រដ្ឋាករទឹកស្វយ័តក្រុងភ្នំពេញ អះអាងថា ខ្លួនបាននិងកំពុងពន្លឿនការងារសាងសង់រោងចក្រផលិតទឹកស្អាតថ្មីមួយទៀត នៅសង្កាត់បាក់ខែង ខណ្ឌជ្រោយចង្វារ ដែលគ្រោងនឹងបញ្ចប់ការសាងសង់ក្នុងឆ្នាំ២០២៣ ខណៈពលរដ្ឋរស់នៅក្នុងបុរីពិភពថ្មី ឈូកវ៉ា២ កំពុងខ្វះទឹកស្អាតប្រើប្រាស់។
ក្នុងសេចក្ដីជូនដំណឹងរបស់រដ្ឋាករទឹកស្វយ័តក្រុងភ្នំពេញ ស្ដីពីបញ្ហាកង្វះទឹកស្អាតនៅបុរីពិភពថ្មី ឈូកវ៉ា២ ចុះថ្ងៃទី២៨ ខែមេសា ឆ្នាំ២០២២ បានលើកឡើងថា ចាប់តាំងពីដើមឆ្នាំ២០២២មក ការរីករាលដាលនៃជំងឺកូវីដ-១៩ មានការថមថយ ដែលធ្វើឱ្យលំហូរពលរដ្ឋចូលមកកាន់រាជធានីភ្នំពេញ និងក្រុងតាខ្មៅ ខេត្តកណ្ដាល កាន់តែមានច្រើន ខណៈការវិនិយោគវិស័យសំណង់តូច-ធំ វិស័យពាណិជ្ជកម្ម វិស័យទេសចរណ៍ និងវិស័យផ្សេងៗជាច្រើនទៀតមានការកើនឡើងយ៉ាងឆាប់រហ័សពីមួយថ្ងៃទៅមួយថ្ងៃ ដែលជាហេតុនាំឱ្យមានតម្រូវការប្រើប្រាស់ទឹកស្អាតកើនឡើងខ្ពស់លើសពីសមត្ថភាពផលិត។
រដ្ឋាករទឹកស្វយ័តក្រុងភ្នំពេញ បញ្ជាក់ថា៖ «ដើម្បីឆ្លើយតបទៅនឹងកំណើនតម្រូវការប្រើប្រាស់ទឹកស្អាតនេះ រដ្ឋាករទឹកស្វយ័តក្រុងភ្នំពេញ បាននិងកំពុងពន្លឿនការងារសាងសង់រោងចក្រផលិតទឹកស្អាតថ្មីមួយទៀត នៅសង្កាត់បាក់ខែង ខណ្ឌជ្រោយចង្វារ ដែលនឹងគ្រោងបញ្ចប់ការសាងសង់ និងដាក់ឱ្យដំណើរការផលិតទឹកស្អាតក្នុងឆ្នាំ២០២៣ ហើយអាចផលិតទឹកស្អាតបានបន្ថែមប្រមាណ៤០០ ០០០ម៉ែត្រគូបក្នុងមួយថ្ងៃ លើសមត្ថភាពផលិតដែលមានស្រាប់៦០០ ០០០ម៉ែត្រគូបថ្ងៃ»។
រដ្ឋាករទឹកស្វយ័តក្រុងភ្នំពេញ បង្ហាញសុទិដ្ឋិនិយមថា ចាប់ពីឆ្នាំ២០២៣តទៅ ខ្លួននឹងមានសមត្ថភាពផលិតទឹកស្អាតសរុប១ ០០០ ០០០ម៉ែត្រគូបក្នុងមួយថ្ងៃ ដើម្បីបិទបញ្ចប់នូវបញ្ហាកង្វះទឹកស្អាតនៅរាជធានីភ្នំពេញ និងក្រុងតាខ្មៅ។
ជាដំណោះស្រាយក្នុងអំឡុងពេលមានបញ្ហាកង្វះទឹកស្អាតសម្រាប់ប្រជាពលរដ្ឋរស់នៅបុរីពិភពថ្មីឈូកវ៉ា២នេះ រដ្ឋាករទឹកថា ក្រុមការងាររបស់ខ្លួនបានដឹកជញ្ជូនទឹកស្អាតទៅបំពេញធុងទឹក សម្រាប់ចែកចាយឱ្យពលរដ្ឋនៅតំបន់នោះអាចទៅយកប្រើប្រាស់បាន។
ពលរដ្ឋរស់នៅបុរីពិភពថ្មីឈូកវ៉ា២ អ្នកស្រី ទៀង ឡាយលក្ខិណា ថ្លែងថា នៅទីតាំងដែលអ្នកស្រីរស់នៅកំពុងជួបបញ្ហាខ្វះទឹកស្អាតប្រើប្រាស់ប្រចាំថ្ងៃ ស្របពេលផ្ទះអ្នកស្រីបើកអាជីវកម្មទៀតនោះ ធ្វើឱ្យស្ថានភាពនេះគឺកាន់តែយ៉ាប់យ៉ឺនថែមទៀត។
អ្នកស្រីបន្តថា គាត់រស់នៅបុរីនេះជាង៣ឆ្នាំមកហើយ ខណៈឆ្នាំដំបូងមានទឹកប្រើគួរសមដោយសារប្រើម៉ូទ័រជំនួយ ប៉ុន្តែចាប់តាំងពីឆ្នាំ២០២១មក ទឹកចាប់ផ្ដើមខ្វះ ដោយសារតែពលរដ្ឋទៅរស់នៅក្នុងបុរីនោះកាន់តែច្រើន។
យ៉ាងណា អ្នកស្រីថា រដ្ឋាភិបាលបានប្រើវិធីបណ្ដោះអាសន្ន ដោយចែកចាយទឹកតាមស៊ីទែន ប៉ុន្តែទឹកនោះក៏ប្រើប្រាស់មិនគ្រប់គ្រាន់ដែរ។
អ្នកស្រី ទៀង ឡាយលក្ខិណា និយាយថា៖ «ដូចខ្ញុំអ៊ីចឹង នៅឆ្ងាយពីស៊ីទែនតិចដែរ! យើងមើលអត់ឃើញទេ យើងចង់ដឹងទាល់តែជិះទៅរកស៊ីទែនហ្នឹង បានដឹងថាស៊ីទែនហ្នឹងមានទឹកឬក៏អត់។ អ៊ីចឹងទាល់តែឧស្សាហ៍ជិះទៅមើល ព្រោះអីទឹកដាក់តែមួយភ្លែតគឺអស់ហើយ។ អត់មានថាចាំមួយម៉ោងឬពីរម៉ោងក្រោយបានទៅយកទេ ដោយសារ[អាកាសធាតុ]រាងក្ដៅអី គឺអត់ទេ។ បើឃើញទឹកមកហើយ គឺប្រញាប់ទៅយក បើមិនអ៊ីចឹងទេ យកអត់ទាន់គេ គឺអស់! អត់មានទឹកប្រើ»។
បើតាមអ្នកស្រី ទៀង ឡាយលក្ខិណា ពលរដ្ឋរស់នៅក្នុងបុរីមានប្រមាណជាង៤ ០០០ផ្ទះ ប៉ុន្តែផ្ទះទាំងនោះមានពលរដ្ឋរស់នៅប្រមាណតែ៦០% ទៅ៧០%ប៉ុណ្ណោះ ហើយពលរដ្ឋទាំងនោះសុទ្ធតែខ្វះទឹកស្អាតប្រើប្រាស់៕