មន្ត្រីជាន់ខ្ពស់ក្រសួងយុត្តិធម៌ អះអាងថា ក្រសួងនឹងតាមដានចំពោះមន្ត្រីក្របខណ្ឌប្រព័ន្ធយុត្តិធម៌ចាប់តាំងពីឆ្នាំ២០២២តទៅ ក្រោយរកឃើញថាមានមន្ត្រីខ្លះទៅធ្វើការតែ១ថ្ងៃក្នុង១ខែ ហើយមន្ត្រីខ្លះទៀតរហូតដល់កន្លះឆ្នាំមិនទាន់ទៅកន្លែងធ្វើការម្ដងផងក៏មាន។
ក្នុងសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងយុត្តិធម៌ កាលពីថ្ងៃ១២ ខែមេសា ឆ្នាំ២០២២ រដ្ឋមន្រ្តីក្រសួងយុត្តិធម៌ លោក កើត រិទ្ធ បានទម្លាយថា មានមន្រ្តីខ្លះទៅធ្វើការតែ១ថ្ងៃក្នុង១ខែ និងខ្លះទៀត កន្លះឆ្នាំមិនទាន់ទៅកន្លែងធ្វើការម្ដងផង។ ករណីនេះ លោកបានព្រមានចាត់វិធានការច្បាប់លើមន្ត្រីទាំងនោះ ដោយថា ដើម្បីពង្រឹងវិស័យយុត្តិធម៌នៅកម្ពុជាឡើងវិញ។
លោកក៏បានចាត់តាំងរដ្ឋលេខាធិការក្រសួងយុត្តិធម៌ លោក ជិន ម៉ាលីន និងលោក ផូវ សំភី អគ្គនាយកកិច្ចការរដ្ឋបាលតុលាការនៃក្រសួងយុត្តិធម៌ ត្រូវត្រួតពិនិត្យ និងស្រង់វត្តមានរបស់មន្រ្តីក្នុងប្រព័ន្ធយុត្តិធម៌ទាំងអស់ជាប់ជានិច្ច ដើម្បីដឹងច្បាស់ថា អ្នកណាខ្លះទៅបំពេញការងារ ហើយអ្នកណាខ្លះ មិនទៅបំពេញការងារ។
លោក កើត រិទ្ធ បញ្ជាក់ថា មិនមែនតែព្រះរាជអាជ្ញា និងចៅក្រមនោះទេ ប៉ុន្តែមន្រ្តីផ្សេងទៀតក្នុងប្រព័ន្ធយុត្តិធម៌ ក៏ត្រូវត្រួតពិនិត្យ និងត្រូវស្រង់វត្តមានដែរ។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់វីអូឌីតាមប្រព័ន្ធតេឡេក្រាមថា ការពង្រឹងវិន័យ ក្រសួងបានធ្វើរួចហើយ ដោយមន្ត្រីខ្លះ លោកថា បានទទួលទណ្ឌកម្មពាក់ព័ន្ធនឹងការមិនគោរពវិន័យនេះ ប៉ុន្តែចំពោះទណ្ឌកម្មបែបណា ហើយមានមន្ត្រីប៉ុន្មាននាក់ដែលទទួលទណ្ឌកម្មផ្នែកវិន័យនោះ លោកសុំមិនធ្វើអត្ថាធិប្បាយឡើយ។
លោលថា៖ «យើងនឹងបន្តធ្វើការងារនេះបន្តទៀត ក៏ប៉ុន្តែលទ្ធផលប៉ុន្មាននាក់ដែលប្រព្រឹត្តកំហុសវិន័យ ហើយទណ្ឌកម្មបែបណាៗ គឺយើងមិនផ្សព្វផ្សាយទេ ដើម្បីរក្សាមុខមាត់ កិត្តិយសរបស់មន្ត្រី ទុកឱកាសឱ្យគេធ្វើការកែប្រែខ្លួន។ ក្រុមការងារនឹងធ្វើការហ្នឹងបន្តទៀត ពាក់ព័ន្ធនឹងការតាមដាន ការអនុវត្តវិន័យរបស់មន្ត្រី ហើយនិងយន្តការទណ្ឌកម្មផ្នែកវិន័យដែលត្រូវសម្រេចចំពោះកំហុសអ្នកដែលប្រព្រឹត្តកំហុសផ្នែកវិន័យ»។
ប្រធានមជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្តិភាព លោក យង់ គិមអេង សង្កេតឃើញថា បញ្ហានេះបានកើតឡើងយូរណាស់មកហើយ ប៉ុន្តែរដ្ឋាភិបាលមិនអាចដោះស្រាយបាន។ មូលហេតុដោះស្រាយមិនបាន លោកថា ដោយសារការជ្រើសរើសមន្ត្រីចូលបម្រើការងារ ពាក់ព័ន្ធនឹងអំពើពុករលួយ និងការដាក់បញ្ជូនសែស្រឡាយ រួមទាំងបក្ខពួកនិយម ជាដើម។
លោកបន្តថា រដ្ឋាភិបាលពិបាកនឹងធ្វើកំណែទម្រង់ ដោយសារតែនៅក្រសួងឬស្ថាប័នខ្លះមានទាំងឪពុក មានទាំងកូន និងសាច់ញាតិផងដែរ។ លោកថា ករណីនេះហើយដែលធ្វើឱ្យពិបាកក្នុងការពង្រឹងផ្នែកវិន័យ ហើយថែមទាំងឱ្យពួកគេចរួចផុតពីទណ្ឌកម្មទៀតផង។
លោក យង់ គិមអេង បន្តថា នៅពេលមន្ត្រីរាជការមិនទៅធ្វើការផង ប៉ុន្តែបើកប្រាក់ខែធម្មតានេះ ជាបញ្ហាប្រឈមធំមួយក្នុងការផ្ដល់សេវាសាធារណៈជាក់លាក់ និងមានគុណភាពទៅដល់ប្រជាពលរដ្ឋ ជាពិសេសការផ្ដល់សេវាយុត្តិធម៌ជូនពលរដ្ឋ។
លោកថា៖ «ធ្វើឱ្យយឺតយ៉ាវក្នុងការផ្ដល់យុត្តិធម៌ដល់ប្រជាពលរដ្ឋ។ ជាមួយគ្នានោះទៀតសោត ក៏យើងឃើញថា អ្នកដែលនៅក្នុងស្ថាប័នទាំងអស់ហ្នឹង មិនថាស្ថាប័នយុត្តិធម៌ឬក៏ក្រសួងផ្សេងទៀតទេ យើងឃើញថាបញ្ហានៅមានអំពើពុករលួយនៅក្នុងការជ្រើសរើសមន្ត្រី ក្នុងការដំឡើងតួនាទី បុណ្យសក្តិដោយមន្ត្រី នៅតែមាន! នៅតែមានហ្នឹងហើយ គឺអ្នកដែលចូលមកតាមសែស្រឡាយ អ្នកចូលមកតាមអំពើពុករលួយ គឺអត់សូវបានគោរពបទបញ្ជាផ្ទៃក្នុង វិស័យរបស់ក្រសួងអីទេ ព្រោះគាត់អាងអ្នកការពាររបស់គាត់រឹងមាំហើយ។ ដល់អ៊ីចឹង ដែលធ្វើឱ្យពួកគាត់រួចផុតពីទណ្ឌកម្ម»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ចាត់ទុកករណីនេះថា ឆ្លុះបញ្ចាំងពីការមិនទទួលខុសត្រូវរបស់មន្ត្រី បើទោះបីជាមន្ត្រីទាំងនោះ ទទួលបានប្រាក់បៀវត្ស និងផលប្រយោជន៍ផ្សេងៗពីថវិការបស់ជាតិ ដែលបង់ពន្ធដោយប្រជាពលរដ្ឋ ប៉ុន្តែមិនបានបម្រើសេវាជូនពលរដ្ឋឡើយ។
លោកបន្តថា ក្រសួងត្រូវពង្រឹងការតាមដានលើមន្ត្រីរបស់ខ្លួនបន្ថែមទៀត អំឡុងពេលពួកគេបំពេញការងារក្នុងប្រព័ន្ធយុត្តិធម៌។ លោកថា ប្រសិនបើមន្ត្រីទាំងនោះមិនបានបំពេញការងារត្រឹមត្រូវតាមច្បាប់ទេ ក្រសួងគួរតែបញ្ឈប់ឬជម្រុះចេញ ដោយផ្ដល់ប្រាក់បៀវត្សលើកទឹកចិត្តដល់មន្ត្រីផ្សេងទៀតដែលសកម្មវិញ។
លោកបញ្ជាក់ថា បើបញ្ហានេះមិនត្រូវបានដោះស្រាយទេ នឹងជះឥទ្ធិពលអាក្រក់ដល់សង្គមកាន់តែខ្លាំង ព្រមទាំងខាតបង់ថវិកាជាតិថែមទៀតផង។
លោកថា៖ «ស្ថាប័នសាធារណៈ គឺត្រូវដើរតួនាទីក្នុងការពង្រឹងបរិយាកាសវិនិយោគ បរិយាកាសនៃការផ្ដល់សេវាឱ្យសមស្រប សម្រាប់ជំរុញសេវាក្នុងស្រុក សេវាអ្នករកស៊ី បម្រើប្រជាពលរដ្ឋផង ហើយជំរុញសេវាវិនិយោគផង។ អ៊ីចឹង បើសិនជាយើងមិនធ្វើការឱ្យទាន់ពេលវេលា ឱ្យមានប្រសិទ្ធភាព ហើយឱ្យមានប្រសិទ្ធផលទេ ខ្ញុំគិតថាយើងអត់អាចដើរទាន់គេទេ។ អ៊ីចឹងយើងអាចនឹងប៉ះពាល់ការលូតលាស់សឹងគ្រប់វិស័យ ជាពិសេសវិស័យសុខាភិបាល អប់រំជាដើម ដែលជាវិស័យចាំបាច់សម្រាប់ពលរដ្ឋហ្នឹង»៕
