មេធាវី និងអ្នកការពារសិទ្ធិមនុស្សអាដហុក ខកចិត្តដែលសាលាឧទ្ធរណ៍មិនកោះហៅដើមបណ្ដឹង ឈ្មោះ ខុម ចាន់តារាទី ហៅ ស្រីមុំ និងអ្នកស្រី ទ្រី ឈួន ចូលក្នុងសវនាការ ដើម្បីសួរដេញដោលក្នុងសំណុំរឿង «សូកប៉ាន់សាក្សី និងសមគំនិតសូកប៉ាន់សាក្សី»។
សាលាឧទ្ធរណ៍រាជធានីភ្នំពេញ កាលពីថ្ងៃម្សិលមិញ បានបើកសវនាការលើបណ្ដឹងសាទុក្ខរបស់អតីតបុគ្គលិកនិងបុគ្គលិកសមាគមការពារសិទ្ធិមនុស្សអាដហុក ៥រូប រួមមាន លោក នី សុខា, លោក យី សុខសាន្ត, អ្នកស្រី លឹម មុនី, លោក ណៃ វ៉ងដា និងលោក នី ចរិយា។
បណ្ដឹងសាទុក្ខនេះ គឺបន្ទាប់សាលាដំបូងរាជធានីភំ្នពេញបានកាត់ទោសឱ្យពួកគេជាប់ពន្ធនាគារម្នាក់ៗចំនួន៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី»។ ប៉ុន្តែទោស៥ឆ្នាំនេះ តុលាការសម្រេចឱ្យអនុវត្តទោសក្នុងពន្ធនាគាររយៈពេល១៤ខែ ហើយទោសដែលនៅសល់ត្រូវព្យួរ។
មុនពេលចាប់ផ្ដើមសវនាការ សហមេធាវីការពារក្ដីឱ្យអ្នកការពារសិទ្ធិមនុស្សអាដហុក ៣រូប និងអតីតមន្ត្រីអាដហុក ២រូប បានស្នើទៅប្រធានក្រុមប្រឹក្សាសាលាឧទ្ធរណ៍ពន្យារពេលសវនាការទៅថ្ងៃក្រោយ ដោយសារសវនាការនេះមិនមានដើមបណ្ដឹង អ្នកនាង ខុម ចាន់តារាទី ហៅ ស្រីមុំ ចូលរួម។ ប៉ុន្តែការស្នើសុំរបស់ក្រុមមេធាវីត្រូវបានបដិសេធ ដោយថា សំណុំរឿងនេះបានអូសបន្លាយរយៈពេលយូរណាស់ហើយ ដូច្នេះមិនអាចពន្យារពេលទៀតឡើយ។
ក្រោយពីបដិសេធ ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក ស៊ិន វិសាល បានបន្តសវនាការ ដោយបានសួរដេញដោលពីមូលហេតុដែលនាំឱ្យអ្នកការពារសិទ្ធិមនុស្សអាដហុកទាំង៤រូប និងអតីតអ្នកការពារសិទ្ធិមនុស្សអាដហុក និងជាមន្ត្រី គ.ជ.ប ដាក់បណ្ដឹងសាទុក្ខមកតុលាការជាន់ខ្ពស់បន្តទៀត។
ឈរនៅក្នុងរង្វង់ក្រចកសេះ លោក នី សុខា, លោក យី សុខសាន្ត និងអ្នកស្រី លឹម មុនី រួមទាំងលោក ណៃ វ៉ងដា បានប្រាប់ប្រធានក្រុមប្រឹក្សាជំនុំជម្រះថា មូលហេតុដែលពួកគាត់ប្ដឹងសាទុក្ខ ដោយសារតុលាការថ្នាក់ក្រោមកាត់ទោសឱ្យពួកគាត់ជាប់ពន្ធនាគាររហូតដល់៥ឆ្នាំ ដោយមិនបានប្រព្រឹត្តកំហុសអ្វីសោះ។
យ៉ាងណា ទាំងលោក នី សុខា និងលោក យី សុខសាន្ត ក៏បានស្នើទៅប្រធានក្រុមប្រឹក្សាជំនុំជម្រះពន្យារពេលសវនាការ ដោយថា ពួកគាត់ចង់ឱ្យតុលាការកោះហៅអ្នកនាង ខុម ចាន់តារាទី ចូលរួមសវនាការដើម្បីតតាំងគ្នា ដោយថា នៅដំណាក់កាលសាលាដំបូងរាជធានីភ្នំពេញ មិនបានឱ្យអ្នកនាងចូលរួមសវនាការដែរ។
ឆ្លើយតបនឹងសំណួរអ្នកការពារសិទ្ធិមនុស្សអាដហុក ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក ស៊ិន វិសាល បានបដិសេធ ដោយថា ចម្លើយអ្នកនាង ខុម ចាន់តារាទី មាននៅក្នុងឯកសារហើយ ដូច្នេះគាត់មិនចាំបាច់ចូលរួមក៏បាន។
លោក ស៊ិន វិសាល ក៏បានសួរទៅមន្ត្រីអាដហុក ៣រូប ដូចគ្នា ខណៈលោក ណៃ វ៉ងដា សុំរក្សាសិទ្ធិមិនឆ្លើយតប។ ចំណែកអតីតបុគ្គលិកសមាគមការពារសិទ្ធិមនុស្សអាដហុក និងបច្ចុប្បន្នជាមន្ត្រីគណៈកម្មាធិការជាតិរៀបចំការបោះឆ្នោត គ.ជ.ប លោក នី ចរិយា មិនបានចូលរួមសវនាការនៅថ្ងៃម្សិលមិញនេះទេ ដោយមេធាវីជាអ្នកចូលរួមជំនួស ខណៈលោកជាប់បំពេញបេសកកម្មនៅតាមខេត្ត។
ក្រោយពីបើកសវនាការសួរដេញដោលពេញមួយរសៀលមក ប្រធានក្រុមប្រឹក្សាជំនុំជម្រះបានឱ្យមន្ត្រីអាដហុកសំណូមពរចុងក្រោយ។
អ្នកការពារសិទ្ធិមនុស្ស៣រូប និងអតីតមន្ត្រីអាដហុកមួយរូប បង្ហាញការសោកស្ដាយ ដែលតុលាការមិនកោះហៅអ្នកនាង ខុម ចាន់តារាទី មកឆ្លើយតតាំងក្ដី និងស្នើសុំឱ្យទម្លាក់ចោលបទចោទប្រកាន់លើពួកគាត់។
ប៉ុន្តែតំណាងមហាអយ្យការស្នើទៅប្រធានក្រុមប្រឹក្សាជំនុំជម្រះ ឱ្យរក្សាបទចោទប្រកាន់ និងបន្ថែមទណ្ឌកម្មឬទោសទណ្ឌទៀត តាមបណ្ដឹងសាទុក្ខរបស់អយ្យការដែលបានប្ដឹងកាលពីពេលកន្លងទៅ ដោយសារការដាក់ពន្ធនាគារលើមន្ត្រីអាដហុក ៣រូប និងអតីតមន្ត្រីអាដហុក ២រូប តិចពេក ខណៈក្រុមសហមេធាវីបានស្នើឱ្យទម្លាក់បទចោទប្រកាន់លើកូនក្ដី។
ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក ស៊ិន វិសាល នឹងប្រកាសសាលដីកានៅថ្ងៃទី២៣ ខែឧសភា ខាងមុខ។
យ៉ាងណាក៏ដោយ សវនាការរបស់មន្ត្រីអាដហុក ៣រូប និងអតីតមន្ត្រីអាដហុក ២រូប តុលាការបានអនុញ្ញាតឱ្យអង្គភាពប្រឆាំងអំពើពុករលួយចូលថតវីដេអូដោយសេរី ដែលខុសប្លែកពីសវនាការផ្សេងៗទៀត។ ក្នុងនោះ អ្នកចូលរួមដែលមានអង្គការសង្គមស៊ីវិល មន្ត្រីទូត និងអ្នកសារព័ត៌មានជាដើម ត្រូវបានសមត្ថកិច្ចដកទូរសព្ទ ខណៈមន្ត្រីអង្គភាពប្រឆាំងអំពើពុករលួយអាចយកទូរសព្ទចូលបានដោយសេរី។
កាលពីខែមេសា ឆ្នាំ២០១៦ មន្ត្រីនិងអតីតមន្រ្តីសមាគមការពារសិទ្ធិមនុស្សអាដហុកទាំង៥រូប ត្រូវបានចាប់ខ្លួនដោយចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿងផ្ដល់ប្រាក់ជាង២០០ដុល្លារទៅឱ្យស្ត្រីម្នាក់ឈ្មោះ ខុម ចាន់តារាទី ហៅ ស្រីមុំ ក្នុងនាមជនរងគ្រោះដែលរត់មករកអាដហុកឱ្យជួយពេលនោះ។
ស្ត្រីឈ្មោះ ខុម ចាន់តារាទី នៅពេលនោះ ត្រូវបានគេចោទថាជាស្រីកំណាន់របស់លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ។ ពួកគេទាំង៥នាក់ត្រូវបានបញ្ជូនទៅឃុំខ្លួននៅពន្ធនាគារព្រៃស កាលពីថ្ងៃទី១ ខែឧសភា ឆ្នាំ២០១៦ រហូតដល់មានការដោះលែងនៅថ្ងៃទី២៩ ខែមិថុនា ឆ្នាំ២០១៧៕