ស្ថាបនិកគណបក្សបេះដូងជាតិ លោក សៀម ភ្លុក ប្រកាសថា លោកនឹងចូលខ្លួនទៅឆ្លើយបំភ្លឺតាមការកោះហៅរបស់តុលាការ ដោយមិនមានចេតនាចង់គេចវេះនោះឡើយ។
ការប្រកាសនេះបានធ្វើឡើងតាមរយៈសេចក្ដីប្រកាសព័ត៌មានមួយដែលផ្សព្វផ្សាយតាមរយៈគណនីហ្វេសប៊ុករបស់លោកនៅព្រឹកថ្ងៃទី២០ ខែមេសានេះ និងក្រោយពីមានការផ្សព្វផ្សាយថា លោកកំពុងគេចខ្លួន។
ប៉ុន្តែលោក សៀម ភ្លុក បានច្រានចោលចំពោះព័ត៌មាននៃការគេចខ្លួនរបស់លោក ដោយថា លោកមិនមានចេតនាគេចវេះពីការទទួលខុសត្រូវ ដូចការផ្សព្វផ្សាយពាក្យចចាមអារ៉ាមតាមបណ្ដាញសង្គមនិងសារព័ត៌មានខ្លះនោះឡើយ។
លោកបានសរសេរថា៖ «ខ្ញុំបាទសូមប្រកាសជាសាធារណៈថា នឹងចូលខ្លួនបំភ្លឺការពិតចំពោះមុខចៅក្រមស៊ើបសួរ បន្ទាប់ពីបានពឹងពាក់មេធាវី និងទទួលបានឯកសារពាក់ព័ន្ធសំណុំរឿងពីតុលាការរួចរាល់»។
កាលពីថ្ងៃទី៤ ខែមេសា ឆ្នាំ២០២២ ចៅក្រមសាលាដំបូងរាជធានីភ្នំពេញ លោក លិ សុខា បានចេញដីកាបង្គាប់ឱ្យកងកម្លាំងមានសមត្ថកិច្ចនាំខ្លួនតំណាងស្ថាបនិកគណបក្សបេះដូងជាតិ លោក សៀម ភ្លុក ឱ្យចូលខ្លួនឆ្លើយបំភ្លឺនៅសាលាដំបូងរាជធានីភ្នំពេញ ឱ្យបានមុនថ្ងៃទី២៥ ខែមេសា ឆ្នាំ២០២២។ ការចូលបំភ្លឺនោះពាក់ព័ន្ធនឹងបទចោទ «ក្លែងបន្លំ និងប្រើប្រាស់លិខិតក្លែង» ក្នុងការបង្កើតគណបក្សបេះដូងជាតិ ដើម្បីធានាដល់ការស៊ើបសួរឱ្យបានពេញលេញនៅចំពោះមុខចៅក្រមស៊ើបសួរ។
លោក សៀម ភ្លុក ត្រូវបានសាលាដំបូងរាជធានីភ្នំពេញចេញដីកាកោះហៅឱ្យចូលខ្លួនទៅឆ្លើយបំភ្លឺនៅសាលាដំបូងរាជធានីភ្នំពេញម្ដងរួចមកហើយ កាលពីថ្ងៃទី២២ ខែមីនា ឆ្នាំ២០២២ ពាក់ព័ន្ធនឹងរឿងក្លែងបន្លំស្នាមមេដៃសមាជិកដើម្បីបង្កើតគណបក្សនយោបាយ។ ប៉ុន្តែនៅថ្ងៃទី២២ ខែមីនានោះ លោកមិនបានចូលទៅបំភ្លឺទេ ដោយសារមិនបានទទួលដីកាពីតុលាការ៕