ស្ថាបនិកគណបក្សបេះដូងជាតិ លោក សៀម ភ្លុក កំពុងស្ថិតនៅកន្លែងមានសុវត្ថិភាព ខណៈអាជ្ញាធរកំពុងស្វែងរកចាប់ខ្លួនតាមដីកាតុលាការ។
មេធាវីការពារក្ដីឱ្យលោក សៀម ភ្លុក គឺលោក សំ សុគង់ បានប្រាប់វីអូឌីកាលពីថ្ងៃចន្ទថា បច្ចុប្បន្នកូនក្ដីរបស់លោកកំពុងស្ថិតនៅកន្លែងមានសុវត្ថិភាព។ ប៉ុន្តែលោកមេធាវីមិនបញ្ជាក់ថានៅទីណានោះទេ។
លោកថា៖ «បើយោងតាមខ្លឹមសារនៃដីកាឱ្យនាំខ្លួនហ្នឹង គឺត្រឹមថ្ងៃទី២៥ ចូលដល់ថ្ងៃទី២៦ ដីកាហ្នឹងអស់សុពលភាពហើយ។ អ៊ីចឹងបើចង់នាំខ្លួនអី ទាល់តែចេញដីកាមួយថ្មី។ អ៊ីចឹងហើយបានជាខ្ញុំបានទាក់ទងជាមួយកូនក្ដី ហើយកូនក្ដីក៏ប្រកាសជំហរដែលថា ខ្លួនមិនមានបំណងអ្វីគេចវេះទេ គាត់នឹងចូលទៅបំភ្លឺ ប៉ុន្តែមិនទាន់ដឹងថាថ្ងៃណាច្បាស់លាស់ ដោយសារគាត់មានរវល់ការងារផ្ទាល់ខ្លួនរបស់គាត់»។
ចៅក្រមសាលាដំបូងរាជធានីភ្នំពេញ លោក លិ សុខា បានបង្គាប់កាលពីថ្ងៃទី៤ ខែមេសា ឆ្នាំ២០២២ ឱ្យកងកម្លាំងមានសមត្ថកិច្ចនាំខ្លួនតំណាងស្ថាបនិកគណបក្សបេះដូងជាតិ លោក សៀម ភ្លុក ឱ្យចូលខ្លួនទៅឆ្លើយបំភ្លឺឱ្យបានមុនថ្ងៃទី២៥ ខែមេសា ឆ្នាំ២០២២ ពាក់ព័ន្ធនឹងបទចោទ «ក្លែងបន្លំ និងប្រើប្រាស់លិខិតក្លែង» ក្នុងការបង្កើតគណបក្សបេះដូងជាតិ ដើម្បីធានាដល់ការស៊ើបសួរឱ្យបានពេញលេញនៅចំពោះមុខចៅក្រមស៊ើបសួរ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា អាជ្ញាធរកំពុងស្វែងរកការនាំខ្លួនលោក សៀម ភ្លុក ខណៈមានព័ត៌មានថា លោក សៀម ភ្លុក កំពុងគេចខ្លួន។
លោកថា៖ «ទាក់ទងបញ្ហារឿងអនុវត្តតាមដីកា ឱ្យតែមានដីកា ក្នុងនាមជាមន្ត្រីនគរបាលយុត្តិធម៌ មន្ត្រីអនុវត្តច្បាប់ គឺយើងត្រូវតែអនុវត្តតាមហ្នឹងហើយ គ្រាន់តែថារហូតមកដល់ពេលនេះ យើងអត់ទាន់បានរកឃើញ [លោក សៀម ភ្លុក] នៅឡើយទេ»។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព យល់ថា អាជ្ញាធរគួរតែធ្វើការដោយឈរលើកត្តាគតិយុត្ត ដោយមិនគួរដៅទៅលើមុខសញ្ញាណាមួយ ដោយគ្រាន់តែមាននិន្នាការនយោបាយខុសគ្នានោះទេ។
លោកស្រីថា៖ «ដូចខ្ញុំបានលើកអ៊ីចឹង អាជ្ញាធរគួរតែធ្វើការពិនិត្យដោយឈរលើគតិយុត្ត មិនគួរមានការដៅមុខសញ្ញាដោយសារមាននិន្នាការនយោបាយខុសគ្នា ឬដោយសារពួកគាត់មិនមែនជាមន្ត្រីនៅក្នុងគណបក្សកាន់អំណាច»។
លោក សៀម ភ្លុក ត្រូវបានសាលាដំបូងរាជធានីភ្នំពេញចេញដីកាកោះហៅឱ្យចូលខ្លួនទៅឆ្លើយបំភ្លឺនៅសាលាដំបូងរាជធានីភ្នំពេញម្ដងរួចមកហើយ កាលពីថ្ងៃទី២២ ខែមីនា ឆ្នាំ២០២២ ពាក់ព័ន្ធនឹងរឿងក្លែងបន្លំស្នាមមេដៃសមាជិកដើម្បីបង្កើតគណបក្សនយោបាយ។ ប៉ុន្តែនៅថ្ងៃទី២២ ខែមីនានោះ លោកមិនបានចូលទៅបំភ្លឺទេ ដោយសារមិនបានទទួលដីកាពីតុលាការ។
គណបក្សបេះដូងជាតិ ដែលគេសង្ស័យថាមានលោក សម រង្ស៊ី ស្ថិតនៅពីក្រោយនៃការបង្កើតគណបក្សនេះ ត្រូវបានក្រសួងមហាផ្ទៃចោទប្រកាន់ថា បាន «ក្លែងស្នាមមេដៃ និងមានចេតនាទុច្ចរិត»។ កាលពីថ្ងៃទី១៦ ខែវិច្ឆិកា ឆ្នាំ២០២១ ក្រសួងមហាផ្ទៃបានបដិសេធសំណើសុំចុះឈ្មោះក្នុងបញ្ជីបង្កើតគណបក្សនយោបាយរបស់ស្ថាបនិកគណបក្សបេះដូងជាតិរូបនេះ។ ដោយមិនសុខចិត្តទៅនឹងការសម្រេចនេះ នៅថ្ងៃទី២៦ ខែវិច្ឆិកា ឆ្នាំ២០២១ លោក សៀម ភ្លុក ក៏បានដាក់ពាក្យបណ្ដឹងទៅតុលាការកំពូល ដើម្បីតវ៉ា ប៉ុន្តែបណ្ដឹងប្រឆាំងនឹងសេចក្ដឹសម្រេចនេះត្រូវបានតុលាការកំពូលសម្រេចច្រានចោលនៅចុងឆ្នាំ២០២១៕
