សេចក្ដីថ្លែងការណ៍មួយរបស់ក្រសួងការបរទេសកាណាដា បានឱ្យដឹងថា ប្រទេសរបស់ខ្លួននៅថ្ងៃអង្គារនេះ បានសម្រេចដាក់ទណ្ឌកម្មមួយចំនួនលើបុគ្គលរុស្ស៊ីចំនួន១៤រូប ដែលក្នុងនោះគេសង្កេតឃើញថាមានកូនស្រី២នាក់របស់លោកប្រធានាធិបតី វ្លាឌីមៀរ ពូទីន ផងដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ក្រៅពីប្រទេសកាណាដា សហរដ្ឋអាមេរិក និងចក្រភពអង់គ្លេស កាលពីដើមខែនេះ ក៏ធ្លាប់បានប្រកាសដាក់ទណ្ឌកម្មលើកូនស្រីរបស់លោក ពូទីន ទាំង២រូបគឺ Katerina Vladimirovna Tikhonova និង Maria Vladimirovna Vorontsova ផងដែរ។
ការប្រកាសដាក់ទណ្ឌកម្មនេះត្រូវបានធ្វើឡើង ខណៈដែលពួកគេរកឃើញថា កូនស្រីទាំង២រូបរបស់លោក ពូទីន អាចនឹងកំពុងលាក់បាំងទ្រព្យសម្បត្តិឪពុករបស់ខ្លួន។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះក៏បានធ្វើឱ្យបណ្ដាប្រទេសមួយចំនួននៅលើពិភពលោកសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ីផងដែរ ទាក់ទិននឹងករណីនេះ៕