សាលាដំបូងខេត្តពោធិ៍សាត់ បានដោះលែងកូនប្រុសសកម្មជនគណបក្សភ្លើងទៀនដែលជាអនីតិជន ឱ្យនៅក្រៅឃុំបណ្ដោះអាសន្ន ដោយដាក់ឱ្យស្ថិតក្រោមការត្រួតពិនិត្យរបស់តុលាការ ក្រោយពីជាប់ពន្ធនាគារជិត១ខែ ពាក់ព័ន្ធនឹងបទចោទថាបានប្រើឧបករណ៍ឆក់ត្រីខុសច្បាប់ ខណៈឪពុករបស់ក្មេងប្រុសរូបនេះនៅបន្តឃុំខ្លួននៅឡើយ។
សកម្មជនគណបក្សភ្លើងទៀននៅខេត្តពោធិ៍សាត់ លោក ហែម ឆិល និងកូនប្រុសរបស់គាត់ឈ្មោះ ពឹម ដារ៉ាន់ អាយុ១៥ឆ្នាំ ត្រូវបានអាជ្ញាធរចាប់ខ្លួន ដោយចោទពីបទ «ប្រើប្រាស់ឧបករណ៍ឆក់ត្រីខុសច្បាប់» ប៉ុន្តែគ្រួសារអះអាងថា ការចាប់ខ្លួននេះធ្វើឡើងក្នុងពេលដែលពួកគេបូមទឹកចាប់ត្រីក្នុងស្រះរបស់ខ្លួន កាលពីថ្ងៃទី១២ ខែមេសា ឆ្នាំ២០២២។
លោក សំ សុខគង់ ដែលជាមេធាវីការពារក្ដីឱ្យសកម្មជនគណបក្សភ្លើងទៀន លោក ហែម ឆិល និងកូនប្រុសឈ្មោះ ពឹម ដារ៉ាន់ អះអាងនៅថ្ងៃសុក្រនេះថា តុលាការខេត្តពោធិ៍សាត់បានដោះលែងកុមារារូបនេះឱ្យនៅក្រៅឃុំជាបណ្ដោះអាសន្ន កាលពីល្ងាចថ្ងៃទី៤ ខែឧសភា ដោយតម្រូវឱ្យស្ថិតក្រោមលក្ខខណ្ឌមួយចំនួន។
លោកបន្តថា៖ «លក្ខខណ្ឌហ្នឹងទី១ គឺមិនឱ្យចាកចេញទៅក្រៅប្រទេស ហើយទី២ បើប្ដូរលំនៅស្ថានត្រូវជូនដំណឹងមកតុលាការ។ ទី៣ ត្រូវបង្ហាញវត្តមាននៅចំពោះមុខសមត្ថកិច្ច និងទី៤ ត្រូវតែឆ្លើយតបចំពោះការកោះហៅរបស់តុលាការគ្រប់នីតិវិធីទាំងអស់។ អ៊ីចឹងលក្ខខណ្ឌមាន៤ ដែលឱ្យគាត់នៅក្រៅឃុំជាបណ្ដោះអាសន្ន»។
បើតាមលោក សុខគង់ ការដោះលែងកុមារារូបនេះ គឺតុលាការថា ធ្វើឡើងដើម្បីធានាឱ្យនីតិវិធីស៊ើបអង្កេតបន្តទៅមុខ ប៉ុន្តែតុលាការមិនបានបញ្ជាក់ក្នុងដីកាទេ ពីមូលហេតុជាក់លាក់ណាមួយនៅពីក្រោយការដោះលែងនេះ។
មេធាវីរូបនេះសាទរចំពោះការសម្រេចរបស់តុលាការដែលដោះលែងកុមារារូបនេះឱ្យនៅក្រៅឃុំ ប៉ុន្តែលោកក៏មានការខកចិត្ត ដែលតុលាការគ្រាន់តែដោះលែងក្រោមការដាក់លក្ខខណ្ឌ ហើយមិនបានទម្លាក់បទចោទប្រកាន់។
ដោយឡែក ឪពុករបស់កុមារា ពឹម ដារ៉ាន់ គឺលោក ហែម ឆិល ដែលជាបេក្ខជនឈរឈ្មោះលេខរៀងទី២ នៃគណបក្សភ្លើងទៀន នៅឃុំស្យា ស្រុកកណ្ដៀង ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២នេះ ត្រូវបានតុលាការសម្រេចបន្តឃុំខ្លួនដដែល ក្រោមហេតុផលថា ចៅក្រមស៊ើបសួរកំពុងស៊ើបអង្កេតពាក់ព័ន្ធរឿងប្រើប្រាស់ឧបករណ៍នេសាទខុសច្បាប់។
វីអូឌី មិនអាចសុំការបញ្ជាក់បន្ថែមពីអ្នកនាំពាក្យសាលាដំបូងខេត្តពោធិ៍សាត់ លោក ហេង ដូនីន និងព្រះរាជអាជ្ញារងខេត្តពោធិ៍សាត់ លោកស្រី ផាន់ សុគន្ធថង បានទេ នៅថ្ងៃសុក្រនេះ។
ពាក់ព័ន្ធនឹងករណីនេះដែរ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ធ្លាប់បានគូសបញ្ជាក់ថា មួយរយៈកាលចុងក្រោយនេះ លោកសង្កេតឃើញសមត្ថកិច្ចតែងតែធ្វើទុក្ខបុកម្នេញលើសកម្មជនគណបក្សភ្លើងទៀនជាបន្តបន្ទាប់ ដោយសារតែគណបក្សនេះហាក់មានប្រជាប្រិយភាពក្នុងការត្រៀមខ្លួនប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ នាពេលខាងមុខនេះ។
លោក សំអាត យល់ថា ប្រសិនបើការចាប់ខ្លួននោះមានជាប់ពាក់ព័ន្ធនឹងរឿងនយោបាយច្រើនជាងការអនុវត្តច្បាប់ នោះកម្ពុជានឹងរងការរិះគន់ពីមជ្ឈដ្ឋានជាតិនិងអន្តរជាតិ ជុំវិញបញ្ហាទាំងនេះបន្ថែមទៀត៕
