ឧបការីរដ្ឋមន្ត្រីការបរទេសទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក នឹងមកបំពេញទស្សនកិច្ចនៅកម្ពុជា និងឡាវ ចាប់ពីថ្ងៃទី១ ដល់ថ្ងៃទី៧ ខែឧសភា ខណៈកម្ពុជាដែលជាប្រធានអាស៊ានផងនោះ នឹងត្រូវចូលរួមកិច្ចប្រជុំកំពូលពិសេសអាស៊ាន-អាមេរិក នៅទឹកដីប្រទេសមហាអំណាចមួយនេះនៅសប្តាហ៍ទី២ ក្នុងខែឧសភា។
សេចក្តីប្រកាសព័ត៌មានរបស់ការិយាល័យអ្នកនាំពាក្យក្រសួងការបរទេសអាមេរិក កាលពីថ្ងៃទី២៩ ខែមេសា បានឱ្យដឹងថា លោក Daniel J. Kritenbrink ឧបការីរដ្ឋមន្រ្តីក្រសួងការបរទេសសហរដ្ឋអាមេរិក សម្រាប់កិច្ចការតំបន់អាស៊ីបូព៌ា និងប៉ាស៊ីហ្វិក នឹងធ្វើទស្សនកិច្ចនៅប្រទេសកម្ពុជា និងឡាវ។
ក្រសួងការបរទេសបន្តថា ទស្សនកិច្ចនេះ នឹងផ្តោតលើការប្តេជ្ញាចិត្តរបស់សហរដ្ឋអាមេរិកចំពោះប្រទេសមានភាពរស់រវើកបំផុតក្នុងតំបន់ ដោយពង្រឹងបន្ថែមនូវមជ្ឈភាពអាស៊ាន ភាពជាដៃគូរវាងសហរដ្ឋអាមេរិក និងតំបន់ទន្លេមេគង្គ ដើម្បីដោះស្រាយបញ្ហាប្រឈមឆ្លងដែន និងជំរុញឱ្យអនុតំបន់ទន្លេមេគង្គមានវិបុលភាព ភាពបើកចំហ និងសន្តិសុខច្រើនថែមទៀត។
សេចក្តីប្រកាសព័ត៌មានអះអាងថា ក្នុងដំណើរទស្សនកិច្ចនៅកម្ពុជា ឧបការីក្រសួងការបរទេសរូបនេះ នឹងជួបមន្ត្រីជាន់ខ្ពស់កម្ពុជា ព្រមទាំងថ្នាក់ដឹកនាំអង្គការសង្គមស៊ីវិលផងដែរ។
សេចក្តីប្រកាសព័ត៌មានបន្ថែមថា៖ «នៅប្រទេសកម្ពុជា លោកឧបការីរដ្ឋមន្រ្តី Kritenbrink នឹងជួបជាមួយលោកប្រាក់ សុខុន ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស និងមន្ត្រីជាន់ខ្ពស់ដទៃទៀត ព្រមទាំងយុវជន និងថ្នាក់ដឹកនាំសង្គមស៊ីវិល ដើម្បីពិភាក្សាពីទំនាក់ទំនងទ្វេភាគីរបស់យើង និងការគាំទ្ររបស់អាមេរិក សម្រាប់កម្ពុជាក្នុងនាមជាម្ចាស់ផ្ទះកិច្ចប្រជុំអាស៊ាន» ។
ស្ថានទូតអាមេរិកប្រចាំកម្ពុជាក៏បានលើកឡើងដែរថា ទស្សនកិច្ចរបស់លោកឧបការី នឹងផ្តោតពីការប្តេជ្ញាចិត្តរបស់សហរដ្ឋអាមេរិក ចំពោះប្រជាជនកម្ពុជា និងការបន្តគាំទ្រកម្ពុជា ក្នុងនាមជាប្រធានកិច្ចប្រជុំអាស៊ាន។
ការិយាល័យអ្នកនាំពាក្យក្រសួងការបរទេសអាមេរិកឱ្យដឹងទៀតថា នៅប្រទេសឡាវ លោកឧបការីរដ្ឋមន្រ្តី Kritenbrink នឹងដឹកនាំកិច្ចពិភាក្សាសហរដ្ឋអាមេរិក-ឡាវ លើទំនាក់ទំនងទ្វេភាគីគ្រប់ជ្រុងជ្រោយ ដែលនិយាយពីកិច្ចសហប្រតិបត្តិការជិតស្និទ្ធរវាងប្រទេសទាំងពីរ។ លើសពីនេះ នឹងជំរុញទំនាក់ទំនងគ្នាស៊ីជម្រៅជាមួយឡាវ ក្នុងនាមជាសហប្រធាន ទាក់ទងនឹងភាពជាដៃគូរវាងសហរដ្ឋអាមេរិក និងតំបន់ទន្លេមេគង្គ ឆ្នាំ ២០២២។
ប្រភពដដែលបន្ថែមថា លោកឧបការី នឹងជួបជាមួយលោករដ្ឋមន្រ្តីការបរទេស Saleumxay Kommasith លោកអនុរដ្ឋមន្រ្តីការបរទេស Thongphane Savanphet និងមន្រ្តីគណ:កម្មការទន្លេមេគង្គ។
ក្នុងដំណើរទស្សនកិច្ចកម្ពុជា និងឡាវនេះ លោកឧបការីរដ្ឋមន្រ្តី Kritenbrink នឹងពិភាក្សាពីកិច្ចប្រជុំកំពូលពិសេសអាស៊ាន-អាមេរិក នៅពេលខាងមុខនេះ ដែលលោកប្រធានាធិបតី ចូ បៃឌិន នឹងរៀបចំនៅរដ្ឋធានីវ៉ាស៊ីនតោន(Washington) នៅថ្ងៃទី១២ និង១៣ ខែឧសភា។
កាលពីថ្ងៃទី១៦ ខែមេសា សេចក្តីថ្លែងការណ៍របស់ប្រធានអាស៊ាន បានលើកឡើងថា អាស៊ាន និងអាមេរិក នឹងរៀបចំកិច្ចប្រជុំកំពូលពិសេស នៅសប្តាហ៍ទី២ នៃខែឧសភា ដើម្បីអបអរសាទរទំនាក់ទំនងដៃគូសន្ទនាអាស៊ាន-សហរដ្ឋអាមេរិក ដែលមានវ័យ ៤៥ឆ្នាំមកហើយ។
សេចក្តីថ្លែងការណ៍បញ្ជាក់ថា ថ្នាក់ដឹកនាំអាស៊ាន និងប្រធានាធិបតី ចូ បៃឌិន នឹងពិភាក្សាគ្នាអំពីមធ្យោបាយ និងវិធីសាស្ត្រនានា ដើម្បីបង្កើនកិច្ចសហប្រតិបត្តិការក្នុងវិស័យជាច្រើនរួមមាន ការឆ្លើយតបនឹងជំងឺកូវីដ-១៩ សន្តិសុខ សុខភាពសកល ការផ្លាស់ប្តូរបញ្ហាអាកាសធាតុ ការអភិវឌ្ឍប្រកបដោយចីរភាព កិច្ចសហប្រតិបត្តិការលំហសមុទ្រ ការអភិវឌ្ឍធនធានមនុស្ស ការអប់រំ និងចំណងទាក់ទងរវាងប្រជាជន និងប្រជាជន ក៏ដូចជាការតភ្ជាប់ទំនាក់ទំនងសេដ្ឋកិច្ចជាដើម។
សេចក្តីថ្លែងការណ៍ប្រធានអាស៊ានឱ្យដឹងថា កិច្ចប្រជុំនេះ គឺជាកិច្ចប្រជុំកំពូលពិសេសលើកទី២ គិតពីឆ្នាំ ២០១៦ ហើយជាការជួបប្រជុំគ្នាដោយផ្ទាល់មុខលើកទី១ សម្រាប់ថ្នាក់ដឹកនាំអាស៊ាន គិតចាប់តាំងពីឆ្នាំ២០១៧ មក៕