សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ អំពាវនាវរកជំនួយសប្បុរសធម៌ ក្រោយវិវាទការងារជាមួយក្រុមហ៊ុនល្បែងមួយនេះបានបន្តជាង៤ខែ ដោយពុំទាន់ឈានដល់ការដោះស្រាយបញ្ចប់។
សេចក្ដីប្រកាសរបស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ចុះថ្ងៃទី២៧ ខែមេសា ឆ្នាំ២០២២ បានឱ្យដឹងថា កម្មករនិយោជិតដែលជាសមាជិកសហជីពណាហ្គាវើលដ៍ និងភាគច្រើនជាស្ត្រី បានធ្វើការតស៊ូមតិដើម្បីការពារសិទ្ធិសេរីភាពសហជីព និងសិទ្ធិការងាររបស់ខ្លួន អស់រយៈពេលជាច្រើនខែមកហើយ ចាប់តាំងពីថ្ងៃទី១៨ ខែធ្នូ ឆ្នាំ២០២១ ប៉ុន្តែនៅមិនទាន់ទទួលបានដំណោះស្រាយដ៏យុត្តិធម៌សម្រាប់ពួកគេនៅឡើយ។
ពួកគេថា ទោះបីជាមានការដោះលែងថ្នាក់ដឹកនាំ និងសកម្មជនសហជីពឱ្យនៅក្រៅឃុំជាបណ្ដោះអាសន្ននៅពាក់កណ្ដាលខែមីនា ឆ្នាំ២០២២នេះ ហើយមានការរៀបចំឱ្យមានកិច្ចប្រជុំរវាងក្រុមហ៊ុនណាហ្គាវើលដ៍ និងតំណាងកម្មករនិយោជិតចំនួន៦ដងកន្លងមកក៏ដោយ ប៉ុន្តែពួកគេមើលមិនឃើញពីចេតនាក្នុងការដោះស្រាយរបស់ក្រុមហ៊ុនណាហ្គាវើលដ៍ឡើយ។
បើតាមសហជីព ក្រុមហ៊ុនតែងតែបដិសេធរាល់សំណើរបស់កម្មករនិយោជិត បើទោះបីជាបុគ្គលិកបានបង្កើតជម្រើសផ្សេងៗ ដូចជា ការដោះដូររវាងបុគ្គលិកដែលទាមទារបន្តការងារនៅណាហ្គាជាមួយនឹងបុគ្គលិកដែលស្ម័គ្រចិត្តឈប់ជំនួស ថែមទាំងស្ម័គ្រចិត្តកាត់បន្ថយម៉ោងការងារ ដើម្បីសម្រួលដល់ក្រុមហ៊ុនជាដើម។
សហជីពណាហ្គាវើលដ៍បញ្ជាក់ថា៖ «នេះជាចេតនាចង់អូសបន្លាយពេលវេលា ដើម្បីដាក់គំនាបផ្នែកសេដ្ឋកិច្ចដល់កម្មករនិយោជិត បង្ខំឱ្យពួកគាត់បោះបង់យុត្តិធម៌និងសិទ្ធិការងាររបស់ខ្លួន ដោយសារក្នុងរយៈពេលនៃការតស៊ូតមតិនេះ កម្មករនិយោជិតមិនមានប្រាក់ខែនិងចំណូល ដើម្បីផ្គត់ផ្គង់ជីវភាពរស់នៅប្រចាំថ្ងៃឡើយ»។
សហជីពបន្ថែមថា ដើម្បីការពារសេរីភាពសហជីព សិទ្ធិការងារ និងយុត្តិធម៌សង្គម កម្មករនិយោជិតទាំងអស់ដែលភាគច្រើនជាស្ត្រី សុខចិត្តប្រឈមនឹងជីវភាពរស់នៅយ៉ាងលំបាក ដោយសារគ្មានចំណូល រីឯការចំណាយលើម្ហូបអាហារ ឈ្នួលផ្ទះ ទឹកភ្លើង ការសិក្សារបស់កូន ថ្នាំព្យបាលជំងឺ និងបំណុលផ្សេងៗនៅដដែល ប៉ុន្តែពួកគេនៅមានឆន្ទៈក្នុងការតស៊ូមតិបន្តរហូតដល់មានដំណោះស្រាយ។
ករណីនេះ សហជីពបានអំពាវនាវស្វែងរកជំនួយពីសាធារណជន សប្បុរសជនជាតិនិងអន្តរជាតិ ក៏ដូចជាស្ថាប័នសប្បុរសធម៌នានា ជួយចូលរួមឧបត្ថម្ភជាស្បៀង ថវិកា សម្ភារ ដល់សមាជិកសហជីពដែលកំពុងប្រឈមនឹងការខ្វះខាតជាក់ស្ដែងនាពេលបច្ចុប្បន្ននេះ ដើម្បីអាចឱ្យពួកគេទប់ទល់នឹងជីវភាពដ៏លំបាកនេះ៕
