ក្រុមអ្នកជួយសង្គ្រោះបានបន្តស្វែងរកមនុស្សរាប់សិបនាក់ដែលបាត់ខ្លួននៅក្នុងខេត្ត KwaZulu-Natal (KZN) ប្រទេសអាហ្វ្រិកខាងត្បូង កាលពីថ្ងៃអាទិត្យ បន្ទាប់ពីមានភ្លៀងធ្លាក់ខ្លាំងក្នុងរយៈពេលប៉ុន្មានថ្ងៃថ្មីៗនេះ ដែលបានបង្កឱ្យមានជាករណីទឹកជំនន់ និងការរអិលបាក់ដី ដែលបានសម្លាប់មនុស្សជាង៤៤០នាក់។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ករណីទឹកជំនន់នេះក៏បានធ្វើឱ្យមនុស្សរាប់ពាន់នាក់គ្មានផ្ទះសម្បែងរស់នៅ កាត់ផ្ដាច់ការផ្គត់ផ្គង់ថាមពល បណ្ដាញទឹកស្អាត និងរំខានដល់ប្រតិបត្តិការនៅឯកំពង់ផែដ៏សំខាន់មួយក្នុងទីក្រុង Durban ផងដែរ ខណៈមន្ត្រីសេដ្ឋកិច្ចក្នុងតំបន់បានប៉ាន់ប្រមាណពីការខូចខាតហេដ្ឋារចនាសម្ព័ន្ធទាំងមូលក្នុងទំហំប្រាក់ជាង១០ពាន់លានរ៉ន (rand) ឬស្មើនឹង ៦៨៤,៦លានដុល្លារអាមេរិក។
យោងតាមអភិលបាលខេត្ត KwaZulu-Natal លោក Sihle Zikalala បានឱ្យដឹងថា ចំនួនអ្នកស្លាប់បានកើនឡើងដល់៤៤៣នាក់ហើយគិតត្រឹមថ្ងៃអាទិត្យម្សិលមិញ ខណៈភ្លៀងត្រូវបានព្យាករថានឹងបន្តធ្លាក់បន្ថែមទៀត។
គួរបញ្ជាក់ថា គ្រោះទឹកជំនន់ដែលកើតឡើងនៅក្នុងប្រទេសអាហ្រ្វិកខាងត្បូងនេះ បានអូសបន្លាយអស់រយៈពេលជាងមួយសប្ដាហ៍ហើយ ដែលក្នុងនោះ ករណីគ្រោះមហន្តរាយនេះក៏បង្កជាផលប៉ះពាល់ដល់មនុស្សជាង៤ម៉ឺននាក់ផងដែរ នេះបើតាមការឱ្យដឹងពីអាជ្ញាធរ៕
