កម្ពុជាបាននាំទំនិញទៅកាន់ទីផ្សារប្រទេស-តំបន់នៅជុំវិញពិភពលោក ក្នុងត្រីមាសទី១ សម្រេចបានក្នុងរង្វង់ទឹកប្រាក់ជាង ៥ ៧០០លានដុល្លារ បើធៀបនឹងរយៈពេលដូចគ្នា កាលឆ្នាំ២០២១ ក្នុងនោះបានកើនក្នុងអត្រា២៥,៧ភាគរយ។
យោងតាមស្ថិតិទំនិញពាណិជ្ជកម្មនាំចេញជាមួយប្រទេសសំខាន់ៗរបស់អគ្គនាយកដ្ឋានគយ និងរដ្ឋាករកម្ពុជា ដែលវីអូឌីទទួលបាននៅថ្ងៃព្រហស្បតិ៍នេះ បានឱ្យដឹងថា ក្នុងរយៈពេល៣ខែ គិតចាប់ពីខែមករា ដល់ខែមីនា ឆ្នាំ២០២២ កម្ពុជានាំទំនិញទៅកាន់ទីផ្សារប្រទេស-តំបន់នៅជុំវិញពិភពលោក សម្រេចបានក្នុងរង្វង់ទឹកប្រាក់ជាង ៥ ៧០០លានដុល្លារ ដែលចំនួននេះបានកើនក្នុងអត្រា២៥,៧ភាគរយ បើធៀបនឹងរយៈពេលដូចគ្នា កាលឆ្នាំ២០២១ ។
ស្ថិតិទំនិញពាណិជ្ជកម្មនាំចេញេរបស់អគ្គនាយកដ្ឋានគយ និងរដ្ឋាករកម្ពុជា ឱ្យទៀតថា អាមេរិក គឺជាទីផ្សារទំនិញលំដាប់ទី១របស់កម្ពុជា ដែលមានទំហំទឹកប្រាក់ជាង ២ ១៥០លានដុល្លារ ខណៈការនាំទៅប្រទេសចិន មានត្រឹមប្រមាណ ៣២០លានដុល្លារតែប៉ុណ្ណោះ ។
ដោយឡែក ប្រទេសដែលនាំទំនិញចូលកម្ពុជាវិញ រួមមាន ប្រទេសវៀតណាម នាំទំនិញចូលពីកម្ពុជាក្នុងរង្វង់ទឹកប្រាក់ជិត ៧៥៨លានដុល្លារ, ប្រទេសថៃនាំទំនិញក្នុងរង្វង់ទឹកប្រាក់ជាង ៣១៨លានដុល្លារ និងប្រទេសជប៉ុន នាំចូលទំនិញមកកម្ពុជា ក្នុងរង្វង់ទឹកប្រាក់៣០៥លានដុល្លារផងដែរ។
គួរបញ្ជាក់ថា រយៈពេល៣ខែនៃដើមឆ្នាំ២០២២ កម្ពុជាមានទំហំពាណិជ្ជកម្មប្រមាណ ១៣ ១៦០លានដុល្លារ ដោយនៅក្នុងនោះ ប្រទេសចិន គឺមានទំហំពាណិជ្ជកម្មច្រើនជាងគេជាមួយកម្ពុជា ក្នុងរង្វង់ទឹកប្រាក់ ២ ៨៧៣ លានដុល្លារ ខណៈជាមួយអាមេរិក មានក្នុងរង្វង់ជិត ២ ២២៧លានដុល្លារ ៕
