សហរដ្ឋអាមេរិក សហការជាដៃគូជាមួយ COVAX អង្គការ UNICEF និងអង្គការសុខភាពពិភពលោក បានផ្ដល់ជំនួយវ៉ាក់សាំងកូវីដ-១៩ ប្រភេទ Pfizer ចំនួន២លានដូស ដល់កម្ពុជា ដើម្បីជួយបង្ការពីការឆ្លងរាលដាលជំងឺកូវីដ-១៩ ប្រភេទថ្មីដ៏គ្រោះថ្នាក់។
វ៉ាក់សាំងដែលជាជំនួយរបស់អាមេរិកនេះបានមកដល់កម្ពុជានៅព្រឹកថ្ងៃអង្គារនេះ។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា មានប្រសាសន៍តាមរយៈសេចក្ដីប្រកាសព័ត៌មានរបស់ស្ថានទូតមួយនេះថា សហរដ្ឋអាមេរិកចាត់ទុកការសម្រេចបាននូវសន្តិសុខផ្នែកសុខភាពជាអាទិភាពខ្ពស់មួយ និងបន្តធ្វើការជាមួយដៃគូនៃយន្តការ កូវ៉ាក់ (COVAX) ដើម្បីធានាឱ្យប្រជាជនជុំវិញពិភពលោកទទួលបាននូវវ៉ាក់សាំងប្រឆាំងជំងឺកូវីដ-១៩។
លោកបន្តថា៖ «ជាមួយការរួមចំណែកនេះ សហរដ្ឋអាមេរិកបញ្ជាក់ជាថ្មីនូវការប្ដេជ្ញាចិត្តដ៏យូរអង្វែងរបស់ខ្លួនចំពោះសុខភាព និងសុខុមាលភាពរបស់ប្រជាជនកម្ពុជា»។
បើតាមសេចក្ដីប្រកាសព័ត៌មានដដែល មកដល់ពេលនេះ សហរដ្ឋអាមេរិកបានផ្ដល់ជំនួយនូវវ៉ាក់សាំងជាង៣លានដូស និងជំនួយបន្ថែម១៦លានដុល្លារ តាមរយៈទីភ្នាក់ងារជំនួយអាមេរិក USAID ព្រមទាំងបានផ្តល់ជំនួយបច្ចេកទេសសំខាន់ៗតាមរយៈទីភ្នាក់ងារសុខាភិបាលសាធារណៈរបស់អាមេរិកជាច្រើនទៀត ក្នុងពេលមានជំងឺរាតត្បាត ដោយគាំទ្រដល់ការឃ្លាំមើល ការតាមដានអ្នកពាក់ព័ន្ធ ពង្រឹងសមត្ថភាពយល់ដឹងជាសាធារណៈ និងការស្រាវជ្រាវ ដើម្បីទប់ស្កាត់ការរីករាលដាលនៃមេរោគកូវីដ-១៩៕
