មនុស្ស​២៤នាក់​ត្រូវឃុំខ្លួន​ពាក់ព័ន្ធ​បទល្មើស​នេសាទ​នៅ​បឹងទន្លេសាប​ក្នុង​ពេល​២ខែ​ចុងក្រោយនេះ

ក្រុមការងារប្រចាំការអនុវត្តបទបញ្ជាទប់ស្កាត់ និងបង្ក្រាបបទល្មើសនេសាទបឹងទន្លេសាប ឈរជើងនៅចំណុចឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ បានចុះបង្រ្កាបបទល្មើសនេសាទនៅចំណុចចាប់ពីបឹងធារ ដល់ព្រែកខ្វែងក្របី (ប៉ែកខាងក្នុង) ក្នុងភូមិសាស្រ្តឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ថ្ងៃទី១៩ ខែមេសា ឆ្នាំ២០២២។ (ហ្វេសប៊ុក៖ មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ)

របាយការណ៍របស់គណៈកម្មការអន្តរក្រសួង ឱ្យដឹង​ថា ក្នុងរយៈពេល​២ខែចុងក្រោយ​នេះ យ៉ាង​ហោចណាស់​ មនុស្ស២៤នាក់ត្រូវបានឃុំខ្លួន ក្នុងចំណោមជនសង្ស័យ​៤៥នាក់ ​ខណៈ​មនុស្ស​​​២០នាក់ត្រូវបាន​តុលាការ​​ចេញ​​​​ដីកា​កោះ​ហៅ និង​​​​ជាង៤ ៣០០​នាក់ទៀត​​ត្រូ​​វបាន​អប់រំ ពាក់​ព័ន្ធ​ការ​នេសាទ​​ខុ​ស​ច្បាប់​​​នៅ​បឹង​​ទន្លេសាប។

គណៈក​ម្ម​ការ​អន្ត​រក្រសួង​​ ដើម្បី​ទប់​ស្កាត់ និងបង្ក្រាបបទល្មើសនេសាទ​នៅបឹងទន្លេសាប បាន​ចេញ​ផ្សាយរបាយ​ការណ៍​​មួយ​កាលពីថ្ងៃទី២ ខែឧសភា​នេះ​ថា ការ​បង្ក្រាប​បទល្មើស​នេសាទខុសច្បាប់​នៅបឹងទន្លេ​សាប​ក្នុង​​រយៈ​​ពេល​​២​ខែ គឺ​ចាប់ពីថ្ងៃទី២ ខែមីនា ដល់​ថ្ងៃទី១ ខែឧសភា ឆ្នាំ២០២២ អាជ្ញាធរពាក់ព័ន្ធបាន​បញ្ជូនសំណុំ​រឿង​ទៅតុលាការ​​ចំនួន៤៤នាក់ ក្នុងចំណោមជនសង្ស័យ៤៥នាក់ ខណៈជនសង្ស័យ​២៤នាក់​ត្រូវបាន​ឃុំខ្លួន មនុស្ស​២០នាក់​ត្រូវបានតុលាការ​ចេញដីកាកោះហៅ និងមនុស្ស៤ ៣២៦នាក់ត្រូវបានអប់រំ​។

របាយការណ៍ដដែលបន្តថា ក្នុងប្រតិបត្តិការ​បង្ក្រាប​បទល្មើស​នោះ​ដែរ ​អាជ្ញាធរក៏បាន​ដកហូត​មធ្យោ​បាយប្រព្រឹត្ត​បទ​ល្មើស​នេសាទ​មួយចំនួន​ផងដែរ ក្នុង​នោះរួមមាន កាណូត ៧០គ្រឿង, ​ម៉ាស៊ីនកាណូត ២៥គ្រឿង, អួន​អូស​ទឹក​សាប ​៣៤វង់, ម៉ាញ់ ៣វង់, ឆក់ត្រជាក់​ឆក់​ក្ដៅ ៦៥៥គ្រឿង, ឈិប​យន្ត​ ៥គ្រឿង, អួន​ហ៊ុម ​១៦វង់,​ របាំង​ស្បៃមុង​ឬសាច់អួន ៤៩ ៤១០ម៉ែត្រ, លូឬលប ​៤៣៥​មាត់, និង​បង្គោលឬចម្រឹង​ ៥៨ ៥០៤ដើម។

វីអូឌី មិនអាចសុំការបញ្ជាក់បន្ថែមពីរដ្ឋមន្ត្រីក្រសួងកសិកម្ម រុក្ខាប្រមាញ់​ និងនេសាទ លោក វេង សាខុន បាន​ទេ ពា​ក់​ព័ន្ធ​ករណីនេះ។

ប៉ុន្តែលោកបានសរ​​សេរ​លើ​ហ្វេស​ប៊ុក​របស់​លោក​នៅ​ថ្ងៃនេះថា គណៈកម្មការអន្តរក្រសួង ដើម្បីទប់ស្កាត់ និង​បង្ក្រាប​បទល្មើសនេសាទនៅបឹងទន្លេសាប បានជួបប្រជុំគ្នាកាលថ្ងៃទី២ ខែ​ឧសភា​នេះ ដោយមានការ​ចូលរួមពី​​អគ្គស្នងការ​នគរបាលជាតិ​ លោក នេត សាវឿន មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា និង​អភិបាលខេត្ត​ទាំង​​៦​​នៅ​ជុំ​វិញ​បឹងទន្លេសាប ដើម្បីពិនិត្យ តាមដាន និងវាយតម្លៃលើលទ្ធផលការងារបង្ក្រាបបទល្មើសជលផលនៅបឹងទន្លេសាបក្នុងរយៈពេលកន្លងមក និងលើកទិសដៅបន្ត។

លោក វេង សាខុន បន្តថា ការប្រជុំពិភាក្សាលើការងារបង្ក្រាបបទល្មើសនៅបឹងទន្លេសាប និង​រៀបចំ​លើកទិស​ដៅបន្ត​នេះ គឺ​ដើម្បីអនុវត្តបទបញ្ជារបស់លោកនាយករដ្ឋមន្ត្រី ហ៊ុន សែន ឱ្យបានម៉ឺងម៉ាត់ មាន​ប្រសិទ្ធភាព​ខ្ពស់ និង​មាន​និរន្តរ​ភាព ដោយបា​ន​ដាក់ចេញនូវវិធានការចាំបាច់មួយចំនួន​នៅ​ចំពោះ​មុខ និង​​រយៈពេល​វែង​ ក្នុងការ​ទប់​ស្កាត់ រួមទាំង​​បង្ក្រាប​បទល្មើសជលផលខុសច្បាប់នៅបឹងធម្មជាតិមួយនេះ។

លោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមីនា ឆ្នាំ២០២២នេះ បានដាក់បទបញ្ជាផ្ទាល់មាត់ឱ្យ​កង​ទ័ព និង​កងកម្លាំងនគរបាលចូលរួមជាមួយក្រសួង​ស្ថាប័ន​ពាក់ព័ន្ធ ចុះ​បង្ក្រាប​​បទ​ល្មើសនេសាទខុសច្បាប់នៅលើបឹងទន្លេសាប ក្រោយ​លោក​ទទួលបានព័ត៌មានថា បទល្មើសនេសាទនៅបឹងធម្មជាតិមួយនេះកំពុង​កើត​ឡើងក្នុង​ទ្រង់ទ្រាយធំ។

សហ​​​​គមន៍​​នេសាទ​នៅខេត្តបា​ត់ដំបង ដែល​ជា​ខេត្តជាប់បឹង​ទន្លេសា​ប​ លោក ជា សារិន មានប្រសាសន៍ថា បច្ចុប្បន្ននេះ​ បទល្មើសនេសាទនៅបឹងទន្លេសាបនៅតែបន្តកើតមានជាលក្ខណៈទ្រង់​ទ្រាយ​តូចៗ។ លោកថា បទល្មើសនេះ​បន្តកើតមានដោយសារការ​គប់គិតគ្នាជាប្រព័ន្ធរវាងមន្ត្រីនិងជន​ល្មើ​ស​។

លោក ជា សារិន បន្តថា នៅពេលដែលលោករាយការណ៍ឬលើកឡើងពីបទល្មើសនេះ ត្រូវមន្ត្រី​ជល​ផលរើស​អើង និង​លាប​ពណ៌​ថាជា​ពួកប្រឆាំងទៅវិញ។

លោកបន្ថែមថា៖ «បើចង់លុបបំបាត់បទល្មើសនេះឱ្យស្អាតល្អ ទាល់​តែ​ដូរ​នាយខណ្ឌ ដូរប្រធានមន្ទីរកសិកម្ម កុំឱ្យ​នៅដដែល។​ ដូច្នេះ វាមានបណ្ដាញ វាខ្សែរបក្ខពួកវាម៉ាគ្រប់។ បើដូរ២ឆ្នាំម្ដង​ ឱ្យ​ទៅ​ខេត្ត​នេះ ទៅខេត្ត​នោះ អ៊ីចឹង​វាស្គាល់អត់អស់ទេ អ៊ីចឹង​វារកពេលឆ្លៀត​គប់គិតគ្នាអត់បាន»

ថ្លែង​ក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ​៥១ នៅ​ខេត្ត​កំពង់​ស្ពឺ កាល​ពីថ្ងៃទី​២៥ ខែមីនា ឆ្នាំ២០២២ លោ​​​​ក​​នា​​យករ​ដ្ឋ​មន្ត្រី ហ៊ុ​ន​ សែន​ លើកឡើ​ង​ថា​​ ប​​ទ​ល្មើស​​នេសា​ទ​​នៅ​​​បឹ​ង​ទ​​ន្លេ​​សា​​​​​​​បនៅតែបន្តកើតឡើង ​​​​​​​ដោយ​​សា​​​​រ​​តែ​​ម​​ន្ត្រី​អ​នុ​វ​ត្តច្បាប់​​​​ធ្វើ​ការបង្ក្រាប​តែពេល​លោ​​​​​កក្រើ​​នរ​ម្លឹក​ប៉ុណ្ណោះ ដែ​​លករណីនេះ ធ្វើឱ្យវិធា​ន​ការទប់​ស្កា​ត់​​បទល្មើសដែលបានដាក់ចេញគ្មានប្រសិទ្ធភាព៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ