តុលាការខេត្តប៉ៃលិន បានចេញដីកាកោះហៅប្រធានក្រុមការងារគណបក្សភ្លើងទៀនប្រចាំខេត្តនេះម្នាក់ជាលើកទី២ ដើម្បីចូលឆ្លើយបំភ្លឺពាក់ព័ន្ធសំណុំរឿង «ញុះញង់» ប៉ុន្តែមន្ត្រីបក្សក្រៅរដ្ឋាភិបាលមួយនេះហៅការកោះហៅនោះជារឿងនយោបាយច្រើនជាងការអនុវត្តច្បាប់។
ក្នុងដីកាកោះហៅជាលើកទី២ ចុះថ្ងៃទី២៦ ខែមេសា របស់ព្រះរាជអាជ្ញារងអយ្យការអមសាលាដំបូងខេត្តប៉ៃលិន លោក ជា សា បានតម្រូវឱ្យលោក ខឹម មុនីកុសល ចូលបំភ្លឺនៅតុលាការនាព្រឹកថ្ងៃទី១១ ខែឧសភា ឆ្នាំ២០២២ ដើម្បីសាកសួររឿង «ញុះញង់ឱ្យមានការរើសអើង» ដែលប្រព្រឹត្តទៅនៅមន្ទីរឬស្នាក់ការបក្សខេត្តប៉ៃលិន។
អតីតមន្ត្រីសុខាភិបាលជាន់ខ្ពស់នៃមន្ទីរសុខាភិបាលខេត្តប៉ៃលិន និងបច្ចុប្បន្នជាប្រធានក្រុមការងារគណបក្សភ្លើងទៀនខេត្តប៉ៃលិន លោក ខឹម មុនីកុសល បានអះអាងនៅថ្ងៃចន្ទនេះថា លោកទើបបានទទួលដីកាកោះហៅនោះពីនគរបាលប៉ុស្តិ៍រដ្ឋបាលឃុំអូរតាវ៉ៅ នៅព្រឹកថ្ងៃទី៩ ខែឧសភានេះ។ លោកបញ្ជាក់ថា នឹងចូលទៅបំភ្លឺតាមដីកាកោះហៅរបស់តុលាការ ប៉ុន្តែក៏ត្រូវពិភាក្សាជាមួយមេធាវីអំពីរឿងនេះដែរ។
ប្រធានគណបក្សភ្លើងទៀនខេត្តជាប់ព្រំដែនថៃរូបនេះយល់ថា ការប្ដឹងផ្ដល់និងចោទប្រកាន់លោក គឺជារឿងនយោបាយ ការគំរាមកំហែង ច្រើនជាងការអនុវត្តច្បាប់។
លោក ខឹម មុនីកុសល មានប្រសាសន៍ថា៖ «ជារឿងនយោបាយដដែល ហើយជាចេតនាចង់រារាំងសកម្មភាពរបស់ខ្ញុំ ព្រោះពេលវេលានៃការបោះឆ្នោតកាន់តែខិតជិតមកហើយៗ ដីកាចេញមកថែមទៀត ហើយវាក៏មិនបានឆ្លុះបញ្ចាំងអំពីកិច្ចខិតខំប្រឹងប្រែងរបស់ថ្នាក់ដឹកនាំគណបក្ស [ភ្លើងទៀន] ដែលខំជួបខាង គ.ជ.ប ជួបខាងក្រសួងយុត្តិធម៌ទៀត។ តែផ្ទុយទៅវិញ វានៅតែមានរឿងហ្នឹង[កោះហៅ]កើតឡើង ហើយយើងទាំងអស់គ្នាដឹងហើយថា រឿងហ្នឹងជារឿងនយោបាយទេ វាមិនមានអីពាក់ព័ន្ធទៅនឹងអ្វីផ្សេងទៀតទេ បាទ! ដោយសារតែខ្ញុំជាមន្ត្រីរបស់គណបក្សភ្លើងទៀនតែប៉ុណ្ណឹងឯង»។
លោក ខឹម មុនីកុសល ត្រូវបានអភិបាលខេត្តប៉ៃលិន លោកស្រី បាន ស្រីមុំ បណ្ដេញចេញពីក្របខណ្ឌជាមន្ត្រីសុខាភិបាលនៃមន្ទីរសុខាភិបាលខេត្តនេះ កាលពីថ្ងៃទី១៩ ខែមីនា ឆ្នាំ២០២១ បន្ទាប់ពីលោកបានបង្ហោះសារនៅលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កក្នុងស្នាក់ការគណបក្សប្រជាជនកម្ពុជាខេត្តប៉ៃលិន។
កាលពីពេលកន្លងមក លោក ខឹម មុនីកុសល ត្រូវបានតុលាការខេត្តនេះកោះហៅឱ្យចូលខ្លួនទៅឆ្លើយបំភ្លឺម្ដងរួចមកហើយ ក្នុងសំណុំរឿង២ផ្សេងទៀត។ សំណុំរឿងទី១ តុលាការតម្រូវឱ្យលោកចូលឆ្លើយបំភ្លឺនៅថ្ងៃទី៨ ខែមេសា ក្រោយរងការចោទពីបទ «បរិហារកេរ្តិ៍ជាសាធារណៈ» និងបទចោទមួយករណីទៀត ត្រូវចូលខ្លួនឆ្លើយបំភ្លឺនៅថ្ងៃទី២០ ខែមេសា ពីបទ «ញុះញង់ឱ្យមានការរើសអើង» ប៉ុន្តែត្រូវបានលោកស្នើសុំពន្យារពេល ក្រោមហេតុផលថា គ្មានពេលវេលាគ្រប់គ្រាន់ និងគ្មានមេធាវី។
យ៉ាងណា លោក កុសល បានចោទជាសំណួរថា ការដកលោកពីក្របខណ្ឌលោកហើយ ហើយប្ដឹងលោកទៅតុលាការទៀត តើវាជាការសងសឹក និងព្យាបាទមែនទេ? តើយុត្តិធម៌ក្នុងសង្គមនេះមានដែរឬទេ?៕
