លោកនាយករដ្ឋមន្ត្រី ហ៊ុន សែន បានអះអាងថា ជំនួយវ៉ាក់សាំងប្រភេទអាស្ត្រាហ្សេនីកា របស់រដ្ឋាភិបាលអ៊ីតាលី ជាង១លានដូសបានមកដល់ប្រទេសកម្ពុជានៅថ្ងៃអាទិត្យនេះ នឹងយកទៅប្រើប្រាស់ដើម្បីចាក់ទៅដល់ប្រជាពលរដ្ឋជាដូសជំរុញ។
ទំព័រហ្វេសប៊ុករបស់នាយករដ្ឋមន្ត្រី នៅយប់ថ្ងៃអាទិត្យនេះបានឱ្យដឹងថា លោកនឹងអញ្ជើញទៅទទួលវ៉ាក់សាំងកូវីដ-១៩ ប្រភេទអាស្ត្រាហ្សេនីកា ដែលជាជំនួយរបស់រដ្ឋាភិបាល និងប្រជាជនអ៊ីតាលី នៅថ្ងៃទី២៥ ខែមេសា។
លោកបន្តថា ពិធីប្រគល់និងទទួលអំណោយវ៉ាក់សាំងកូវីដ-១៩នេះ នឹងត្រូវធ្វើឡើងនៅវិមានសន្តិភាព ដោយមានការចូលរួមពីអគ្គរដ្ឋទូតនៃប្រទេសអ៊ីតាលីប្រចាំនៅកម្ពុជាផងដែរ។
ទំព័រហ្វេសប៊ុកនាយករដ្ឋមន្ត្រីសរសេរថា៖«វ៉ាក់សាំង Covid-19 ប្រភេទអាស្ត្រាហ្សេនីកានេះ បានដឹកមកដល់ប្រទេសកម្ពុជា កាលពីព្រឹកថ្ងៃទី២៤ ខែមេសា ឆ្នាំ២០២២ ហើយវ៉ាក់សាំងនេះ នឹងយកទៅប្រើប្រាស់សម្រាប់ការចាក់ជូនដល់ប្រជាពលរដ្ឋជាដូសជំរុញ»។
លោក ហ៊ុន សែន បន្តថា ការចាក់វ៉ាក់សាំងកូវីដ-១៩ គឺជាយុទ្ធសាស្ត្រដ៏ត្រឹមត្រូវមួយសម្រាប់ប្រទេសកម្ពុជា ដែលធ្វើឱ្យប្រជាជនកម្ពុជាមានភាពស៊ាំរហូតមានការសម្រេចលុបចោលកាតព្វកិច្ចម៉ាស់នៅខេត្តចំនួន៤ នាពេលថ្មីៗនេះទៀតផង។
ប្រភពដដែលបន្តដោយយោងតាមរបាយការណ៍ថា អ្នកចាក់វ៉ាក់សាំងបង្ការជំងឺកូវីដ-១៩ នៅទូទាំងប្រទេសបានបង្ហាញថា គិតត្រឹមថ្ងៃទី២៣ ខែមេសា ឆ្នាំ២០២២ គិតចាប់ពីអាយុ ៣ឆ្នាំឡើងទៅ ធៀបនឹងចំនួនប្រជាជនសរុប ១៦លាននាក់ សម្រេចបាន៩៣,០៤%។
យោងតាមទិន្នន័យរបស់ក្រសួងសុខាភិបាល គិតត្រឹមថ្ងៃទី២៣មេសា ឱ្យដឹងថា ផែនការចាក់វ៉ាក់សាំងបង្ការជំងឺកូវីដ-១៩ នៅកម្ពុជាសម្រេចបានជាង ៩៣ភាគរយដែលមានពលរដ្ឋប្រមាណ១៤.៨លាននាក់បានទទួលវ៉ាក់សាំងដូសទីមួយនិងពីរ ឬដូសមូលដ្ឋាន។
ប្រភពដដែលបន្ថែមថា ក្នុងចំណោមនោះ មានពលរដ្ឋជាង ៨លាននាក់ប៉ុណ្ណោះ ដែលបានចាក់នូវដូសទីបី ឬដូសជំរុញ ។
ក្នុងសារជាសំឡេងនៅទី២៤ ខែមេសានេះ លោកនាយករដ្ឋមន្ត្រីបានបញ្ជាទៅរដ្ឋលេខាធិការក្រសួងសុខាភិបាល អ្នកស្រី ឱ វណ្ណឌីន ត្រូវបើកយុទ្ធនាការចាក់វ៉ាក់សាំងនូវដូសទីបីឬដូសជំរុញជាចាំបាច់ ដល់ពលរដ្ឋ ដើម្បីបង្កើនភាពស៊ាំក្នុងសហគមន៍ឱ្យបានកាន់តែខ្ពស់។
លោកបន្តថា ដោយសារភាពស៊ាំក្នុងសហគមន៍នេះហើយ បានជាកាលពីពេលថ្មីៗនេះរដ្ឋាភិបាលបានសម្រេចដាក់ខេត្តចំនួន៤ រួមមានខេត្តរតនគិរី មណ្ឌលគិរី ស្ទឹងត្រែង និងខេត្តព្រះវិហារ រួចផុតពីកាតព្វកិច្ចពាក់ម៉ាស់។
លោកហ៊ុន សែន បានប្រកាសថា ដំណើរការបើកប្រទេសឡើងវិញទាំងស្រុងឬ និយាយបានថាដំណើរការបើកសេដ្ឋកិច្ច-សង្គមកម្ពុជា នឹងមិនវិលថយក្រោយឡើយ ដោយពលរដ្ឋត្រូវរស់នៅជាមួយកូវីដ-១៩ ផងដែរ៕
