មេធាវីការពារក្ដីឱ្យសកម្មជនគណបក្សភ្លើងទៀន និងកូនប្រុសដែលជាអនីតិជន ចាត់ទុកការចាប់ខ្លួនកូនក្ដីបញ្ជូនទៅតុលាការ ដោយចោទប្រកាន់ថា បានប្រើឧបករណ៍ឆក់ត្រីខុសច្បាប់កាលពីចុងសប្ដាហ៍មុន គឺជាការគំរាមកំហែងផ្នែកនយោបាយច្រើនជាងការអនុវត្តច្បាប់។
លោក សំ សុគង់ ដែលជាមេធាវីការពារក្ដីឱ្យលោក ហែម ឆិល បេក្ខជនឈរឈ្មោះលេខរៀងទី២របស់គណបក្សភ្លើងទៀន នៅឃុំស្យា ស្រុកកណ្ដៀង និងកូនប្រុសឈ្មោះ ពឹម ដារ៉ាន់ អាយុ១៥ឆ្នាំ បានឱ្យដឹងថា កាលពីថ្ងៃទី១៣ ខែមេសា ឆ្នាំ២០២២ កូនក្ដីរបស់លោកបានបូមស្រះចាប់ត្រីនៅទីតាំងដីរបស់ខ្លួន។ លោកបន្តថា នៅថ្ងៃនោះ ស្រាប់តែសមត្ថកិច្ចខេត្តពោធិ៍សាត់ចុះចាប់ខ្លួនកូនក្ដីរបស់លោកទាំងពីរនាក់ ដោយម្នាក់មិនទាន់គ្រប់អាយុផងនោះ បញ្ជូនទៅតុលាការ ដោយចោទប្រកាន់ថា «ប្រើឧបករណ៍ឆក់ត្រីខុសច្បាប់»។
ករណីនេះ លោក សំ សុគង់ ចាត់ទុកថាជារឿងនយោបាយច្រើនជាងការអនុវត្តច្បាប់ ។
លោកមានប្រសាសន៍ថា៖ «ខ្ញុំយល់ថា ទាក់ទងនឹងរឿងនេះ ជារឿងគំរាមកំហែងបែបនយោបាយច្រើនជាងការអនុវត្តច្បាប់ ដោយសារតែអ្នកដែលត្រូវបានគេចាប់ឃុំ ត្រូវជាបេក្ខជននៅឃុំស្យា ស្រុកកណ្ដៀង ខេត្តពោធិ៍សាត់ហ្នឹង»។
លោកបន្ថែមថា៖ «ហើយទាក់ទងនឹងការប្រើប្រាស់ឧបករណ៍ ក៏ដូចជាការនេសាទត្រីនៅក្នុងត្រពាំងរបស់គាត់ ជាកម្មសិទ្ធិរបស់គាត់។ ខ្ញុំគិតថា មិនមែនជាអំពើដែលត្រូវហាមឃាត់ទេ ការនេសាទខុសច្បាប់ លុះត្រាតែវាស្ថិតនៅក្នុងតំបន់ហាមឃាត់ នៅតំបន់ដែលគេអភិរក្ស។ អ៊ីចឹងទាក់ទងនឹងការនេសាទនៅក្នុងបរិវេណផ្ទះខ្លួនឯង មិនមែនជាអំពើល្មើសខុសច្បាប់ទេ»។
អ្នកនាំពាក្យសាលាដំបូងខេត្តពោធិ៍សាត់ លោក ហេង ដូនីន សុំមិនបកស្រាយជុំវិញបញ្ហានេះឡើយ ដោយលោកថា មិនទាន់ទទួលបានព័ត៌មានគ្រប់ជ្រុងជ្រោយនៅឡើយ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត សង្កេតឃើញថា មួយរយៈកាលចុងក្រោយនេះ សមត្ថកិច្ចតែងតែធ្វើទុក្ខបុកម្នេញលើសកម្មជនគណបក្សភ្លើងទៀនជាបន្តបន្ទាប់ ដោយសារតែគណបក្សនេះហាក់មានប្រជាប្រិយភាពក្នុងការត្រៀមខ្លួនប្រកួតប្រជែងក្នុងការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់នាពេលខាងមុខនេះ។
លោកបន្តថា ពាក់ព័ន្ធនឹងការចាប់ខ្លួនបេក្ខជនគណបក្សភ្លើងទៀន និងកូនប្រុសដែលជាអនីតិជន ដោយចោទថាប្រើឧបករណ៍ឆក់ត្រីខុសច្បាប់នោះ មន្ត្រីអង្គការលីកាដូកំពុងស្រាវជ្រាវដោយយកចិត្តទុកដាក់លើបញ្ហានេះផងដែរ។
លោក សំអាត យល់ថា ប្រសិនបើការចាប់ខ្លួននោះពាក់ព័ន្ធនឹងរឿងនយោបាយច្រើនជាងការអនុវត្តច្បាប់ កម្ពុជានឹងរងការរិះគន់ពីមជ្ឈដ្ឋានជាតិនិងអន្តរជាតិ ជុំវិញបញ្ហាទាំងនេះបន្ថែមទៀត។
លោកមានប្រសាសន៍ថា៖ «កាលដែលធ្វើទុក្ខបុកម្នេញ ក៏វាអាចមានការរិះគន់ជាច្រើនទាក់ទងនឹងការបោះឆ្នោតជ្រើសរើសក្រុមប្រឹក្សាឃុំសង្កាត់ខាងមុខដែរ ដែលជាទូទៅគណបក្សនយោបាយទាំងអស់ ទាំងតូចទាំងធំ មានសិទ្ធិស្មើគ្នាក្នុងការអនុវត្តគោលនយោបាយ ឬក៏ការប្រកួតប្រជែងដោយតម្លាភាព និងស្មើភាព»៕
