កម្មករមួយចំនួនស្នើរដ្ឋាភិបាលចាត់វិធានការយ៉ាងណាកុំឱ្យមានការដំឡើងថ្លៃរថយន្តឈ្នួលតាមចិត្តនាអំឡុងពេលបុណ្យចូលឆ្នាំថ្មីប្រពៃណីជាតិខាងមុខនេះ ដើម្បីជួយសម្រួលដល់ពួកគេអាចធ្វើដំណើរទៅជួបជុំគ្រួសារ។
នៅឆ្នាំនេះ ប្រមុខរាជរដ្ឋាភិបាលបានអនុញ្ញាតឱ្យមានការប្រារព្ធពិធីបុណ្យចូលឆ្នាំថ្មីប្រពៃណីជាតិទូលំទូលាយឡើងវិញ បន្ទាប់ពីខកខាន២ឆ្នាំមកហើយ ដោយសារការឆ្លងរាលដាលជំងឺកូវីដ-១៩។
កម្មករកាត់ដេរមកពីខេត្តសៀមរាបដែលកំពុងធ្វើការនៅខេត្តកណ្ដាល អ្នកស្រី ហេង ពៅ បានលើកឡើងនៅថ្ងៃចន្ទនេះថា ចាប់តាំងពីមានវិបត្តិកូវីដ-១៩មក គាត់មិនដែលបានទៅលេងស្រុកកំណើតនោះទេ ខណៈមិនសូវមានលុយកាក់ផង។ អ្នកស្រីបន្តថា នៅល្ងាចថ្ងៃស្អែកនេះ គាត់នឹងធ្វើដំណើរទៅស្រុក ដើម្បីបានទៅមើលម្ដាយឈឺ ព្រោះបានសម្រាកនាឱកាសបុណ្យចូលឆ្នាំ។
យ៉ាងណា អ្នកស្រីបានឮដំណឹងថា ឆ្នាំនេះ តម្លៃរថយន្តឈ្នួលឡើងថ្លៃជាងមុន ខណៈពីមុនសំបុត្រឡានឈ្នួលមិនដល់៦ម៉ឺនរៀលដូចពេលនេះទេ។
អ្នកស្រីបន្តថា៖ «សំណូមពរថា កុំឱ្យសំបុត្រឡានថ្លៃពេក ព្រោះកម្មករឥលូវក្រណាស់ ការងារក៏អត់មានធ្វើទៀត! ទំនិញក៏ថ្លៃ សំបុត្រឡានក៏ថ្លៃ ប្រជាពលរដ្ឋគាត់អត់មានសមត្ថភាពធ្វើដំណើរទៅផ្ទះដែរ។ បញ្ចុះតម្លៃឱ្យបានធូរថ្លៃបន្តិច ឱ្យបានសល់លុយកាក់ចែកឱ្យម៉ែ ចែកឱ្យកូនចាយ។ តែឥលូវវាថ្លៃហួសកំណត់ពេក កម្មកររត់អត់រួចទេ! រកលុយក៏អត់សូវបាន ហើយការងារក៏អត់មានធ្វើ ហើយថ្លៃឡានក៏ថ្លៃទៀត»។
កម្មកររោងចក្រម្នាក់ទៀតនៅរាជធានីភ្នំពេញ អ្នកនាង ចាន់ គន្ធា ប្រាប់ថា គាត់បានធ្វើដំណើរទៅលេងផ្ទះសាច់ញាតិនៅខេត្តកំពង់ធំ។ អ្នកនាងថា តម្លៃដែលធ្លាប់ធ្វើដំណើរជាទូទៅគឺ ២០ ០០០រៀលប៉ុណ្ណោះ ប៉ុន្តែកាលពីថ្ងៃអាទិត្យម្សិលមិញនេះ ម្ចាស់រថយន្តឈ្នួលបានទារពីគាត់៣០ ០០០រៀល។
អ្នកនាង ចាន់ គន្ធា ថា៖ «ប្រាក់ខែថាចាយចូលឆ្នាំ ថាជូនម៉ែឪ ឧទាហរណ៍ថាជូនបាន៣០ម៉ឺនរៀល ឥលូវជូនបានតែ២០ម៉ឺនរៀល ព្រោះយើងត្រូវទុកចំណាយធ្វើសោហ៊ុយ។ យើងបន្ថយថវិកាខ្លួនឯង អត់សូវបានចាយទេ ហើយជូនម៉ែឪក៏បន្ថយដែរ ព្រោះទុកលុយធ្វើសោហ៊ុយ»។
កម្មករកាត់ដេររូបនេះអំពាវនាវឱ្យរដ្ឋាភិបាលជួយគិតគូរដល់កម្មករ ដោយធ្វើយ៉ាងណាមានវិធានការជាក់លាក់ជាមួយម្ចាស់រថយន្តឈ្នួល ឱ្យគិតតម្លៃសមរម្យ និងកុំដំឡើងថ្លៃស្រេចតែចិត្ត។
កម្មករកាត់ដេរម្នាក់ទៀតមកពីខេត្តព្រៃវែង និងកំពុងធ្វើការនៅក្រុងតាខ្មៅ ខេត្តកណ្ដាល អ្នកស្រី ជា ធីតា ប្រាប់ថា រូបគាត់ និងកម្មករផ្សេងៗទៀតដែលធ្វើការជាមួយគ្នា ហាក់មិនសូវចង់ទៅស្រុកកំណើតទេ ដោយសារមិនសូវមានថវិកាចាយវាយ ខណៈរយៈពេលចុងក្រោយនេះមិនសូវមានការងារធ្វើ និងអ្នកខ្លះទៀតត្រូវព្យួរការងារជាដើម។
យ៉ាងណា អ្នកស្រីថា ត្រូវតែបង្ខំចិត្តទៅស្រុក ព្រោះខកខានទៅ២ឆ្នាំមកហើយ។ អ្នកស្រីបានអំពាវនាវដល់រដ្ឋាភិបាលធ្វើយ៉ាងណាជួយសម្រួលកុំឱ្យក្រុមហ៊ុនដឹកជញ្ជូន ឬម្ចាស់រថយន្តឈ្នួលដំឡើងថ្លៃ ដើម្បីជួយសម្រួលដល់ជីវភាពកម្មករ។
អ្នកស្រីថា៖ «វាប៉ះពាល់ផ្លូវចិត្តមួយ ប៉ះពាល់ដល់ជីវភាពគាត់មួយ! ដោយសារអាតម្លៃឡានហ្នឹងវាអត់ច្បាស់ […] ដល់ពេលយើងនិយាយអីទៅ គេ [ម្ចាស់ឡានឈ្នួល] ថា ឥលូវហ្នឹងសាំងឡើងថ្លៃ ឱ្យគេធ្វើម៉េច? ពន្ធឡើងថ្លៃ ឱ្យគេធ្វើម៉េច? អ៊ីចឹងគេ [ថា]ឡើងតាមពន្ធ តាមសាំងអ៊ីចឹងទៅ»។
អភិបាលរងសាលារាជធានីភ្នំពេញ លោក កើត ឆែ បដិសេធឆ្លើយតបនៅពេល វីអូឌី សួរអំពីវិធានការក្នុងការទប់ស្កាត់កុំឱ្យម្ចាស់រថយន្តឈ្នួលឡើងថ្លៃ និងថាតើនឹងមានការបញ្ចេញរថយន្តដឹកជញ្ជូនពលរដ្ឋទៅស្រុកកំណើតដោយមិនគិតថ្លៃ ដូចកាលពី២ឆ្នាំមុន ឬយ៉ាងណានោះ។
លោកថា៖ «សុំអធ្យាស្រ័យ ខ្ញុំជាប់ប្រជុំ»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មើលឃើញថា នៅកម្ពុជា ឱ្យតែដល់ឱកាសពិធីបុណ្យសំខាន់ៗរបស់ជាតិ ដូចជា បុណ្យចូលឆ្នាំ និងភ្ជុំបិណ្ឌ ជាដើម អ្នកប្រកបរបរដឹកជញ្ជូនអ្នកដំណើរតែងយកឱកាសនោះមកដំឡើងថ្លៃឈ្នួល បើទោះមានការអំពាវនាវនានាពីរដ្ឋាភិបាលក៏ដោយ។
ដោយឡែក លោកថា នៅឆ្នាំនេះ នៅមិនទាន់ឃើញមានសកម្មភាពនៃការសម្រួលណាមួយរបស់រដ្ឋាភិបាល ដើម្បីជួយដល់ពលរដ្ឋដែលមិនមានលទ្ធភាពក្នុងការធ្វើដំណើរទៅស្រុកកំណើតនៅឡើយ។
លោកថា៖ «ប៉ុន្មានឆ្នាំមុន យើងឃើញថា សាលារាជធានីភ្នំពេញបានចេញឡានក្រុងរបស់ខ្លួនដឹកប្រជាពលរដ្ឋ free [មិនគិតថ្លៃ] ទៅតាមបណ្ដាខេត្ត។ តែឆ្នាំនេះ យើងហាក់ដូចមិនទាន់មានវិធានការណាមួយក្នុងការជួយសម្រួលទៅដល់ប្រជាពលរដ្ឋដែលគ្មានលទ្ធភាពទៅលេងស្រុកកំណើតនៅឡើយទេ ហើយក៏មិនទាន់មានការអំពាវនាវណាមួយចំពោះរថយន្តឈ្នួលទាំងអស់នោះ មិនថារថយន្តក្រុមហ៊ុន ឬឯកជននោះទេ»។
ករណីនេះ លោក វន់ ពៅ បានជំរុញដល់រដ្ឋាភិបាលគួរមានវិធានការប្រាកដជាមួយក្រុមហ៊ុនដឹកជញ្ជូន ក្នុងការដាក់តម្លៃជាក់ជាក់សម្រាប់ការដឹកអ្នកដំណើរ ហើយម្ចាស់ចំណតរថយន្តឈ្មួលក៏មិនត្រូវមានការឡើងថ្លៃដែរ ព្រោះវាអាចធ្វើឱ្យរថយន្តឈ្នួលទាមទារឡើងតម្លៃថ្លៃតៗគ្នាដល់អ្នកដំណើរដែរ។
លោកថា បើរដ្ឋមិនមានការយកចិត្តទុកដាក់លើការធ្វើដំណើររបស់ពលរដ្ឋនាឱកាសបុណ្យជាតិនេះទេ ពលរដ្ឋ កម្មករនឹងបាត់ឱកាសជួបជុំគ្រួសារ ខកខាននូវឱកាសរីករាយចូលរួមបុណ្យជាតិ ខណៈពួកគេបានខកខាន២ឆ្នាំរួចមកហើយ៕