លោកនាយករដ្ឋមន្ត្រី ហ៊ុន សែន ចាត់ទុកទឹកជាប្រភពចាំបាច់សម្រាប់ជំរុញការអភិវឌ្ឍជាតិ ស្របពេលរបាយការណ៍របស់គណៈកម្មាធិការទន្លេមេគង្គបង្ហាញថា លំហូរទឹកទន្លេបានធ្លាក់ចុះទាបរយៈពេល៣ ឆ្នាំជាប់ៗគ្នា។
ការលើកឡើងរបស់លោក ហ៊ុន សែន បានធ្វើឡើងនៅក្នុងកិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ដែលប្រារព្ធធ្វើឡើងនៅទីក្រុងខឹម៉ាមូតុ ប្រទេសជប៉ុន នៅព្រឹកថ្ងៃសៅរ៍ ទី២៣ ខែមេសា ឆ្នាំ២០២២នេះ។ ក្នុងកិច្ចប្រជុំនោះ លោក ហ៊ុន សែន បានថ្លែងថា ការប្រើប្រាស់ធនធានទឹកប្រកបដោយប្រសិទ្ធភាព និងស័ក្ដិសិទ្ធិភាព គឺចាំបាច់ណាស់សម្រាប់ការអភិវឌ្ឍសង្គម-សេដ្ឋកិច្ចប្រកបដោយចីរភាព។
របាយការណ៍ដែលចេញផ្សាយដោយគណៈកម្មាធិការទន្លេមេគង្គកាលពីថ្ងៃទី១៣ ខែមករា ឆ្នាំ២០២២ បានរៀបរាប់ថា លំហូរទឹកទន្លេពីឆ្នាំ២០១៩ ដល់ឆ្នាំ២០២១ បានធ្លាក់ដល់កម្រិតមួយទាបបំផុតដែលមិនធ្លាប់មានក្នុងរយៈពេល៦០ឆ្នាំចុងក្រោយ ដែលបញ្ហានេះបណ្ដាលឱ្យប៉ះពាល់ដល់ជីវភាពកសិករ ការនេសាទ និងប្រព័ន្ធអេកូឡូស៊ី ជាដើម។
ជាក់ស្ដែង នៅក្នុងរបៀបវារៈឆ្នាំ២០៣០ របស់អង្គការសហប្រជាជាតិសម្រាប់ការអភិវឌ្ឍប្រកបដោយចីរភាព ធនធានទឹកត្រូវបានកំណត់នៅគោលដៅទី៦ ស្តីពី «ការធានាឱ្យមាន និងការគ្រប់គ្រងទឹកនិងអនាម័យប្រកបដោយចីរភាព សម្រាប់ប្រជាជនគ្រប់រូប»។ លោកបន្តថា កម្ពុជាបានចាត់ទុកទឹកថាជា «មាស ស» ដែលជាកម្លាំងចលករជំរុញការអភិវឌ្ឍ និងវឌ្ឍនភាពសេដ្ឋកិច្ចសង្គម ប្រកបដោយចីរភាព និងបរិយាបន្ន។
ហេតុដូច្នេះ គណៈកម្មាធិការទន្លេមេគង្គបានជំរុញឱ្យប្រទេសនៅតាមដងទន្លេមេគង្គត្រូវដោះស្រាយជាបន្ទាន់លើលំហូរទឹក និងគ្រោះរាំងស្ងួតក្នុងតំបន់នៅក្នុងនោះក៏មានកម្ពុជាផងដែរ៕
