ក្រសួងធនធានទឹក និងឧតុនិយម បានឱ្យដឹងថា វត្តមានកូនរដូវប្រាំងក្នុងរដូវវស្សាដែលកម្ពុជាធ្លាប់មានរាល់ឆ្នាំ អាចនឹងមិនមានទេក្នុងឆ្នាំ២០២២នេះ។
សេចក្ដីជូនដំណឹងរបស់ក្រសួងធនធានទឹកកាលពីថ្ងៃអង្គារ ស្ដីពីការព្យាករអាកាសធាតុលើកទី២ សម្រាប់ឆ្នាំ២០២២ ដោយយោងតាមបាតុភូតសកល ស្ដីពីស្ថានភាពសីតុណ្ហភាពលើផ្ទៃមហាសមុទ្រប៉ាស៊ីហ្វិក បញ្ជាក់ថា ចាប់ខែឧសភា រហូតដល់ខែកក្កដា កម្ពុជានឹងទទួលរងបាតុភូត Neutral ដែលជាបាតុភូតអន្ដរកាលចន្លោះរវាងបាតុភូត El Nino (ក្ដៅ) ៦០% និងបាតុភូត La Nina (ត្រដាក់) ៤០%។
ដោយឡែក ចាប់ពីខែកញ្ញា ដល់ខែធ្នូ កម្ពុជានឹងទទួលរងបាតុភូត Neutral ៦០%, បាតុភូត La Nina ៣០% និងបាតុភូត El Nino ១០%។
សេចក្ដីជូនដំណឹងដដែលបង្ហាញថា ដើមរដូវវស្សានឹងចាប់ផ្ដើមនៅសប្ដាហ៍ទី១ ខែឧសភា ជាមួយបរិមាណទឹកភ្លៀងពីមធ្យមទៅច្រើន និងអាចខ្ពស់ជាងមធ្យមភាគច្រើនឆ្នាំ ហើយរបាយទឹកភ្លៀងធ្លាក់រាយប៉ាយបានល្អ ប៉ុន្តែអាចមានភ្លៀងលាយឡំផ្គរ រន្ទះ និងខ្យល់កួចរយៈពេលខ្លី កើតមានច្រើនផងដែរ។
ជាមួយគ្នានេះ វត្តមានកូនរដូវប្រាំងក្នុងរដូវវស្សា ដែលស្ថិតនៅក្នុងខែកក្កដា សម្រាប់នៅឆ្នាំនេះ អាចនឹងមិនមាននោះទេ។
សេចក្ដីជូនដំណឹងបន្តថា៖ «ក្នុងរដូវវស្សានៅឆ្នាំ២០២២នេះ អាចនឹងមិនមានកូនរដូវប្រាំងនោះទេ ប៉ុន្តែបរិមាណទឹកភ្លៀងអាចមានសភាពថមថយខ្លះ [អំឡុងចុងខែកក្កដា ឬដើមខែសីហា] តែក្នុងរយៈពេលខ្លីប៉ុណ្ណោះ»។
ប្រភពដដែលបន្តថា ពាក់កណ្ដាលរដូវវស្សា ចាប់ពីខែសីហា ដល់ខែតុលា ភ្លៀងនឹងអាចធ្លាក់រាយប៉ាយល្អនៅផ្ទៃប្រទេស ក្នុងបរិមាណទឹកភ្លៀងពីបង្គួរទៅច្រើន។ នៅពាក់កណ្ដាលរដូវវស្សានេះនឹងអាចមានភ្លៀងលាយឡំផ្គរ រន្ទះ និងបណ្ដុំខ្យល់កួច បន្ដកើតមានច្រើនក្នុងខេត្តមួយចំនួន ហើយមានភូមិសាស្រ្តជាប់តំបន់ភ្នំ និងទីទំនាបជាប់ផ្លូវទឹក ប្រឈមខ្ពស់នឹងជំនន់ទឹកភ្លៀង។
ក្រសួងបញ្ជាក់ថា ចុងរដូវវស្សានឹងបញ្ចប់នៅចុងខែវិច្ឆិកា ជាមួយបរិមាណទឹកភ្លៀងពីមធ្យមទៅបង្គួរ ហើយក៏អាចមានផ្គរ រន្ទះ ខ្យល់កន្ត្រាក់ លាយឡំជាមួយក្នុងកម្រិតមធ្សមផងដែរ៕