លោកនាយករដ្ឋមន្ត្រី ហ៊ុន សែន បង្ហាញក្តីសង្ឃឹមថា ខេត្តព្រះសីហនុ នឹងក្លាយជាខេត្ត «ដ៏សំខាន់»ក្នុងការទាក់ទាញវិស័យទេសចរណ៍ក្នុងស្រុក ក្រោយពីបានតាំងរូបសំណាកព្រះថោងនាងនាគនៅទីនោះ ដោយសម្អាងថា ប្រវត្តិរឿងមួយនេះ ផ្សារភ្ជាប់យ៉ាងជ្រៅ ក្នុងពិធីរៀបអាពាហ៍ពិពាហ៍របស់ពលរដ្ឋកម្ពុជា។
ការថ្លែងរបស់លោក ហ៊ុន សែន នេះ ធ្វើឡើងក្នុងពិធីអភិសេករូបសំណាកព្រះថោងនាងនាគ នៅខេត្តព្រះសីហនុ ព្រឹកថ្ងៃសៅរ៍នេះ ដែលត្រូវនឹងថ្ងៃបញ្ចប់នៃពិធីបុណ្យចូលឆ្នាំខ្មែរ។
លោកបានថ្លែងថា ក្រុងព្រះសីហនុ ជាទីក្រុងដែលផ្សារភ្ជាប់ ដោយព្រះគោរមងារ ព្រះបរមរតនកោដ្ឋ អតីតព្រះមហាក្សត្រ ហើយថា រូបព្រះថោងនាងនាគ បានផ្សារភ្ជាប់យ៉ាងជ្រៅទៅនឹងពិធីរៀបអាពាហ៍ពិពាហ៍របស់ពលដ្ឋកម្ពុជា។
លោក គូសបញ្ជាក់ថា ការកើតឡើងនូវរូបបដិមានៅក្នុងខេត្តនេះ ដូចជារូបបដិមាសឹង្ហ ដែលជាតំណាងឱ្យព្រះបរមរតនកោដ រូមទាំងរូបសំណាកព្រះថោងនាងនាគនេះ ខេត្តមាត់សមុទ្រមួយនេះ នឹងក្លាយជាតំបន់ដ៏ទាក់ទាញភ្ញៀវទេសចរក្នុងស្រុក។
លោកថា៖«ការកើតឡើងនូវរូបសំណាកផ្សេងៗនៅក្នុងខេត្តព្រះសីហនុរបស់យើង គឺជានិមិត្តរូបនៃការកកើតទឹកដី ក៏ដូចជាការកកើតនៅខេត្តព្រះសីហនុ របស់យើងនេះ។ ក៏ប៉ុន្តែ វាក៏បានក្លាយទៅជាផលិតផល នៃវិស័យទេសចរណ៍ដ៏ទាក់ទាញ។ ខ្ញុំបានឃើញគេបង្ហោះរូបភាពចេញពីទីនេះ [ព្រះថោងនាងនាគ]គ្រាន់តែយកមកដាក់ប៉ុន្មានថ្ងៃ ហើយម្សិលមិញនេះ មនុស្សយ៉ាងច្រើន។ សង្ឃឹមថា ប្រជាពលរដ្ឋរបស់យើងនឹងចង់ដឹង ហើយនឹងថតរូបភាពចេញពីទីនេះ»។
ប៉ុន្មានឆ្នាំមកនេះ ខេត្តព្រះសីហនុ បានធ្លាក់ចុះភ្ញៀវទេសចរក្នុងស្រុក និងភ្ញៀវបរទេសមកពីអឺរ៉ុប រួមទាំងការត្អូញត្អែពីការឡើងថ្លៃផ្ទះសំណាក់ និងសណ្ឋាគារផងដែរ ស្របគ្នានឹងលំហូរជនជាតិចិននៅទីនោះ ហើយក៏ចំពេលដែលកម្ពុជាមានការរាតត្បាតដោយជំងឺកូវីដ-១៩ ។
យ៉ាងណា តាមអ្នកអត្ថាធិប្បាយក្នុងកម្មវិធីនេះ រូបសំណាកព្រះថោងនាងនាគ មានកម្ពស់២១ម៉ែត្រ ត្រូវបានរចនាបថ ដោយស្ថាបត្យកម្មកូនខ្មែរ តែត្រូវធ្វើនៅប្រទេសចិន ហើយដឹកមកដល់ខេត្តព្រះសីហនុ នៅថ្ងៃទី២៥ មីនា ឆ្នាំ២០២២នេះ៕
