យសមត្ថកិច្ចនាំខ្លួនលោកជុំវិញបណ្ដឹងចោទប្រកាន់នេះ អាចជាគំនុំរបស់មន្ត្រីតុលាការរូបនេះ ដោយថា កន្លងទៅ លោកធ្លាប់ប្ដឹងលោក វុធ សាវី ទៅអង្គភាពប្រឆាំងអំពើពុករលួយ ពាក់ព័ន្ធការដោះលែងជនជាប់ចោទ៣រូប ដែលវាយរូបលោក និងលោក សាវុធ ឱ្យរងរបួស អំឡុងពេលចុះបង្ក្រាបបទល្មើសនៅក្នុងខេត្តនេះ។
មេធាវីការពារក្ដីឱ្យលោក ទ្រី សុផល គឺលោក ម៉ន កែវស៊ីវិន អះអាងថា កូនក្ដីរបស់លោកជាអ្នកយកព័ត៌មាន ដែលគ្រាន់តែជាកញ្ចក់ឆ្លុះបញ្ចាំងសង្គម មិនបានធ្វើអ្វីខុសដូចការចោទប្រកាន់របស់ដើមបណ្ដឹងទេ។
លោកថា បញ្ហានេះ លោកនឹងដាក់លិខិតសុំអន្តរាគមន៍ទៅក្រសួងយុត្តិធម៌ ក្រោយពិធីបុណ្យចូលឆ្នាំខ្មែររួច ដើម្បីឱ្យក្រសួងមានវិធានការចុះធ្វើអធិការកិច្ចផ្ដល់យុត្តិធម៌ជូនកូនក្ដី ដោយសារលោកគិតថា ចំណាត់ការលើកូនក្ដីនេះ អាចជារឿងគំនុំរបស់មន្ត្រីតុលាការរូបនោះ។
លោកថា៖ «រាល់ដង កាលព្រះរាជអាជ្ញាគាត់ចុះទៅបង្ក្រាបកន្លែងណា គឺគាត់តែងតែប្រាប់ ទ្រី សុផល និង ទ្រី វិច្ឆិកា [ប្អូនបង្កើតរបស់ ទ្រី សុផល] ហ្នឹង ឱ្យទៅជាមួយ ដើម្បីផ្ដិតព័ត៌មានហ្នឹងចុះផ្សាយក្នុងសង្គម។ ដល់ក្រោយមក គាត់មានការប្រេះឆាអីអ៊ីចឹងទៅ ខ្ញុំក៏ដាក់ពាក្យប្ដឹងប្រាវៗភ្លាម។ តែឥលូវនេះចូលពីររឿងទៀត ប្ដឹង ទ្រី សុផល អ៊ីចឹងដែរ រឿងគ្រឿងចក្រគ្រឿងអីហ្នឹង»។
ព្រះរាជអាជ្ញារង និងជាអ្នកនាំពាក្យសាលាដំបូងខេត្តព្រះវិហារ លោក វុធ សាវី បានច្រានចោលការចោទប្រកាន់នេះ ដោយសម្អាងថា ការចេញដីកានាំខ្លួននេះជានីតិវិធីច្បាប់ ព្រោះអ្នកសារព័ត៌មានរូបនោះខកខានចូលបំភ្លឺតាមដីកាចំនួន៤លើករួចមកហើយ ជុំវិញការចោទប្រកាន់របស់ដើមបណ្ដឹង។
លោកថា៖ «ខ្ញុំមិនមែនជាអ្នកចុះបណ្ដឹងចោទគាត់ទេ ខ្ញុំទទួលពាក្យបណ្ដឹងពីប្រជាពលរដ្ឋ។ អ៊ីចឹងតំណាងអយ្យការ ជាធម្មតា នៅពេលទទួលពាក្យបណ្ដឹងពីភាគីម្ខាងទៀត ត្រូវតែកោះ ទោះបីបុគ្គលហ្នឹងខុសឬត្រូវក៏ដោយ។ ហើយបុគ្គលទាំងសងខាងត្រូវតែចូលមកបំភ្លឺមុខតំណាងអយ្យការ ដើម្បីរកខុសរកត្រូវ។ បើសិនជាបុគ្គលមិនបានប្រព្រឹត្តបទល្មើសដូចការចោទប្រកាន់ ដូចការចោទប្រកាន់ដូចភាគីម្ខាងទៀតនោះទេ អ៊ីចឹងយើងទៅផ្ទះវិញទៅ។ ដោយឡែក រឿងហ្នឹងមានអ្នកកាសែតផ្សេងទៀត គេចូលឆ្លើយ គេទៅផ្ទះវិញអស់ហើយ នៅតែគាត់មួយ គាត់កូរនីតិវិធី គាត់មិនចូលឆ្លើយ»។
VOD មិនអាចសុំការបំភ្លឺពីដើមបណ្ដឹង លោក សុង ចិន បានទេ នៅថ្ងៃចន្ទនេះ។
យ៉ាងនេះក្ដី នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅ ខេមបូចា លោក ណុប វី ផ្តល់ជាយោបល់ថា ដើម្បីបញ្ចៀសនូវការចោទប្រកាន់ថា វិធាននេះបង្ហាញពីរូបភាពគំរាមកំហែង និងបំភិតបំភ័យដល់សេរីភាពអ្នកសារព័ត៌មានផ្សេងទៀត ដែលបានចូលរួមការពារធនធានធម្មជាតិនិងបរិស្ថានក្នុងតំបន់នោះ ក្រសួងពាក់ព័ន្ធគួរចុះធ្វើអធិការកិច្ចស្វែងរកការពិត ដើម្បីផ្តល់យុត្តិធម៌ដល់អ្នកសារព័ត៌មានដែលរងការចោទប្រកាន់។
យ៉ាងណា អ្នកសារព័ត៌មានមួយទៀត គឺលោក ខៀវ ថុល ដែលរងការចោទប្រកាន់ក្នុងសំណុំរឿងចោទប្រកាន់នេះដែរ អះអាងថា លោកបានចូលបំភ្លឺរួចហើយ តែមកដល់ពេលនេះមិនត្រូវបានគេចាប់ឃុំខ្លួននោះទេ៕
