អាជ្ញាធរកម្ពុជា កាលពីសប្ដាហ៍មុន បានបើកប្រតិបត្តិការមួយនៅទីតាំងអគារ «ជីងកាង» ក្នុងខេត្តព្រះសីហនុ ដោយអះអាងថា ពួកគេអនុវត្តវិធានការរដ្ឋបាលប្រឆាំងនឹងជនអន្តោប្រវេសន៍វៀតណាមខុសច្បាប់។
ប៉ុន្តែអស់រយៈពេលជាងមួយសប្ដាហ៍មកនេះ វីដេអូជាច្រើនត្រូវបានបែកធ្លាយចេញពីអ្នកដែលស្នាក់នៅក្នុងទីតាំងខាងលើដោយពួកគេហាក់បង្ហាញជាក្ដីសង្ឃឹមថាខ្លួននឹងមានសេរីភាពក្នុងពេលឆាប់ៗនេះ។
យោងតាមវីដេអូដកស្រង់ចេញពីអ្នកប្រើប្រាស់មួយនៃបណ្ដាញសង្គមទីកតុក (TikTok) ជាភាសាវៀតណាម បានរៀបរាប់ថា៖ «លាហើយក្រុងព្រះសីហនុ យើងលែងបានជួបគ្នាទៀតហើយ»។
វីដេអូមួយផ្សេងទៀតនៃអ្នកប្រើបណ្ដាញសង្គមដដែលបានឱ្យដឹងដែរថា៖ «រង់ចាំថ្ងៃវិលត្រលប់ [ទៅស្រុកកំណើតវិញ]»។
អ្នកបង្ហោះវីដេអូខាងលើនេះបានបន្តឱ្យដឹងនៅក្នុងការអត្ថាធិប្បាយថា ពួកគេត្រូវបានចាញ់បោកឱ្យមកកាន់ខេត្តព្រះសីហនុ ហើយសមត្ថកិច្ចនិងស្ថានទូតវៀតណាមបានជួយសង្គ្រោះពួកគេ។ វីដេអូមួយចំនួនផ្សេងទៀតក៏បានរៀបរាប់ទាក់ទងនឹងការជួយសង្គ្រោះ ដោយពួកគេរំពឹងថា វិធានការនេះអាចនឹងត្រូវបានអនុវត្តនៅទូទាំងទីក្រុងឆ្នេរសមុទ្រមួយនេះ។
ទាក់ទិននឹងករណីនេះ អ្នកសារព័ត៌មានក៏សង្កេតឃើញមានវីដេអូជាច្រើនផ្សេងទៀតជាភាសាវៀតណាម ដែលត្រូវបានបង្ហោះតាំងពីចុងខែមេសា ចេញពីបរិវេណទីតាំងអគារជីងកាងនេះផងដែរ។ នៅក្នុងវីដេអូទាំងនោះ យើងឃើញមានមនុស្សម្នាជាច្រើនបានប្រមូលផ្ដុំគ្នាជាមួយនឹងអីវ៉ាន់របស់ពួកគេរៀងៗខ្លួន ក្រោមការឃ្លាំមើលដោយសមត្ថកិច្ច។
នៅក្នុងវីដេអូមួយដែលដាក់ចំណងជើងថា «សេរីភាពក្នុងពេលឆាប់ៗ» ដែលបានបង្ហោះកាលពីមួយសប្ដាហ៍មុន ក្នុងនោះមានបុរសនិងស្ត្រីរាប់សិបនាក់ត្រូវបានមើលឃើញថា កំពុងតែអង្គុយនៅលើឥដ្ឋ ដោយមានអ្នកខ្លះពាក់ស្បែកជើងផ្ទាត់ និងអ្នកខ្លះជើងទទេ។ នៅក្នុងវីដេអូនោះ យើងក៏សង្កេតឃើញមានមន្ត្រីម្នាក់ក្នុងឯកសណ្ឋានពណ៌បៃតងឈរទល់មុខពួកគេផងដែរ ដោយហាក់ដូចជាកំពុងតែធ្វើការណែនាំពីសេចក្ដីជូនដំណឹងអ្វីមួយ។
ម្ចាស់គណនីដែលបង្ហោះវីដេអូនោះបានបន្តឱ្យដឹងនៅក្នុងការអត្ថាធិប្បាយថា ពួកគេមិនត្រូវបង់ប្រាក់ដើម្បីជាថ្នូរនឹងការជួយសង្គ្រោះឱ្យចាកចេញឡើយ បន្ទាប់ពីសមត្ថកិច្ចចូលមកអន្តរាគមន៍ក្នុងទីតាំងនេះ។
ទោះជាយ៉ាងណា ម្ចាស់គណនីដែលបង្ហោះវីដេអូទាំងនេះ មិនអាចទាក់ទងដើម្បីសុំការអធិប្បាយបន្ថែមតាមរយៈប្រព័ន្ធផ្សព្វផ្សាយសង្គមរបស់ពួកគេបានទេ។
ស្រ្តីម្នាក់ដែលមានតូបនៅក្បែរទីតាំងអគារ ជីងកាង កាលពីសប្ដាហ៍មុន បានប្រាប់ វីអូឌី ឱ្យដឹងថា លោកស្រីនិងប្តីរបស់ខ្លួនកាលពីពេលកន្លងទៅ ធ្លាប់ត្រូវបានអនុញ្ញាតឱ្យចូលទៅក្នុងបរិវេណអគារ [ជីងកាង]ខាងលើ ដើម្បីលក់របស់របរមួយចំនួន ប៉ុន្តែពីមួយថ្ងៃទៅមួយថ្ងៃ សកម្មភាពនេះត្រូវបានហាមឃាត់បន្តិចម្ដងៗ។
ក្នុងរយៈពេលប៉ុន្មានឆ្នាំចុងក្រោយនេះ មនុស្សដែលស្នាក់នៅក្នុងបរិវេណអគារនោះដូចជាមានការផ្លាស់ប្ដូរពីជនជាតិថៃទៅជាជនជាតិវៀតណាម ខណៈសកម្មភាពនានានៅក្នុងទីតាំងក៏ត្រូវបានរឹតត្បិតកាន់តែខ្លាំងផងដែរ។ នេះបើតាមការបញ្ជាក់ឱ្យដឹងដោយស្ត្រីខាងលើ។
ស្ត្រីរូបនេះបន្តអះអាងថា ខ្លួនក៏ធ្លាប់បានឃើញមនុស្សចំនួន៣នាក់ ក្នុងករណីផ្សេងៗគ្នា លោតចុះពីលើអគារ គិតចាប់តាំងពីឆ្នាំមុន ដែលករណីចុងក្រោយនេះទើបតែកើតឡើងកាលពីខែមេសាថ្មីៗនេះ។
ទាក់ទិននឹងសំណួរអំពីករណីមនុស្សធ្លាក់ពីលើអគារទាំងនេះ មន្ត្រីរដ្ឋបាលភូមិមួយរូបបានឱ្យដឹងថា រឿងនេះគឺជាករណីទូទៅដែលកើតឡើងនៅក្នុងតំបន់នេះទៅហើយ ដោយលោកមិនបានបញ្ជាក់លម្អិតថាតើករណីនេះធ្លាប់កើតឡើងនៅអគារ ជីងកាង ឬយ៉ាងណានោះទេ។
យោងតាមការយល់ឃើញដោយប្រភពដដែល ការបញ្ជូនមនុស្សចេញពីអគារនាពេលថ្មីៗនេះ គឺត្រូវបានចាប់ផ្ដើមធ្វើឡើងបន្ទាប់ពីមានករណីមនុស្សរាប់សិបនាក់ប្រដាប់ដោយអាវុធកែច្នៃនៅក្នុងទីតាំងនោះ បានវាយប្រហារលើក្រុមសន្តិសុខរបស់ខ្លួន ដែលបង្កឱ្យមានជាការប៉ះទង្គិចគ្នា។ ទោះជាយ៉ាងណា ករណីនេះមិនអាចសុំការបញ្ជាក់បានពីអាជ្ញាធរនោះទេ។
ស្ត្រីដែលសុំមិនបញ្ចេញឈ្មោះរូបនេះបន្ថែមថា បើទោះបីជាខ្លួនមិនបានឃើញហេតុការណ៍ខាងលើនេះដោយផ្ទាល់ ប៉ុន្តែខ្លួននៅពេលនោះបានជួយនាំសាច់ញាតិដែលបម្រើការជាសន្តិសុខទៅកាន់មន្ទីរពេទ្យដើម្បីពិនិត្យមើលរបួសផងដែរ។
ស្ត្រីរូបនេះបន្តថា៖ «នៅពេលដែលយើងសួរសំណួរច្រើន គាត់ [ជនរងគ្រោះជាសន្តិសុខ] បានត្រឹមតែងក់ក្បាលហើយយំប៉ុណ្ណោះ»។
បន្ទាប់ពីមានហេតុការណ៍នោះកើតឡើង ប្រភពដដែលបន្ថែមថា ខ្លួនចាប់ផ្ដើមសង្កេតឃើញមានមនុស្សរាប់រយនាក់បានបង្ហាញខ្លួនចេញពីអគារ ហើយត្រូវបានគេបញ្ជូនចេញពីបរិវេណទីតាំងនោះ។
គួរបញ្ជាក់ថា ទីតាំងនៃអគារនេះមានចម្ងាយប្រមាណជា ២ គីឡូម៉ែត្រ ពីតំបន់ឆៃណាថោន និងនៅកៀកបញ្ជាការដ្ឋានកងរាជអាវុធហត្ថខេត្ត។ ឆៃណាថោន គឺជាតំបន់មួយដែលល្បីឈ្មោះទាក់ទងនឹងការប្រព្រឹត្តសកម្មភាពខុសច្បាប់នានា ដែលរួមមានការឃុំឃាំង និងបង្ខំឱ្យធ្វើការក្នុងប្រតិបត្តិការឆបោកតាមប្រព័ន្ធអនឡាញ ជាដើម។
ជនរងគ្រោះទាំងឡាយធ្លាប់បានអះអាងថា ពួកគេត្រូវបានចាញ់បោកឱ្យមកធ្វើការនៅកម្ពុជា ហើយត្រូវបានឃុំឃាំងនៅក្នុងអគារ ដោយពួកគេអាចចាកចេញពីទីតាំងបាន លុះត្រាតែបង់ប្រាក់រាប់ពាន់ដុល្លារជាថ្នូរនឹងការដោះលែង។
មន្ត្រីនគរបាលដែលធ្វើការយាមកាមនៅអគារ ជីងកាង បានចង្អុលមកអ្នកកាសែតដែលកំពុងថតសកម្មភាពខាងក្នុងបរិវេណអគារ ជីងកាង ថ្ងៃទី២៩ ខែមេសា ឆ្នាំ២០២២។ (ម៉ិច ដារ៉ា)
កាលពីថ្ងៃសុក្រសប្ដាហ៍មុន អ្នកយកព័ត៌មានមួយរូបរបស់ វីអូឌី ក៏ត្រូវបាននាំខ្លួនចូលទៅក្នុងបរិវេណអគារ ជីងកាង និងត្រូវបានប៉ូលិសអន្តោប្រវេសន៍ឃាត់ខ្លួនពីបទថតរូបភាពលើផ្លូវសាធារណៈផងដែរ។
ស្ថិតក្នុងបរិវេណអគារនោះ អ្នកយកព័ត៌មានខាងលើបានសង្កេតឃើញមានមន្ត្រីប៉ូលិសប្រមាណជា៥០នាក់ ដែលភាគច្រើនមកពីខាងអន្តោប្រវេសន៍ ព្រមទាំងមន្ត្រីកងរាជអាវុធហត្ថខេត្តមួយចំនួនផងដែរ។ ជាមួយគ្នានេះ អ្នកយកព័ត៌មានដដែលក៏ប្រទះឃើញមានមនុស្សប្រមាណជា២០០នាក់ ដែលកំពុងតែរង់ចាំបុរសម្នាក់ពាក់អាវពណ៌សដើម្បីហៅឈ្មោះរបស់ពួកគេ។
ពួកគេទាំងអស់នោះ បន្ទាប់មកបានដើរឆ្ពោះទៅកាន់ឡានក្រុងចំនួន៤គ្រឿង ហើយបានចេញពីបរិវេណអគារនៅម៉ោងប្រមាណជា៩ព្រឹក ថ្ងៃដដែល។ មន្ត្រីអន្តោប្រវេសន៍មួយរូបនៅពេលនោះបានប្រាប់ទៅកាន់មន្ត្រីនានារបស់ខ្លួនថា ប្រតិបត្តិការត្រូវបានបញ្ចប់ហើយ។
ទាក់ទិននឹងសំណួរអំពីការបញ្ជូនជនជាតិវៀតណាមចេញពីបរិវេណទីតាំងនេះ ស្នងការនគរបាលខេត្តព្រះសីហនុ លោក ជួន ណារិន្ទ បានធ្វើការបញ្ជាក់យ៉ាងខ្លីថា ប្រតិបត្តិការនេះគឺជាករណីធម្មតា ខណៈសមត្ថកិច្ចតែងតែធ្វើការនិរទេសជនអន្តោប្រវេសន៍ខុសច្បាប់ចេញពីប្រទេស។
លោកថា៖ «ពេលដែលពួកគេមកធ្វើការដោយខុសច្បាប់ ហើយយើងរកឃើញពីករណីនេះ យើងនឹងបញ្ជូនពួកគេត្រលប់ទៅវិញ។ ប្រសិនបើយើងរកឃើញថាពួកគេស្របច្បាប់ យើងនឹងអនុញ្ញាតឱ្យពួកគេបន្តស្នាក់នៅ។ យើងកំពុងតែពិនិត្យមើលថាតើពួកគេប៉ុន្មាននាក់មានលិខិតឆ្លងដែន»។
ជាមួយគ្នានេះ អ្នកនាំពាក្យសាលាខេត្តព្រះសីហនុ លោក ឃាង ភារម្យ ក៏បានឱ្យដឹងកាលពីសប្ដាហ៍មុនថា អាជ្ញាធរគ្រាន់តែធ្វើការបញ្ជូនជនអន្តោប្រវេសន៍ដែលធ្វើការខុសច្បាប់ចេញតែប៉ុណ្ណោះ។
លោកថា៖ «វាគឺជាការអនុវត្តវិធានការរដ្ឋបាលចំពោះជនបរទេស និងស្វែងរកថាតើពួកគេណាខ្លះជាជនជាតិវៀតណាមដែលឆ្លងចូលតាមខេត្តព្រះសីហនុដោយខុសច្បាប់»។
ស្ថានទូតវៀតណាមប្រចាំកម្ពុជា មិនបានធ្វើការឆ្លើយតបទៅនឹងសំណួរដែលដាក់តាមរយៈអ៊ីម៉េល (Email) ឡើយ។
អាជ្ញាធរខេត្តជាប់មាត់សមុទ្រមួយនេះ កាលពីពេលកន្លងមក ក៏ធ្លាប់បានចាត់ទុកករណីនៃការឃុំខ្លួន និងការធ្វើទារុណកម្មនៅបរិវេណប្រតិបត្តិការឆបោកទាំងឡាយ ថាជាការបំផ្លើសការពិតផងដែរ។
ទាក់ទិននឹងសំណួរអំពីប្រតិបត្តិការនៅអគារ ជីងកាង ដដែល អ្នកនាំពាក្យអគ្គនាយកដ្ឋានអន្តោប្រវេសន៍កម្ពុជា លោក កែវ វ៉ាន់ថន ក្នុងសប្ដាហ៍នេះ បានទទួលស្គាល់ថា សមត្ថកិច្ចពិតជាមានការចូលទៅកាន់ទីតាំងអគារនេះ ដោយថាជនជាតិវៀតណាមចំនួន២០៣នាក់ត្រូវបានចាប់ខ្លួន កាលពីថ្ងៃទី២៩ ខែមេសា និងត្រូវបានបញ្ជូនចេញនៅថ្ងៃទី ១ ខែឧសភា។
យោងតាមលោក ឃាង ភារម្យ ទីតាំងអគារ ជីងកាង នេះមិនត្រូវបានបិទនោះទេ ខណៈអភិបាលរងខេត្តព្រះសីហនុ លោក លៀម សូដា ក៏បានបញ្ជាក់ថា គ្មានអ្នកណាម្នាក់ត្រូវបានបញ្ជូនទៅតុលាការឡើយក្នុងករណីនេះ។
មេភូមិ៤ ក្នុងសង្កាត់លេខ៤ ក្រុងព្រះសីហនុ លោក ហេង ប៊ុនលី បានឱ្យដឹងថា ខ្លួនមិនបានដឹងថាមានអ្វីកើតឡើងនៅក្នុងអគារនោះ មុនពេលសមត្ថកិច្ចចុះទៅធ្វើប្រតិបត្តិការឡើយ។
លោកថា៖ «យើងមិនដឹងថា ពួកគេ[ជីងកាង]ធ្វើអាជីវកម្មអ្វីនៅក្នុងអគាររបស់ពួកគេឡើយ ដោយសារតែយើងមិនអាចចូលទៅក្នុងអគាររបស់ពួកគេបាន។ យើងមិនដឹងថាតើមានអ្វីនៅខាងក្នុងនោះទេ។ យើងមិនដែលចូលក្នុងអគារសូម្បីតែម្ដង ខណៈទីតាំងនោះត្រូវបានយាមកាមយ៉ាងតឹងរ៉ឹងដោយសន្តិសុខ។ បើទោះបីខ្ញុំប្រើប្រាស់នាមជាមេភូមិសុំគេ[ក្រុមហ៊ុន]ចូល ក៏គេមិនអនុញ្ញាតឱ្យយើងចូលដែរ។»
សមាជិករដ្ឋបាលភូមិមួយរូបដែលសុំមិនបញ្ចេញឈ្មោះបានឱ្យដឹងថា នៅក្នុងតំបន់នោះក៏មានករណីមនុស្សបានយកវាំងននមកចងជាប់គ្នា ដើម្បីព្យាយាមតោងឡើងចេញពីអគារមួយចំនួននៅក្នុងតំបន់ផងដែរ។
លោកបន្ថែមថា ក្នុងតំបន់នោះមានករណីអំពើហិង្សា ហើយក្នុងនោះក៏មានមនុស្សធ្លាក់ពីលើអគារមួយចំនួនផងដែរ ។
លោកថា៖ «ក្នុងចំណោមករណីធ្លាក់មនុស្សពីលើអគារ ក្នុងនោះមានមួយចំនួនត្រូវបានយកទៅទុកចោលនៅមន្ទីរពេទ្យ ខណៈខ្លះទៀតត្រូវបានគេចាប់យកមកវាយដំបន្ថែម ហើយបញ្ជូនត្រលប់ទៅកាន់អគារវិញ»។
លោកបន្តថា៖ «ពួកគេទាំងអស់នោះភាគច្រើនជំពាក់បំណុលគេ។ ថៅកែរបស់ពួកគេបានចាប់ចាក់សោពួកគេទុកមិនឱ្យចេញទៅក្រៅ ដោយខ្លាចពួកគេធ្វើឱ្យបែកធ្លាយព័ត៌មានចេញក្រៅ»៕
បកប្រែនិងសម្រួលដោយលោក ភុន ច័ន្ទឧសភា ចេញពីអត្ថបទដើមភាសាអង់គ្លេស៖ Behind Closed Gates: 200 Vietnamese Quietly Removed From S’ville Compound