រាជរដ្ឋាភិបាលបានសម្រេចចេញអនុក្រឹត្យ ស្ដីពីការរៀបចំនិងការប្រព្រឹត្ដទៅរបស់គណៈកម្មាធិការរដ្ឋាភិបាលឌីជីថល ដោយថា ដើម្បីធានានូវប្រសិទ្ធភាពនៃការបំពេញមុខងារជួយដល់ក្រុមប្រឹក្សាជាតិសេដ្ឋកិច្ច និងសង្គមឌីជីថល។
នាយករដ្ឋមន្ត្រី ហ៊ុន សែន នៅថ្ងៃទី២០ ខែមេសា ឆ្នាំ២០២២ បានសម្រេចចេញអនុក្រឹត្យ ស្ដីពីការរៀបចំ និងការប្រព្រឹត្តទៅរបស់គណៈកម្មាធិការរដ្ឋាភិបាលឌីជីថល ដែលសរសេរជាអក្សរកាត់ថា «គ.រ.ឌ.»។ ការបង្កើតគណៈកម្មាធិការនេះឡើង ដើម្បីធានានូវប្រសិទ្ធភាព និងប្រសិទ្ធផលនៃការបំពេញមុខងារជាសេនាធិការជូនក្រុមប្រឹក្សាជាតិសេដ្ឋកិច្ច និងសង្គមឌីជីថល លើការងារបច្ចេកទេស និងគោលនយោបាយនៅក្នុងការដឹកនាំ សម្របសម្រួល និងជំរុញការកសាងរដ្ឋាភិបាលឌីជីថលនៅកម្ពុជា។
អនុក្រឹត្យដដែលបន្ថែមថា គ.រ.ឌ. មានតួនាទីក្នុងការជំរុញការរៀបចំទិន្នន័យគោល (Base Registry) និងការចែករំលែកទិន្នន័យរវាងក្រសួងស្ថាប័ន និងវិស័យឯកជន សំដៅជំរុញល្បឿននៃការកសាងមូលដ្ឋាន ការចាប់យក និងការធ្វើបរិវត្តកម្មរដ្ឋាភិបាលឌីជីថល។
បន្ថែមពីនេះ គ.រ.ឌ. មានភារកិច្ចបង្កើតកិច្ចសហប្រតិបត្តិការក្នុងប្រទេសនិងអន្តរជាតិ លើការកសាងរដ្ឋាភិបាលឌីជីថល ក៏ដូចជាជំរុញ សម្របសម្រួល និងគាំទ្រការចូលរួមកសាងរដ្ឋាភិបាលឌីជីថលពីគ្រប់មជ្ឈដ្ឋាន ដើម្បីសម្រេចចក្ខុវិស័យគោលបំណង និងគោលដៅជាយុទ្ធសាស្រ្តនៃគោលនយោបាយរដ្ឋាភិបាលឌីជីថល ជាដើម។
ប្រភពដដែលបន្ថែមថា សម្រាប់ការចំណាយសម្រាប់ដំណើរការការងាររបស់ គ.រ.ឌ. ត្រូវផ្គត់ផ្គង់ដោយថវិកាជាតិ ក្នុងគម្រោងថវិកាកម្មវិធីរបស់ក្រសួងប្រៃសណីយ៍ និងទូរគមនាគមន៍។
រដ្ឋាភិបាលក៏បានសម្រេចតែងតាំងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ ជាប្រធានគណៈកម្មាធិការរដ្ឋាភិបាលឌីជីថល។ រីឯសមាសភាពរបស់ គ.រ.ឌ. ជាអនុប្រធាន និងសមាជិក គឺមានមកពីតាមបណ្ដាក្រសួងពាក់ព័ន្ធរាប់សិបនាក់ផ្សេងទៀត៕