ប្រមុខរដ្ឋាភិបាលណែនាំទៅភាគីពាក់ព័ន្ធឱ្យប្រារព្ធ «ទិវាពលកម្មអន្តរជាតិ» ដែលនឹងចូលមកដល់នៅសប្ដាហ៍ក្រោយនេះក្នុងទ្រង់ទ្រាយតូច ក្រោមហេតុផលថា ប្រជាជាតិកំពុងចូលរួមទប់ស្កាត់ការរីករាលដាលនៃជំងឺកូវីដ-១៩បំប្លែងថ្មី «អូមីក្រុង»។
យោងតាមសារាចរណែនាំរបស់រដ្ឋាភិបាល ចុះថ្ងៃទី៦ ខែមេសា ឆ្នាំ២០២២ ស្តីពី «ការរៀបចំខួបអនុស្សាវរីយ៍លើកទី១៣៦ នៃទិវាពលកម្មអន្តរជាតិថ្ងៃទី១ ខែឧសភា ឆ្នាំ២០២២» ដែល VOD ទទួលបាននៅថ្ងៃចន្ទនេះ បានលើកឡើងថា ក្នុងបរិបទដែលប្រជាជាតិកំពុងចូលរួមបង្ការ ទប់ស្កាត់ និងប្រយុទ្ធប្រឆាំងការរីករាលដាលនៃជំងឺកូវីដ-១៩ បំប្លែងថ្មី អូមីក្រុង រដ្ឋាភិបាលតម្រូវឱ្យស្ថាប័នពាក់ព័ន្ធសហការជាមួយអង្គការវិជ្ជាជីវៈ ព្រមទាំងនិយោជក ត្រូវរៀបចំកម្មវិធីសំណេះសំណាលនៃទិវាពលកម្មអន្តរជាតិថ្ងៃ១ឧសភានេះ «ក្នុងទ្រង់ទ្រាយតូច» ហើយនិយោជក [ថៅកែ] ត្រូវរៀបចំក្នុងកម្រិតរោងចក្រ សហគ្រាស តាមស្ថានភាពជាក់ស្ដែង»។
បន្ថែមពីនេះ រដ្ឋាភិបាលក៏បានអំពាវនាវទៅក្រសួងនិងស្ថាប័នពាក់ព័ន្ធ រួមទាំងជនបរទេសទាំងអស់ ដែលចូលរួមរម្លឹកខួបអបអរសាទរទិវាពលកម្មអន្តរជាតិ១ឧសភានេះ «ក្នុងបរិយាកាសសោមនស្សរីករាយ ដើម្បីឱ្យស័ក្តិសមជាបុណ្យការងាររបស់ជាតិ និងអនុវត្តឱ្យបានខ្ជាប់ខ្ជួននូវវិធានការ៣កុំ និង៣ការពារ»។
អគ្គលេខាធិការរងនៃសមាគមរោងចក្រកាត់ដេរកម្ពុជា លោក កាំង មូនីកា ឱ្យដឹងថា ខួបនៃទិវាពលកម្មអន្តរជាតិឆ្នាំនេះក៏ដូចឆ្នាំមុនដែរ គឺសមាគមនឹងធ្វើរួមគ្នាជាមួយក្រសួងការងារ។
លោកថា៖ «យើងអត់មានធ្វើពិធីអីដាច់ដោយឡែកទេ គឺយើងចូលរួមជាមួយគេ ដែលរៀបចំដោយក្រសួងការងារ [ធ្វើនៅតាមសហគ្រាស ឬក៏នៅកន្លែងណា?] ខ្ញុំគិតថាជាកម្មវិធីតាមអនឡាញ»។
ប្រធានសហភាពការងារកម្ពុជា លោក អាត់ ធន់ ឱ្យដឹងថា ក្នុងទិវាពលកម្មអន្តរជាតិ ១ឧសភា ឆ្នាំ២០២២នេះ ក្រុមការងារលោកគ្រោងជួបជុំគ្នានៅជិតវត្តភ្នំ ដែលមានអ្នកចូលរួមប្រមាណជា១ ០០០នាក់ ហើយដើរហែក្បួនទៅរដ្ឋសភា ដើម្បីដាក់ញត្តិនិងថ្លែងសារមួយចំនួនពីទុក្ខលំបាករបស់កម្មករ ដែលក្រសួងពាក់ព័ន្ធមិនទាន់ដោះស្រាយបាន។ ប៉ុន្តែលោកថា សំណើនេះត្រូវបានសាលារាជធានីភ្នំពេញច្រានចោលកាលពីសប្ដាហ៍មុន។
លោកបន្ថែមថា បញ្ហានេះ សាលារាជធានីតម្រូវឱ្យក្រុមការងារលោកទៅធ្វើកម្មវិធីនេះនៅទីលានប្រជាធិបតេយ្យ ក្នុងខណ្ឌឫស្សីកែវវិញ តែក្រុមការងារមិនព្រម ដែលការណ៍នេះ សាលារាជធានីបានបញ្ជូនសំណើទៅក្រសួងមហាផ្ទៃជាអ្នកសម្រេច។
តែយ៉ាងណា លោកគិតថា សារាចរណែនាំរបស់រដ្ឋាភិបាលនឹងមិនរារាំងដល់ការជួបជុំដោយសន្តិវិធី ដើម្បីប្រារព្ធទិវាពលកម្មអន្តរជាតិ នៅថ្ងៃ១ឧសភានោះទេ។
លោកថា៖ «នៅតាមរោងចក្រសហគ្រាសខ្លះ មិនតូចទេ មានគ្នាប្រហែលជា៤ទៅ៥ពាន់នាក់ដែរ អ៊ីចឹងការដែលយើងធ្វើនៅទីសាធារណៈត្រឹម១ពាន់នាក់ ខ្ញុំគិតថាវាមិនធំទេ វាតូចសមរម្យដែរ អីចឹងគួរតែអនុញ្ញាតទៅ»។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា មើលឃើញថា សារាចរណែនាំរបស់រដ្ឋាភិបាលហាក់បង្កប់នូវការភ័យខ្លាចការងើបឡើងរបស់មហាជន ស្របពេលដែលរដ្ឋាភិបាលមិនទាន់ដោះស្រាយបញ្ហាសង្គមជាច្រើន ដូចជា ការរំលាយគណបក្សសង្គ្រោះជាតិ ជម្លោះដីធ្លី រួមទាំងលក្ខខណ្ឌការងារ ជាដើម។
លោកថា៖ «រដ្ឋមួយដែលមិនទាន់បានគោរពនូវសិទ្ធិការងារ សិទ្ធិរបស់ប្រជាពលរដ្ឋពេញលេញ គឺរមែងបារម្ភអំពីការងើបតវ៉ានិងការទាមទាររបស់ប្រជាពលរដ្ឋហ្នឹងឯង»។
តែយ៉ាងណា លោកចង់ឃើញរដ្ឋាភិបាលបើកទូលាយនូវការចូលរួមអបអរទិវាពលកម្មអន្តរជាតិនេះ ដោយថា ទិវានេះជាទិវាសកល ហើយធម្មនុញ្ញរបស់កម្ពុជាក៏ទទួលស្គាល់សិទ្ធិនេះ រហូតមានច្បាប់ការងារ និងតម្រូវឱ្យមានថ្ងៃឈប់សម្រាក ជាដើម។ មួយវិញទៀត លោកថា អ្នកចូលរួមប្រារព្ធទិវាពលកម្មអន្តរជាតិ ១ឧសភា នាពេលខាងមុខ អាចមានត្រឹម១ភាគរយប៉ុណ្ណោះ បើធៀបនឹងចំនួនអ្នកដែលបានដើរកម្សាន្តក្នុងពិធីចូលឆ្នាំប្រពៃណីជាតិ ដែលរដ្ឋាភិបាលមិនបានដាក់បម្រាមនោះ៕
