សកម្មជនគណបក្សសង្គ្រោះជាតិដែលត្រូវបានតុលាការរំលាយម្នាក់ ស្នើទៅតុលាការកំពូលទម្លាក់បទចោទ ក្រោយពីតុលាការថ្នាក់ក្រោមបានកាត់ទោសឱ្យជាប់ពន្ធនាគារ៧ឆ្នាំ ជុំវិញការបង្ហាញសារគាំទ្រលោក សម រង្ស៊ី លើហ្វេសប៊ុក។
តុលាការកំពូល នៅថ្ងៃពុធនេះ បានបើកសវនាការបណ្ដឹងសាទុក្ខលើសំណុំរឿងលោក គង់ សំអាន សមាជិកគណបក្សសង្គ្រោះជាតិដែលត្រូវបានតុលាការរំលាយកាលពីឆ្នាំ២០១៧ បន្ទាប់ពីសាលាដំបូង និងសាលាឧទ្ធរណ៍ខេត្តត្បូងឃ្មុំ បានកាត់ទោសឱ្យលោកជាប់ពន្ធនាគារ៧ឆ្នាំ កាលពីឆ្នាំ២០២០។
ឈរនៅរង្វង់ក្រចកសេះ ក្នុងស្លៀកបំពាក់ពណ៌ស្លាទុំ លោក គង់ សំអាន ប្រាប់ទៅប្រធានក្រុមប្រឹក្សាជំនុំជម្រះនៃតុលាការកំពូល លោក គង់ ស្រ៊ីម ថាមូលហេតុដែលប្ដឹងសាទុក្ខនេះ ដោយសារការសម្រេចកាត់ទោសឱ្យគាត់ជាប់ពន្ធនាគារ៧ឆ្នាំ ជារឿងអយុត្តិធម៌។ លោកបញ្ជាក់ថា ភាពអយុត្តិធម៌នោះ ដោយសារសមត្ថកិច្ចចាប់ខ្លួនគាត់ទាំងគ្មានដីកា ហើយឃុំខ្លួនបាន៦ថ្ងៃ តុលាការក៏បើកសវនាការភ្លាម។
បន្ថែមពីនេះ លោកថា តុលាការឱ្យគាត់ផ្ដិតស្នាមមេដៃលើក្រដាសសចំនួន៧សន្លឹក ទាំងដៃជាប់ខ្នោះ ក្រោមហេតុផលថាសរសេរមិនទាន់ ខណៈភស្តុតាងដាក់បន្ទុកលើរូបគាត់គ្មានឡើយ ដោយយកចម្លើយដែលសមត្ថកិច្ច និងតុលាការសាកសួរនោះ មកដាក់បន្ទុកទៅវិញ។
លោកថា៖ «គេចោទខ្ញុំ រួមគំនិតក្បត់ ប៉ុន្តែនៅសាលាដំបូងអត់មានបង្ហាញភស្តុតាងទេ យកខ្ញុំមកសួរចុះឡើង ហើយសន្និដ្ឋានតាមចម្លើយខ្ញុំឆ្លើយ រួមទាំងនិយាយថា តាមចម្លើយខ្ញុំ សមត្ថកិច្ចនិងតុលាការអាចឃុំខ្លួនខ្ញុំបាន ទាំងអត់មានភស្តុតាងអី»។
ក្រោយពីមានការអះអាងបែបនេះ ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម បានឱ្យលោក គង់ សំអាន បង្ហាញភស្តុតាងនូវអ្វីដែលគាត់បាននិយាយ។ លោកបន្តថា អំឡុងពេលតុលាការថ្នាក់ក្រោមកាត់ទោសឱ្យជាប់ពន្ធនាគារ៧ឆ្នាំ ហេតុអ្វីបានជាលោក គង់ សំអាន មិនតវ៉ាភ្លាមៗ។
លោកថា៖ «តើម៉េចទើបលោកមិនតវ៉ាភ្លាមៗ ពេលតុលាការកាត់ទោស? ខ្ញុំមើលក្នុងឯកសារ រូបលោកអត់មានតវ៉ាទេ។ តើលោកមានបញ្ហាអ្វី រឿងឱ្យផ្ដិតស្នាមមេដៃលើក្រដាសស និងការចាប់ខ្លួនគ្មានដីកាទេ?»
ឆ្លើយតបនឹងប្រធានក្រុមប្រឹក្សាជំនុំជម្រះ លោក គង់ សំអាន អះអាងថា កន្លងមក រូបគាត់បានតវ៉ា តែតុលាការថ្នាក់ក្រោមមិនបានកត់ត្រា។ លោកថា តុលាការបានចោទប្រកាន់លើរូបគាត់ថា «រួមគំនិតក្បត់» ទាំងគ្មានភស្តុតាង និងគ្រាន់តែបង្ហាញរូបថតមួយសន្លឹក រួចធ្វើសេចក្ដីសន្និដ្ឋានដោយចោទប្រកាន់ និងឃុំខ្លួនលោកនៅពន្ធនាគារតែម្ដង។
លោក គង់ សំអាន ស្នើទៅប្រធានក្រុមប្រឹក្សាជំនុំជម្រះតុលាការកំពូល បដិសេធសាលាដីកាសាលាឧទ្ធរណ៍ខេត្តត្បូងឃ្មុំ ដោយទម្លាក់បទចោទប្រកាន់ និងដោះលែងរូបគាត់ឱ្យមានសេរីភាពវិញ។
លោកថា៖ «ខ្ញុំសំណូមពរទៅតុលាការកំពូលទម្លាក់ចោលបទចោទប្រកាន់លើរូបខ្ញុំ។ ខ្ញុំធ្វើគ្រូបង្រៀនបម្រើប្រទេសជាតិជិតកណ្ដាលជីវិតហើយ អត់មានចេតនាក្បត់ជាតិទេ។ ខ្ញុំស្រឡាញ់ប្រទេសជាតិខ្ញុំណាស់»។
ប៉ុន្តែការស្នើរបស់លោក គង់ សំអាន ត្រូវបានតំណាងមហាអយ្យការតុលាការកំពូល លោក ឈួន ចាន់ថា ជំទាស់ ដោយចាត់ទុកការកាត់ទោស៧ឆ្នាំរបស់តុលាការថ្នាក់ក្រោម ថាជារឿងត្រឹមត្រូវ ក្រោមហេតុផលថា សកម្មភាពជួបជុំ និងកៀរគរគ្នា ក្នុងចេតនាចង់ផ្ដួលរំលំរដ្ឋាភិបាល។
ប្រាប់អ្នកសារព័ត៌មានបន្ទាប់ពីចប់សវនាការ មេធាវីការពារក្ដីឱ្យលោក គង់ សំអាន គឺលោក សំ សុគង់ ថាភស្តុតាងដែលតុលាការយកចោទប្រកាន់ និងដាក់បន្ទុកកូនក្ដីរបស់លោកនោះ គឺពាក់ព័ន្ធនឹងការជួបជុំគ្នាបរិភោគនំបញ្ចុក ការលើកម្រាមដៃ៩ រួមទាំងការផុសសារលើបណ្ដាញសង្គមបង្ហាញពីការគាំទ្រគោលការណ៍៥ចំណុចដែលលោក សម រង្ស៊ី និងថ្នាក់ដឹកនាំជាន់ខ្ពស់គណបក្សប្រឆាំងនៅក្រៅប្រទេសបង្កើតឡើង។
តែយ៉ាងណា លោកថា ភស្តុតាងទាំងអស់នេះមិនអាចដាក់បន្ទុកដោយកាត់ទោសឱ្យកូនក្ដីជាប់ពន្ធនាគាររហូតដល់៧ឆ្នាំនោះទេ។ លោកចាត់ទុកការចាប់ខ្លួនកូនក្ដី និងការកាត់ទោសដាក់ពន្ធនាគារច្រើនឆ្នាំបែបនេះ ថាជារឿងនយោបាយ ខណៈកូនក្ដីជាសកម្មជនគណបក្សសង្គ្រោះជាតិដែលត្រូវបានតុលាការរំលាយកាលពីឆ្នាំ២០១៧។
លោកថា៖ «មូលហេតុដែលចាប់ខ្លួន គឺជាមូលហេតុនយោបាយច្រើនជាងផ្លូវច្បាប់ ដោយសារគាត់ជាអតីតសកម្មជនគណបក្សសង្គ្រោះជាតិ។ ក្រោយរំលាយ គាត់គ្រាន់តែចូលរួមសកម្មភាពផ្សេងៗ អាជ្ញាធរចោទគាត់ចូលរួមគាំទ្រ ចូលរួមសកម្មភាពរួមគំនិតក្បត់ដែរទៅ»។
កាលពីខែកុម្ភៈ ឆ្នាំ២០២០ សាលាដំបូងខេត្តត្បូងឃ្មុំ បានកាត់ទោសឱ្យសកម្មជនបក្សសង្គ្រោះជាតិដែលត្រូវតុលាការរំលាយចំនួន៧នាក់ ក្នុងសំណុំរឿង «រួមគំនិតក្បត់» ក្នុងនោះមានជនជាប់ចោទ២នាក់ ជាប់ពន្ធនាគារ៥ឆ្នាំ និង៥នាក់ទៀតជាប់ពន្ធនាគារ៧ឆ្នាំ។ ក្នុងចំណោមជនជាប់ចោទទាំង៧រូប គឺមានតែលោក គង់ សំអាន ម្នាក់គត់ដែលនៅជាប់ពន្ធនាគារ ក្រៅពីនោះ គឺតុលាការបានអនុញ្ញាតឱ្យពួកគេនៅក្រៅឃុំបណ្ដោះអាសន្ន៕
