រដ្ឋមន្ត្រីក្រសួងយុត្តិធម៌ លើកឡើងថា ការរីកចម្រើនផ្នែកបច្ចេកវិទ្យានិងអ៊ីនធឺណិត ធ្វើឱ្យការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញកំពុងរីករាលដាល និងក្លាយជាក្ដីបារម្ភសម្រាប់ពិភពលោកទាំងមូល និយាយជារួម និងសម្រាប់កម្ពុជាផងដែរ។
ការបង្ហាញក្ដីបារម្ភរបស់ថ្នាក់ដឹកនាំក្រសួងយុត្តិធម៌ ធ្វើឡើងក្នុងពិធីបើកវគ្គបណ្ដុះបណ្ដាលស្ដីពី «កិច្ចការពារកុមារពីការកេងប្រវ័ញ្ចផ្លូវភេទតាមប្រព័ន្ធអនឡាញ» ដែលត្រូវបានរៀបចំឡើងក្រោមកិច្ចសហការរវាងក្រសួងយុត្តិធម៌ និងក្រុមប្រឹក្សាជាតិកម្ពុជាដើម្បីកុមារ ព្រមទាំងដៃគូដែលមានការពាក់ព័ន្ធផ្សេងទៀត កាលពីថ្ងៃទី២៨ ខែមេសា ឆ្នាំ២០២២។
ក្នុងពិធីនោះ រដ្ឋមន្ត្រីក្រសួងយុត្តិធម៌ លោក កើត រិទ្ធ ថ្លែងថា កន្លងមក កម្ពុជាបានរៀបចំច្បាប់និងលិខិតបទដ្ឋានគតិយុត្តយ៉ាងច្រើន ដែលបង្កើតបានជាក្របខណ្ឌគតិយុត្តរឹងមាំ ដើម្បីផ្ដល់នូវការគាំពារផ្លូវច្បាប់ដល់កុមារ ប្រឆាំងរាល់ទម្រង់នៃការជួញដូរ និងការកេងប្រវ័ញ្ចផ្លូវភេទលើកុមារ។
លោកបន្តថា ក្នុងបរិការណ៍នៃការរីកចម្រើនខាងផ្នែកបច្ចេកវិទ្យានិងអ៊ីនធឺណិត ពាក់ព័ន្ធនឹងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ កំពុងរីករាលដាល និងកំពុងក្លាយជាក្ដីបារម្ភសម្រាប់ពិភពលោកទាំងមូល និងសម្រាប់កម្ពុជា និយាយដោយឡែក។
ករណីនេះ លោកបានទាមទារនូវការយកចិត្តទុកដាក់ និងកិច្ចសហប្រតិបត្តិការល្អបន្ថែមទៀតពីគ្រប់តួអង្គពាក់ព័ន្ធ ទាំងលើការលើកកម្ពស់ការអប់រំ និងផ្សព្វផ្សាយ ដើម្បីបង្កើនការយល់ដឹងដ៏ត្រឹមត្រូវអំពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ទាំងការពង្រឹងប្រសិទ្ធភាពនៃការអនុវត្តវិធានការច្បាប់ចំពោះបទល្មើស។
ជាមួយគ្នានេះដែរ លោក កើត រិទ្ធ ក៏បានណែនាំដល់មន្រ្តីអនុវត្តច្បាប់ និងត្រូវយល់ដឹងឱ្យបានស៊ីជម្រៅអំពីទម្រង់ផ្សេងៗនៃអំពើរំលោភបំពាន រួមទាំងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ អំពីចរិតលក្ខណៈនិងកលល្បិចរបស់ជនល្មើស ដែលឧត្តម្មានុវត្តក្នុងការស៊ើបអង្កេត និងកិច្ចការពារជនរងគ្រោះ។
លោកថា៖ «រាជរដ្ឋាភិបាលនៃព្រះរាជាណាចក្រកម្ពុជា បានកំណត់យកការងារការពារសិទ្ធិកុមារ និងការគាំពារកុមារពីការរំលោភបំពានផ្សេងៗតាមគ្រប់រូបភាព គឺជាការងារអាទិភាព ដោយហេតុថា កុមារគឺជាទំពាំងស្នងឫស្សី និងជាសសរទ្រូងរបស់ប្រទេសជាតិ ហើយការអភិវឌ្ឍកុមារ គឺជាកូនសោគន្លឹះដើម្បីសម្រេចបាននូវការកាត់បន្ថយភាពក្រីក្រ ក៏ដូចជាការអភិវឌ្ឍប្រកបដោយចីរភាពនៅក្នុងរយៈពេលវែង»។
វីអូឌី មិនអាចសុំការបញ្ជាក់បន្ថែមពីរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង បានទេ នៅថ្ងៃនេះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា រដ្ឋាភិបាលត្រូវចាត់វិធានការទប់ស្កាត់បញ្ហានេះឱ្យមានប្រសិទ្ធភាព ដើម្បីការពារសិទ្ធិកុមារ និងស្ត្រី កុំឱ្យមានការរំលោភបំពានបន្តទៀត ខណៈកន្លងមកសហរដ្ឋអាមេរិកបានចាត់ថ្នាក់ប្រទេសកម្ពុជាជាប់ចំណាត់ថ្នាក់លេខ២ ពាក់ព័ន្ធនឹងការជួញដូរមនុស្ស និងស្ថិតនៅក្រោមការត្រួតពិនិត្យនិងតាមដាន។
លោកបន្តថា បញ្ហាកេងប្រវ័ញ្ចផ្លូវភេទតាមប្រព័ន្ធអនឡាញ ជាវិធីសាស្ត្រថ្មីមួយសម្រាប់ជនឆ្លៀតឱកាសមួយចំនួនក្នុងការប្រើប្រាស់កេងប្រវ័ញ្ចផលប្រយោជន៍របស់ស្ត្រី និងកុមារ តាមរយៈការកេងប្រវ័ញ្ច និងបៀតបៀនផ្លូវភេទ។
លោក អំ សំអាត បានជំរុញដល់រដ្ឋាភិបាលបង្ហាញឆន្ទៈពិតប្រាកដក្នុងការទប់ស្កាត់និងជួយការពារជនរងគ្រោះ បើពុំនោះទេ នឹងធ្វើឱ្យប៉ះពាល់ដល់មុខមាត់រដ្ឋាភិបាល។
លោកថា៖ «កេរ្តិ៍ឈ្មោះយើងក៏មិនសូវល្អដែរ តាំងពីដាក់ចំណាត់ថ្នាក់ការជួញដូរមនុស្ស។ ទី២ វាប៉ះពាល់ទៅលើស្ត្រី និងកុមារ បញ្ហារងគ្រោះដោយសារការកេងប្រវ័ញ្ចផ្លូវភេទ និងការបៀតបៀនផ្លូវភេទតាមប្រព័ន្ធអនឡាញ ក៏វាធ្វើឱ្យជនរងគ្រោះដែលជាស្ត្រីនិងកុមារហ្នឹងអាចនឹងឱ្យពួកគេឈប់ប្រើប្រាស់ប្រព័ន្ធអនឡាញ ដូចជាបណ្ដាញសង្គមផ្សេងៗ ដើម្បីធានាពីសុវត្ថិភាពរបស់ខ្លួន អ៊ីចឹងវាប៉ះពាល់ច្រើន។ អ៊ីចឹងវាធ្វើឱ្យប៉ះពាល់សិទ្ធិប្រើប្រាស់ប្រព័ន្ធបច្ចេកវិទ្យា និងមួយទៀតនឹងធ្វើឱ្យប៉ះពាល់ធនធានមនុស្សសម្រាប់ថ្ងៃក្រោយ ជាពិសេសទៅលើកុមារ»។
យោងតាមការសិក្សាស្រាវជ្រាវស្ដីពី «ការវិភាគស្ថានភាពដំបូងនៃការកេងប្រវ័ញ្ចផ្លូវភេទកុមារតាមអនឡាញនៅកម្ពុជា ឆ្នាំ២០២០» របស់ក្រុមប្រឹក្សាជាតិកម្ពុជាដើម្បីកុមារ បង្ហាញថា ៦០ភាគរយនៃកុមារកម្ពុជាដែលបានចូលរួមក្នុងដំណើរការអង្កេត ត្រូវបានរាយការណ៍ថា ធ្លាប់បានជួបប្រទះហានិភ័យនៃការកេងប្រវ័ញ្ចផ្លូវភេទតាមអនឡាញ នៅពេលពួកគេប្រើប្រាស់អ៊ីនធឺណិត។
កាលពីថ្ងៃទី១៤ ខែកក្កដា ឆ្នាំ២០២១ រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា បើតាមការរាយការណ៍ពីសាធារណជនមកកាន់សមត្ថកិច្ច និងបណ្ដាញរាយការណ៍តាមអ៊ីនធឺណិត (Internet Hotline) គឺជាមធ្យមមានជាង១៥០ករណីក្នុង១ឆ្នាំ ដែលជាករណីសង្ស័យទាក់ទងនឹងការលួងលោមកុមារតាមអនឡាញ ការផលិត និងចែកចាយរូបភាព-សម្ភារអាសអាភាសកុមារ និងគំរាមខាងផ្លូវភេទ ជាដើម៕