គណៈកម្មាធិការជាតិរៀបចំការបោះឆ្នោត (គ.ជ.ប) គ្រោងនឹងបញ្ចប់ការបោះពុម្ពសន្លឹកឆ្នោតបម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់ នៅចុងខែឧសភានេះ ខណៈរោងពុម្ពដែលដេញថ្លៃបានក្នុងការផលិតសន្លឹកឆ្នោតនេះ គឺជារោងពុម្ពចាស់ដដែល។
អគ្គលេខាធិការរង គ.ជ.ប លោក សោម សូរីដា បានប្រាប់ វីអូឌី នៅថ្ងៃសុក្រនេះថា មកដល់ពេលនេះ សន្លឹកឆ្នោតដែលកំពុងតែផលិត គឺបាន១៨រាជធានី-ខេត្តហើយ ហើយក្នុងដំណាក់កាលនៃការបង្ហាញពីសង្វាក់ផលិតនេះ គឺក្រុមការងាររោងពុម្ពកំពុងផលិតសន្លឹកឆ្នោតសម្រាប់រាជធានី-ខេត្តទី១៩។
បើតាមអគ្គលេខាធិការរងរូបនេះ ជាផែនការនៃការផលិតសន្លឹកឆ្នោត ឬសន្លឹកឆ្នោតដែលបោះពុម្ពនេះ នឹងត្រូវបិទបញ្ចប់ទាំងស្រុងនៅចុងខែឧសភាខាងមុខនេះ។
លោកបន្តថា៖ «តាមការរំពឹងទុក ហើយក្នុងផែនការនៃការរៀបចំផលិតសន្លឹកឆ្នោតនេះ គឺសន្លឹកឆ្នោតនេះនឹងត្រូវបញ្ចប់ត្រឹមថ្ងៃទី២៧ ឬទី២៨ ខែឧសភា។ អ៊ីចឹងទេ! គ.ជ.ប មានពេលវេលាគ្រប់គ្រាន់ដើម្បីបញ្ជូនសន្លឹកឆ្នោតនេះទៅកាន់រាជធានី-ខេត្តរៀបចំការបោះឆ្នោត ដើម្បីបន្តទៅគណៈកម្មការឃុំសង្កាត់រៀបចំការបោះឆ្នោត និងបែងចែកទៅតាមការិយាល័យចំណុះឱ្យឃុំសង្កាត់នីមួយៗ »។
ការថ្លែងដូច្នេះរបស់លោក សោម សូរីដា អគ្គលេខាធិការរង គ.ជ.ប ធ្វើឡើងក្រោយពេលបិទបញ្ចប់ការបង្ហាញពីសង្វាក់ផលិតសន្លឹកឆ្នោតនៅរោងពុម្ពមួយ ស្ថិតក្នុងសង្កាត់បឹងកក់ទី១ ខណ្ឌទួលគោក នៅព្រឹកថ្ងៃទី៦ ខែឧសភានេះ។
លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត ដែលបានចូលរួមនៅក្នុងពិធីបង្ហាញពីសង្វាក់ផលិតដែរ ឱ្យដឹងថា សន្លឹកឆ្នោតនេះ គឺត្រូវផលិតចំនួន ១ ៦៥២ ប្រភេទ។ សន្លឹកឆ្នោតដែលបានផលិតក្នុងទំហំដ៏ច្រើនបែបនេះ បើតាមលោក ប្រាជ្ញ ចន្ទ គឺដើម្បីធៀបទៅនឹងឃុំសង្កាត់ដែលកម្ពុជាមានដូចក្នុងពេលបច្ចុប្បន្នដែរ។
អ្នកនាំពាក្យ គ.ជ.ប លោក ពង្ស ពុទ្ធា ប្រាប់ក្រុមអ្នកសារព័ត៌មានក្រោយបិទបញ្ចប់ដំណើរទស្សនកិច្ច និងការពិនិត្យពីសង្វាក់ផលិតនៅក្នុងរោងពុម្ព ថាគិតត្រឹមថ្ងៃទី៦ ខែឧសភានេះ សន្លឹកឆ្នោតដែលបានផលិត គឺបាន១៨រាជធានី-ខេត្តហើយ។ ហើយចំនួនរាជធានី-ខេត្តដទៃទៀតដែលនៅសេសសល់ ដូចជា ខេត្តកែប ព្រះសីហនុ កំពង់ធំ និងរាជធានីភ្នំពេញ ជាដើម គ.ជ.ប កំពុងបន្តពន្លឿនសង្វាក់នៃការផលិត។
លោក ហង្ស ពុទ្ធា អះអាងថា ជាផែនការ មុន១សប្ដាហ៍នៃថ្ងៃបោះឆ្នោត គឺសន្លឹកឆ្នោតដែលនៅសេសសល់ត្រូវតែបោះពុម្ពឱ្យបានចប់រួចរាល់។
ដោយឡែក សន្លឹកឆ្នោតដែលបោះពុម្ពបម្រុងពេលខូចខាតជាង១លានសន្លឹក គឺមានលក្ខណៈពិសេសដែលមិនអាចយកទៅបោះឆ្នោត ដើម្បីបន្លំបានទេ។ តែយ៉ាងណា មន្ត្រី គ.ជ.ប មិនបានលម្អិតពីលក្ខណៈពិសេសអំពីសន្លឹកឆ្នោតបម្រុងនេះទេ។ ការបង្ហាញលក្ខណៈពិសេសនៃសន្លឹកឆ្នោតបម្រុងនេះត្រូវបានលោក សោម សូរីដា អះអាងថា វាលែងជាការសម្ងាត់នៃសន្លឹកឆ្នោតបម្រុងហើយ។
ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥នេះ គ.ជ.ប គ្រោងចំណាយថវិកាប្រមាណ ២លាន ៥០ម៉ឺនដុល្លារអាមេរិក ក្នុងការបោះពុម្ពសន្លឹកឆ្នោត។
បើតាម គ.ជ.ប ជាផែនការសន្លឹកឆ្នោតដែលត្រូវបោះពុម្ពសម្រាប់អាណត្តិទី៥នេះ មានចំនួនជាង ១១លាន ៦សែនសន្លឹក ខណៈសន្លឹកឆ្នោតដែលផលិតបម្រុងទុកមានជាង ១លាន ២០ម៉ឺនសន្លឹក។
អគ្គលេខាធិការរង គ.ជ.ប លោក សោម សូរីដា ឱ្យដឹងថា ការបង្កើនតួលេខនៃការបោះពុម្ពសន្លឹកឆ្នោតដែលមានទំហំច្រើនជាងអាណត្តិទី៤ ដោយសារចំនួនអ្នកមានឈ្មោះក្នុងបញ្ជីបោះឆ្នោតបន្តកើនឡើង។ ផ្អែកទិន្នន័យដែលចេញដោយ គ.ជ.ប បង្ហាញថា អ្នកមានឈ្មោះក្នុងបញ្ជីបោះឆ្នោតឆ្នាំ២០២២នេះ មានជាង ៩លាន ២០ម៉ឺននាក់ បើធៀបនឹងបញ្ជីបោះឆ្នោត ជ្រើសរើសក្រុមប្រឹក្សាឃុំសង្កាត់ដែលមានកាលពីឆ្នាំ២០១៧ មានតែជាង ៧លាននាក់។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឯកភាពចំពោះសេចក្ដីសម្រេចរបស់ គ.ជ.ប ដែលផលិតសន្លឹកឆ្នោតក្នុងទំហំដ៏ធំបែបនេះ។ លោកបន្តថា ការបោះពុម្ពលើស គឺដើម្បីបម្រុងទុកក្នុងការបង្ការពេលសន្លឹកឆ្នោតខូចខាតកើតឡើង នៅអំឡុងដាក់ឱ្យដំណើរការ។
លោកបន្តថា៖ «គម្រោងសន្លឹកឆ្នោតលើសពីសេចក្ដីត្រូវការនៃចំនួនប្រជាពលរដ្ឋដែលជាអង្គបោះឆ្នោតហ្នឹង ខ្ញុំយល់ឃើញថា វាជាការត្រឹមត្រូវហើយ ដើម្បីត្រៀមទុកបម្រុងពេលដែលសន្លឹកឆ្នោតមួយចំនួនខូច។ អាហ្នឹងយើងមានលក្ខណៈសម្បត្តិ ដើម្បីយើងយកសន្លឹកឆ្នោតដែលត្រៀមហ្នឹងយកទៅបម្រើ[ចំពោះ]អ្នកដែលគូសខុសហ្នឹងឱ្យគូសឡើងវិញ »។
ចំណែកអនុប្រធានគណបក្សភ្លើងទៀន លោក ថាច់ សេដ្ឋា ហាក់មានភាពស្ទាក់ស្ទើរក្នុងការផ្ដល់យោបល់អំពីសន្លឹកឆ្នោតនេះ ដោយលោកបញ្ជាក់ថា គណបក្សភ្លើងទៀន មិនបានចូលរួមអង្កេតដោយផ្ទាល់ទេ នៅព្រឹកថ្ងៃស្រុកនេះ។
លោកបន្តថា អ្វីដែលគណបក្សចាស់វស្សាមួយនេះអាចឆ្លើយបាននោះ គឺមានតែត្រូវរង់ចាំមើលលទ្ធផលចុងក្រោយនៃដំណើរការបោះឆ្នោតប៉ុណ្ណោះ តាមរយៈការផ្ទៀងផ្ទាត់ចំនួនអ្នកបោះឆ្នោតជាមួយនឹងសន្លឹកឆ្នោតដែលមានស្រាប់។
លោកបន្តថា៖ «មែនទែនទៅ! សន្លឹកឆ្នោតដែលបោះនោះ គឺគេយោងទៅលើចំនួនអ្នកបោះឆ្នោត ហើយយើងក៏មិនដឹងប្រាកដប្រជាថា អ្នកបោះហ្នឹងមានចំនួនប៉ុន្មាន ហើយមានការត្រួតពិនិត្យពេលណាអី យើងវាអត់មាន។ ដូច្នេះ យើងវាអត់ច្បាស់អំពីរឿងហ្នឹង មិនដឹងថាតួលេខនៃចំនួនសន្លឹកឆ្នោតហ្នឹងគេបោះបែបណា »។
បើតាមលោក ថាច់ សេដ្ឋា ខាងគណបក្សភ្លើងទៀន មិនបានទទួលសេចក្ដីជូនដំណឹងណាមួយពី គ.ជ.ប អំពីការចូលរួមពិនិត្យពីសង្វាក់ផលិតសន្លឹកឆ្នោតនេះទេ។
ប្រតិកម្មទៅនឹងព័ត៌មានអំពីការពិនិត្យពីសង្វាក់ផលិតសន្លឹកឆ្នោតនៅនឹងរោងពុម្ពជាក់ស្ដែងនេះដែរ តំណាងគណបក្សខ្មែរស្រឡាញ់ជាតិ លោក ខឿយ ស៊ីនឿន បញ្ជាក់ថា ស្ថាប័នជាតិរៀបចំការបោះឆ្នោតគួរផ្ដល់ព័ត៌មានឱ្យបានគ្រប់គ្រាន់ទៅតំណាងគណបក្សនយោបាយ ដើម្បីអាចឱ្យពួកគេបានចូលរួមអង្កេត។
ឆ្លើយតបចំពោះមុខ លោក ហង្ស ពុទ្ធា សន្យាថានឹងយកកង្វល់និងការរិះគន់នេះទៅកែលម្អនៅពេលដំណើការលើកក្រោយទៀត។
ដោយឡែក នាយកប្រតិបត្តិនៃអង្គការនិចហ្វិក លោក សំ គន្ធាមី យល់ស្របថា ចំនួនអ្នកចុះឈ្មោះបោះឆ្នោតដែលមាននៅក្នុងបញ្ជីបោះឆ្នោតសម្រាប់អាណត្តិថ្មីនេះ មានចំនួនកើនឡើង។ ប៉ុន្តែបើទោះបែបណា អ្នកជំនាញកិច្ចបោះឆ្នោតរូបនេះនៅមិនទាន់ជឿជាក់ ថាតើដំណើរការនៃការបោះឆ្នោតខាងមុខនេះនឹងប្រព្រឹត្តទៅបែបណានៅឡើយនោះទេ។
បើតាមលោក សំ គន្ធាមី មានតែការអង្កេតនិងតាមឃ្លាំមើលពីដំណើការបោះឆ្នោតមួយគត់ពីគ្រប់ភាគីពាក់ព័ន្ធ រួមទាំងអ្នកបោះឆ្នោតផង ទើបអាចសន្និដ្ឋានបានថាតើចំនួនសន្លឹកឆ្នោតដែលបោះពុម្ពរួចហើយនេះ វាស៊ីគ្នាទៅនឹងចំនួនអ្នកបោះឆ្នោតកម្រិតណា។
លោកបន្តថា៖ «បើសិនជាចំនួនអ្នកបោះឆ្នោតភាគរយច្រើន យើងចង់អំពាវនាវឱ្យម្ចាស់ឆ្នោតហ្នឹងជួយតាមដានសង្កេតមើលពីដំណើរការបោះឆ្នោតពីការិយាល័យបោះឆ្នោតនេះផង»។
បើទោះជាបែបណា គេសង្កេតឃើញថា ស្ទើរគ្រប់អាណត្តិនៃការបោះឆ្នោត មានតែរោងពុម្ព ណាវីន ព្រីងធីង ដែលស្ថិតនៅក្នុងសង្កាត់បឹងកក់ទី១ ខណ្ឌទួលគោក តែមួយគត់ ដែលអាចដេញថ្លៃបានក្នុងការផលិតសន្លឹកឆ្នោតនេះ។
លោក ហង្ស ពុទ្ធា អ្នកនាំពាក្យ គ.ជ.ប ឱ្យដឹងថា តាមពិតទៅ មានរោងពុម្ពយ៉ាងហោចណាស់ក៏៤រោងពុម្ពដែរ ដែលបានចូលធ្វើលទ្ធកម្មដេញថ្លៃនេះ។ ហើយការដេញថ្លៃត្រូវធ្វើឡើងជាសាធារណៈនិងដោយតម្លាភាព ដែលកំណត់ដោយក្រសួងសេដ្ឋកិច្ច និងហិរញ្ញវត្ថុ។
បន្ថែមពីលើនេះ លោក សោម សូរីដា ថ្លែងថា មូលហេតុដែល គ.ជ.ប ជ្រើសរើសរោងពុម្ពនេះ ដើម្បីបើកផ្លូវឱ្យផលិតសន្លឹកឆ្នោត គឺផ្អែកទៅលើដំណើរការនិងសុវត្ថិភាព រួមទាំងការរក្សាការសម្ងាត់នៃសន្លឹកឆ្នោតផង។ ជាងនេះទៀត រោងពុម្ពនេះ គឺមានបទពិសោធន៍ចាស់វង្សាណាស់មកហើយក្នុងការផលិតសន្លឹកឆ្នោតនេះ គិតចាប់តាំងពីឆ្នាំ១៩៩៨ មក៕
