សកម្មជនសង្គមម្នាក់កំពុងរត់ភៀសខ្លួនដើម្បីស្វែងរកទីសុវត្ថិភាព ក្រោយទម្លាយព័ត៌មានថាមានជនអនាមិកគំរាមសម្លាប់ប្រសិនបើនៅតែបន្តសកម្មភាពតស៊ូមតិជាថ្មីទៀត ខណៈសមត្ថកិច្ចជំរុញឱ្យភាគីដែលអះអាងថាជាជនរងគ្រោះដាក់បណ្ដឹងប្រឆាំងការគំរាមកំហែងនេះ បើពិតជាមានករណីបែបនេះកើតឡើងមែន។
អ្នកស្រី សាត ផា ជាអតីតសកម្មជនដីធ្លីតំបន់បឹងកក់ និងតស៊ូមតិម្នាក់ ដែលគេតែងសង្កេតឃើញអ្នកស្រីចុះធ្វើបាតុកម្មឬតវ៉ាទាមទារយុត្តិធម៌សង្គមស្ទើរគ្រប់ទីកន្លែងនោះ នៅពេលនេះកំពុងរត់ភៀសខ្លួន។ តាមរយៈសារដែលអ្នកស្រីបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី១៧ ខែមេសា ហើយវីអូឌីទទួលបាននៅថ្ងៃទី១៩ ខែមេសានេះ ឱ្យដឹងថា អ្នកស្រីត្រូវបង្ខំចិត្តចាកចេញពីប្រទេស ប្រសិនបើបន្តនៅទៀត នឹងត្រូវគេសម្លាប់មិនខាន។
ប្រភពបន្តថា ការភៀសខ្លួននេះ ដោយសារមានជនមិនស្គាល់អត្តសញ្ញាណគំរាមសម្លាប់តាមទូរសព្ទ។ ជាងនេះទៀត អ្នកស្រីបញ្ជាក់ថា អ្នកដែលគំរាមកំហែងថានឹងសម្លាប់នេះ ក៏បានសរសេរអក្សរដោយដៃមួយឃ្លាហើយបិទជាប់ជញ្ជាំង ដែលមានអត្ថន័យថា «ប្រសិនបើនៅតែខ្លាំងទៀត ប្រយ័ត្នបាត់ខ្លួន»។
ឆ្លើយតបរឿងនេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ឱ្យដឹងថា ប្រសិនបើពិតជាមានរូបភាពនៃការគំរាមកំហែងដូច្នេះមែន លោកជំរុញឱ្យភាគីពាក់ព័ន្ធដែលអះអាងថាជាជនរងគ្រោះ ដាក់ពាក្យបណ្ដឹងទៅនគរបាលយុត្តិធម៌។
លោកបន្តថា ការអនុវត្តនីតិវិធីបែបនេះ សមត្ថកិច្ចនឹងអាចជួយបានច្រើន ក្នុងការស្វែងរកអ្នកគំរាមកំហែង។ ប៉ុន្តែបើតាមលោក សុខសីហា ខ្លាចតែរឿងខ្លះ ជនរងគ្រោះប្រតិដ្ឋរឿងឡើងនាំឱ្យតែមានបញ្ហា ដើម្បីហេតុផលអ្វីមួយតែប៉ុណ្ណោះ។
លោកបន្តថា៖ «បើសិនជាមានករណីហ្នឹងកើតឡើង មូលហេតុអីបានបុគ្គលគាត់ផ្ទាល់ ហេតុអីមិនទៅដាក់ពាក្យបណ្ដឹងនៅទីតាំងដែលមានសមត្ថកិច្ចមានគ្រប់កន្លែង? ការដាក់បណ្ដឹងនេះអាចដាក់នៅប៉ុស្តិ៍នគរបាលរដ្ឋ និងអធិការខណ្ឌជាដើម ហើយបែរជាគាត់ទៅស្រែកឡូងៗថាមានករណីនេះ មានករណីនោះ។ បើពិតជាមានករណីបែបនេះមែន ដាក់ពាក្យបណ្ដឹងទៅ ប្រទេសយើងមានច្បាប់ ហើយសមត្ថកិច្ចយើងមានជំនាញស៊ើបតើ! ឱ្យតែថាមានភស្តុតាងច្បាស់លាស់ យើងធ្វើការស្រាវជ្រាវដឹង យើងនឹងអនុវត្តតាមវិធានការច្បាប់ជូនគាត់»។
អ្នកនាំពាក្យរូបនេះបញ្ជាក់ថា នគរបាលយុត្តិធម៌ពិតជាមានជំនាញ ដែលអាចឈានទៅកំណត់អត្តសញ្ញាណបុគ្គលដែលគំរាមកំហែង។ បើទោះបែបណា លោកដាក់ការសង្ស័យថា អង្គហេតុនេះវាអាចជារឿងមិនពិត ហើយបង្កើតឱ្យមានចលាចលសង្គម ដើម្បីដាក់បន្ទុកចំពោះសមត្ថកិច្ចថាគ្មានសមត្ថភាពក្នុងការស្វែងរកយុត្តិធម៌សម្រាប់ជនរងគ្រោះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត យល់ឃើញថា បើទោះជារឿងនេះពិតឬមិនពិត នគរបាលយុត្តិធម៌គួរបើកការស៊ើបអង្កេត ដើម្បីជម្រះមន្ទិលសង្ស័យ និងបញ្ចៀសការរិះគន់។
លោកបន្តថា ដោយសារកន្លងទៅ មានការគំរាមកំហែងច្រើនករណីទៅលើសកម្មជននយោបាយ យុវជនបរិស្ថាន និងក្រុមអ្នកការពារសិទ្ធិមនុស្សជាដើម តែលទ្ធផលដែលផ្ដើមចេញពីការស៊ើបអង្កេតដោយសមត្ថកិច្ច មិនមានភាពជឿនលឿន និងមិនអាចជឿទុកចិត្តបាន។ ក្នុងន័យនេះ ទើបជំរុញឱ្យអ្នកដែលពាក់ព័ន្ធបោះបង់ការស្វែងរកយុត្តិធម៌សង្គមពីសមត្ថកិច្ចឬភាគីរដ្ឋាភិបាល។
លោកបន្តថា៖ «យើងជាអង្គការសង្គមស៊ីវិល យើងទទូចឱ្យអាជ្ញាធរដែលជាសមត្ថកិច្ចហ្នឹងបើកការស្រាវជ្រាវនិងស៊ើបអង្កេតទៅលើករណីហ្នឹងឱ្យបានច្បាស់លាស់និងការពិត កុំឱ្យមានការរិះគន់បន្ថែមទៀត ទាក់ទងនឹងការរើសអើងនិន្នាការនយោបាយ ឬក៏កន្លងមកយើងឃើញថា អតីតសកម្មជនគណបក្សប្រឆាំងមួយចំនួនគេលួចវាយ គេលួចធ្វើទុក្ខបុកម្នេញ ប៉ុន្តែមកទល់ឥលូវរកជនដែលបង្កមិនឃើញ ដើម្បីយកមកផ្ដន្ទាទោសអីជាដើម»។
វីអូឌី មិនអាចស្វែងរកក្រុមគ្រួសាររបស់អ្នកស្រី សាត ផា ដើម្បីសួរនាំបន្ថែមបានទេ ពាក់ព័ន្ធការគំរាមកំហែងនេះ។ ប៉ុន្តែស្រ្តីម្នាក់ដែលអះអាងថាធ្លាប់ស្គាល់សកម្មជនសង្គមរូបនេះ គឺអ្នកស្រី ផាត សាត ឱ្យដឹងថា អ្នកស្រីមិនដែលឃើញអ្នកស្រី សាត ផា មានសាច់ញាតិឬកូនចៅទេ។
ដោយឡែក អ្នកស្រី សាត ផា បានប្រាប់ វីអូឌី នៅរសៀលថ្ងៃអង្គារនេះ តាមបណ្ដាញសង្គមហ្វេសប៊ុកថា ពេលនេះអ្នកស្រីបានភៀសខ្លួនទៅដល់ទីតាំងដែលមានសុវត្ថិភាពហើយ។
មួយរយៈពេលចុងក្រោយនេះ គេសង្កេតឃើញថា អ្នកតស៊ូមតិរូបនេះតែងធ្វើបាតុកម្មឬចេញតវ៉ាជាបន្តបន្ទាប់នៅខាងមុខសាលាដំបូងរាជធានីភ្នំពេញ ជាមួយនឹងកញ្ញា សេង ធារី។ មានរូបប្លែកៗជាច្រើនទម្រង់ដែលអ្នកតស៊ូមតិរូបនេះប្រើប្រាស់ ដូចជា ស្លៀកខោអាវបែបចិនបុរាណ ពេលខ្លះកោរសក់ និងស្លៀកសពាក់ស ជាដើម។ សកម្មជនសង្គមដែលមានវ័យ៥០ឆ្នាំ អ្នកស្រី សាត ផា ក៏ធ្លាប់ត្រូវបានតុលាការផ្ដន្ទាទោសដាក់ពន្ធនាគារ១ឆ្នាំ កាលពីឆ្នាំ២០២០ ពីបទ «ញុះញង់បង្កឱ្យមាភាពវឹកវរធ្ងន់ធ្ងរដល់សន្តិសុខសង្គម» ក្រោយពេលអ្នកស្រីបានចូលរួមតវ៉ាជាមួយក្រុមស្ត្រីផ្សេងទៀតនៅមុខស្ថានទូតចិនប្រចាំនៅកម្ពុជា ប៉ុន្តែត្រូវបានតុលាការដោះលែងឱ្យនៅក្រៅឃុំវិញ កាលពីថ្ងៃទី២៨ ខែតុលា ឆ្នាំ២០២១៕