ប្រធានាធិបតីរុស្សី លោក វ្លាឌីមៀរ ពូទីន នៅថ្ងៃព្រហស្បតិ៍ម្សិលមិញ បានប្រកាសពីជ័យជម្នះនៅក្នុងសមរភូមិដ៏ធំមួយនៃសង្រ្គាមឈ្លានពានអ៊ុយក្រែន ខណៈពួកគេលើកឡើងពីការដណ្ដើមយកបានទីក្រុងកំពង់ផែ ម៉ារីយូប៉ូល (Mariupol) មកគ្រប់គ្រង។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
គួរបញ្ជាក់ថា នៅក្នុងកិច្ចប្រជុំមួយនៅវិមានក្រឹមឡាំង លោកប្រធានាធិបតី វ្លាឌីមៀរ ពូទីន បានអបអរសាទរដល់រដ្ឋមន្ត្រីការពារជាតិ និងកងទ័ពរុស្ស៊ីរបស់ខ្លួន ដែលបានបញ្ចប់កិច្ចខិតខំប្រឹងប្រែងប្រយុទ្ធ ដើម្បីរំដោះទីក្រុងម៉ារីយូប៉ូលដោយជោគជ័យ។
ទោះជាយ៉ាងណា សហរដ្ឋអាមេរិកបានជំទាស់នឹងការអះអាងរបស់លោកពូទីនខាងលើនេះ ដោយខ្លួនលើកឡើងថា កងកម្លាំងអ៊ុយក្រែននៅតែបន្តមានវត្តមានក្នុងទីក្រុងម៉ារីយូប៉ូល ដើម្បីត្រៀមតបតទៅនឹងកងទ័ពរុស្ស៊ីវិញ។
ទាក់ទិននឹងករណីនេះ អ៊ុយក្រែនក៏បានឱ្យដឹងដោយអំពាវនាវសុំឱ្យមានការជួយជម្លៀសជនស៊ីវិលនិងទាហានដែលរងរបួស ថាលោក ពូទីន ហាក់មិនចង់ធ្វើការវាយប្រហារកងទ័ពរបស់ខ្លួនដែលនៅសេសសល់ចុងក្រោយនៅក្នុងតំបន់ម៉ារីយូប៉ូលឡើយ ខណៈដែលពួកគេ [រុស្សី] ក៏កំពុងតែជួបប្រទះបញ្ហាកង្វះកងទ័ពផងដែរ។
គិតរហូតមកដល់ពេលនេះ ការឈ្លានពានរបស់រុស្ស៊ីលើអ៊ុយក្រែនបានឈានចូលមកដល់សប្ដាហ៍ទី៨ហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានប្រទេសលោកខាងលិចចាត់ទុកថា ជាការលើកឡើងដោយគ្មានមូលដ្ឋានច្បាស់លាស់៕
