កម្ពុជារកចំណូលពីការនាំចេញជ័រកៅស៊ូ និងឈើកៅស៊ូ ក្នុងត្រីមាសទី១ ឬរយៈពេល៣ខែ ដើមឆ្នាំ២០២២នេះ មានចំនួន១០០លានដុល្លារអាមេរិក។
របាយការណ៍របស់អគ្គនាយកដ្ឋានចម្ការកៅស៊ូ ដែលភ្នាក់ងារសារព័ត៌មានកម្ពុជា AKP ចុះផ្សាយនៅថ្ងៃអង្គារនេះ ឱ្យដឹងថា ចំណូលសរុបត្រីមាសទី១ ដោយគិតចាប់ពីខែមករា ដល់ខែមីនា ឆ្នាំ២០២២នេះ កម្ពុជារកចំណូលពីការនាំចេញជ័រកៅស៊ូ និងឈើកៅស៊ូ បានចំនួន៩៩ ១៤៦ ៩៧០ដុល្លារសហរដ្ឋអាមេរិក។
ក្នុងនោះ ចំណូលពីការនាំចេញជ័រកៅស៊ូមានចំនួន៩៨ ៥៦០ ២៧០ដុល្លារអាមេរិក និងចំណូលពីការនាំចេញឈើកៅស៊ូមានចំនួន៥៨៦ ៧០០ដុល្លារអាមេរិក។
ប្រភពដដែលបន្តថា បរិមាណនៃការនាំចេញជ័រកៅស៊ូមានចំនួន៦១ ៨៣៩តោន ដែលកើនឡើងចំនួ ៧៨៣តោន ស្មើនឹង ១ភាគរយ ធៀបនឹងរយៈពេលដូចគ្នាកាលឆ្នាំមុន។ រីឯការនាំចេញឈើកៅស៊ូវិញ គឺមានចំនួន៨៣៦ម៉ែត្រគូប ដែលកើនឡើង ៣,៤៧ភាគរយ។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កាលពីឆ្នាំ២០២១ កម្ពុជារកចំណូលបានជាង៦១១លានដុល្លារ ពីការនាំចេញជ័រកៅស៊ូ និងឈើកៅស៊ូ។ ក្នុងនោះ ជ័រកៅស៊ូនាំចេញមានចំនួន៣៦៦ ៣០០តោន និងនាំចេញឈើកៅស៊ូ សរុបមានចំនួន៤៥៤ម៉ែត្រគូប៕