គណបក្សកម្ពុជានិយម បានស្នើសុំកិច្ចអន្តរាគមន៍ពីក្រសួងមហាផ្ទៃ ដើម្បីបើកផ្លូវឱ្យគណបក្សថ្មីថ្មោងមួយនេះបានលើកផ្លាកគណបក្សនៅទីសាធារណៈដូចគណបក្សប្រជាជនកម្ពុជាដែរ ខណៈអាជ្ញាធរសង្កាត់រលួស ខណ្ឌដង្កោ រាជធានីភ្នំពេញ មិនអនុញ្ញាតឱ្យគណបក្សនេះលើកផ្លាក។
តាមរយៈលិខិតស្នើសុំរបស់គណបក្សកម្ពុជានិយមទៅក្រសួងមហាផ្ទៃ កាលពីសប្ដាហ៍មុន ដែលវីអូឌីទើបទទួលបាននៅថ្ងៃសុក្រនេះ ឱ្យដឹងថា តំណាងគណបក្សបានជួបអាជ្ញាធរសង្កាត់ និងដាក់លិខិតសុំលើកផ្លាកគណបក្ស ប៉ុន្តែត្រូវបានចៅសង្កាត់បដិសេធ ដោយសម្អាងថា ថ្នាក់លើមិនអនុញ្ញាត។
លិខិតដដែលបន្តថា ទីតាំងដែលគណបក្សកម្ពុជានិយមស្នើសុំលើកផ្លាកគណបក្សនេះជាទីតាំងសាធារណៈ ហើយផ្លាកគណបក្សប្រជាជនកម្ពុជា ក៏បានលើករួចហើយដែរ នៅលើទីតាំងដែលចៅសង្កាត់រលួសបដិសេធនោះ។ គណបក្សកម្ពុជានិយម បានហៅការច្រានចោលដោយអាជ្ញាធរនៅពេលនេះ ថាជាការរើសអើងនិន្នាការនយោបាយ និងពុំមានភាពស្មើគ្នាក្នុងការប្រកួតប្រជែង។
ឆ្លើយតបរឿងនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ថា ក្រសួងនៅមិនទាន់ទទួលបានលិខិតស្នើសុំកិច្ចអន្តរាគមន៍ពីគណបក្សកម្ពុជានិយមនៅឡើយ។ ប៉ុន្តែលោកអះអាងថា ការលើកផ្លាកនេះមិនចាំបាច់ស្នើសុំគោលការណ៍អ្វីនោះទេ។
លោកបន្តថា៖ «ពូមិនបានដឹងទេក្មួយ ចាំបាច់អីសុំ[ក្រសួង]មហាផ្ទៃ ដាក់តែលើគណបក្សទៅបានហើយ។ ទេ! ពូមិនដឹងយ៉ាងម៉េចផង ពូសុំមើលសិន អត់ឃើញ»។
បន្ថែមលើលិខិតស្នើសុំកិច្ចអន្តរាគមន៍នេះ បេក្ខជនដែលឈរលំដាប់លេខរៀងទី៣ នៅសង្កាត់រលួស នៃគណបក្សកម្ពុជានិយម លោក អូក អ៊ី ឱ្យដឹងថា គណបក្សបានដាក់លិខិតទៅក្រសួងមហាផ្ទៃ ដើម្បីសុំកិច្ចអន្តរាគមន៍ ហើយក្រសួងក៏បានទទួលរួចហើយដែរ តាំងពីថ្ងៃទី២០ ខែមេសា។
លោកបន្តថា៖ «ខាងរដ្ឋបាលក្រសួងមហាផ្ទៃ ក៏បានវាយត្រាចូលដែរ ដូចដែលឃើញមាននៅក្នុងលិខិតហ្នឹង។ ហើយព្រោះថា បើអត់ទាន់ទទួលបាន យើងក៏យល់ពីនីតិវិធីរបស់រដ្ឋបាលក្រសួងមហាផ្ទៃដែរ។ គិតរហូតមកដល់ពេលនេះ មានរយៈពេលជាង១អាទិត្យហើយ ចាប់តាំងពីថ្ងៃដាក់លិខិត»។
លោក អូក អ៊ី បន្តថា នៅក្នុងលិខិតស្នើសុំលើកផ្លាកគណបក្សនៅសង្កាត់រលួសនេះ គឺមានចំនួន១១ទីតាំង ហើយទីតាំងទាំងនោះ លោកសង្កេតឃើញថា មានផ្លាកគណបក្សប្រជាជនកម្ពុជាដាក់ដូចគ្នារួចទៅហើយដែរ។
វីអូឌី មិនអាចសុំការបញ្ជាក់ជុំវិញរឿងពីនេះពីចៅសង្កាត់រលួស លោក កឹប ហ៊ន បានទេ នៅថ្ងៃសុក្រនេះ។
ប៉ុន្តែស្មៀនសង្កាត់រលួស លោក ឆុំ ដារ៉ាដា អះអាងថា លោកបានបញ្ជូនលិខិតស្នើសុំលើកផ្លាកគណបក្សនេះទៅចៅសង្កាត់រួចអស់ហើយ ប៉ុន្តែត្រង់ចៅសង្កាត់អនុញ្ញាតឬមិនអនុញ្ញាត លោកមិនបានដឹងព័ត៌មានទេ។
លោកបន្តថា៖ «អាហ្នឹងខ្ញុំអត់ដឹងដែរបង ទាល់តែបងទាក់ទងទៅគាត់។ មួយរយៈនេះ ខ្ញុំរវល់ដែរ បើមានឯកសារពីខាងគាត់ [បក្សកម្ពុជានិយម] ដាក់មក ខ្ញុំបញ្ជូនទៅអ៊ុំចៅសង្កាត់អស់ហើយ»។
បើទោះជាបែបណា លិខិតផ្ញើទៅអភិបាលរាជធានី-ខេត្តរបស់លោក ស ខេង រដ្ឋមន្ត្រីក្រសួងមហាផ្ទៃ ចេញកាលពីថ្ងៃទី៧ ខែកុម្ភៈ ឆ្នាំ២០២២ បញ្ជាក់ថា រដ្ឋបាលរាជធានីខេត្ត និងអាជ្ញាធរមានសមត្ថកិច្ចនៅថ្នាក់ក្រោមជាតិ ត្រូវបង្កលក្ខណៈងាយស្រួលដល់គ្រប់គណបក្សនយោបាយដែលបានចុះបញ្ជីរួចហើយនៅក្រសួងមហាផ្ទៃ ហើយអាចធ្វើសកម្មភាពស្របតាមច្បាប់បាន។
លិខិតបន្ថែមថា ការអនុវត្តដូច្នេះ ដើម្បីប្រាកដថា ការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០២២ និងការបោះឆ្នោតជ្រើសតាំងតំណាងរាស្រ្ត ឆ្នាំ២០២៣ ប្រព្រឹត្តទៅដោយសេរី ត្រឹមត្រូវ និងយុត្តិធម៌។ ក្រៅពីនេះ លោកថា ប្រសិនបើគណបក្សនយោបាយត្រូវការលើកផ្លាកគណបក្ស នៅតាមទីសាធារណៈ ទីប្រជុំជន ឬតាមដងផ្លូវនានា សាម៉ីគណបក្សគ្រាន់តែធ្វើលិខិតជូនដំណឹងជាលាយលក្ខណ៍អក្សរទៅអាជ្ញាធរឃុំសង្កាត់ អំពីការលើកផ្លាកគណបក្សនយោបាយជាការស្រេច។
នាយកប្រតិបត្តិអង្គការនិចហ្វិក លោក សំ គន្ធាមី យល់ឃើញថា អាជ្ញាធរព្យាយាមបិទផ្លូវមិនឱ្យគណបក្សនយោបាយបានលើកផ្លាកនៅតាមទីតាំងសាធារណៈនេះ ឆ្លុះបញ្ចាំងឱ្យឃើញពីការរើសអើងនិន្នាការនយោបាយ។ មួយវិញទៀត លោកថា ការព្យាយាមរារាំងការលើកផ្លាកគណបក្សក្រៅរដ្ឋាភិបាលនេះ អាចជាការខ្លាចការប្រកួតមួយដែលត្រឹមត្រូវតាមគោលការណ៍លទ្ធិប្រជាធិបតេយ្យ សេរីពហុបក្ស ក្នុងពេលដែលផ្លាកសញ្ញាផលិតផលផ្សេងៗអាចដាក់តាំងបង្ហាញបានព្រោងព្រាត។
លោកបន្តថា៖ «វាមានអីខុសច្បាប់ទេ! ផ្លាកស្រាបៀរកម្ពុជា គេដាក់ពេញហ្នឹងទាំងអស់ វាមិនខុសច្បាប់ផង! យើងសាកគិតមើល៍! និយាយឱ្យខ្លីតែម្ដងទៅ យើងមើលទៅផ្លាកស្រាបៀរឱ្យពេញតែហ្នឹង។ បាទ! នេះហើយជាការរារាំង បើនិយាយឱ្យខ្លីទៅ ហើយផ្លាកគេធំៗផង។ ចំណែកផ្លាកគណបក្សនយោបាយខ្លះតូចៗផង ពេលខ្លះសឹងថាមើលមិនឃើញផង ហើយមិនឱ្យគេដាក់។ រឿងនេះ វាពាក់ព័ន្ធនឹងស្ថានភាពនយោបាយហើយ»។
តំណាងគណបក្សកម្ពុជានិយម ឱ្យដឹងថា គិតមកដល់ពេលនេះ ការរឹតត្បិតលើការលើកផ្លាកគណបក្សនៅតាមទីសាធារណៈនេះ មិនមែនមានតែនៅសង្កាត់រលួសនេះទេ បញ្ហាដូចគ្នានេះក៏កំពុងតែកើតឡើងដែរនៅសង្កាត់ស្លក្រាម ក្រុងសៀមរាប៕