មនុស្សចំនួន៧នាក់ត្រូវបានចោទប្រកាន់និងឃុំខ្លួនក្នុងពន្ធនាគារ ពាក់ព័ន្ធសំណុំរឿងជួញដូរអាវុធឆ្លងដែនចេញពីប្រទេសដោយខុសច្បាប់ ខណៈអាជ្ញាធរបច្ចុប្បន្នកំពុងតាមស្វែងរកចាប់ខ្លួនមេខ្លោងដែលជាប់ពាក់ព័ន្ធក្នុងករណីនេះ។
ប្រធានមន្ទីរយុត្តិធម៌ នៃទីបញ្ជាការដ្ឋានកងរាជអាវុធហត្ថខេត្តបាត់ដំបង លោក សូ ឌី បានអះអាងកាលពីថ្ងៃចន្ទថា សមត្ថកិច្ចបានឃាត់ខ្លួនអ្នកពាក់ព័ន្ធចំនួន៧នាក់ ក្នុងនោះ ៤នាក់ត្រូវបានចាប់ខ្លួននៅថ្ងៃទី១ ខែឧសភា និង ៣នាក់ទៀតចាប់ខ្លួននៅថ្ងៃទី២ ខែឧសភា។
ជាមួយគ្នានេះ សមត្ថកិច្ចក៏កំពុងតាមចាប់ខ្លួនមេខ្លោងដែលត្រូវបានរកឃើញថាមានជាប់ពាក់ព័ន្ធនៅក្នុងករណីនេះផងដែរ។
ប្រធានមន្ទីរយុត្តិធម៌ដដែលបន្ថែមថា៖ «សមត្ថកិច្ចបានកំណត់អត្តសញ្ញាណពួកគេ [មេខ្លោង] រួចរាល់ហើយ ដែលបច្ចុប្បន្នយើងកំពុងតែតាមចាប់ខ្លួនពួកគេ»។
លោក ដួង សារ៉ន ព្រះរាជអាជ្ញារងអមសាលាដំបូងខេត្តបាត់ដំបង បានឱ្យដឹងថា ជនសង្ស័យទាំងនេះត្រូវបានចោទប្រកាន់ពីបទ «ផលិត នាំចេញ-ចូលអាវុធ គ្រឿងផ្ទុះ និងគ្រាប់រំសេវគ្រប់ប្រភេទ»។ យោងតាមក្រមព្រហ្មទណ្ឌ បទចោទនេះអាចប្រឈមការជាប់ពន្ធនាគារពី ៥ ទៅ ១០ឆ្នាំ។
ទាក់ទិនករណីនេះ លោក Jeremy Douglas មន្ត្រីអង្គការសហប្រជាជាតិទទួលបន្ទុកការប្រយុទ្ធប្រឆាំងគ្រឿងញៀន និងឧក្រិដ្ឋកម្មប្រចាំតំបន់អាស៊ី បានថ្លែងកាលពីថ្ងៃសុក្រសប្ដាហ៍មុនថា ការជួញដូរអាវុធទៅកាន់ប្រទេសមីយ៉ាន់ម៉ាហាក់មានការកើនឡើងខ្លាំងនៅក្នុងតំបន់។
លោកថា៖ «ការជួញដូរអាវុធចេញពីក្នុង និងជុំវិញខេត្តបាត់ដំបង ក្បែរព្រំដែនថៃ មិនមែនជារឿងដែលគួរឱ្យភ្ញាក់ផ្អើលនោះទេ ខណៈតម្រូវការអាវុធធុនតូច និងគ្រឿងផ្ទុះនៅក្នុងប្រទេសមីយ៉ាន់ម៉ា បច្ចុប្បន្នមានការកើនឡើងខ្លាំង។ ដូច្នេះហើយ សកម្មភាពនៃការជួញដូរអាវុធយ៉ាងសកម្មឆ្ពោះទៅកាន់ប្រទេសនេះ គឺត្រូវបានធ្វើឡើងចេញពីទិសដៅជាច្រើន»។
គួរបញ្ជាក់ថា គ្រាប់បែកដៃ៥០គ្រាប់ កាំភ្លើងអាកា៤៧ ចំនួន១ ០០០ដើម កាំភ្លើងខ្លីចំនួន២ដើម រួមនឹងអាវុធជាតិផ្ទុះមួយចំនួនទៀត ត្រូវបានរឹបអូសកាលពីដើមខែនេះ នៅក្នុងប្រតិបត្តិការរួមគ្នាមួយរវាងកងរាជអាវុធហត្ថខេត្តបន្ទាយមានជ័យ និងខេត្តបាត់ដំបង។ នេះបើយោងតាមការចុះផ្សាយដោយកាសែតក្នុងស្រុក៕
បកប្រែនិងសម្រួលដោយលោក ភុន ច័ន្ទឧសភា ចេញពីអត្ថបទដើមភាសាអង់គ្លេស៖ Authorities Hunt for Weapons-Trafficking Ringleaders, Seven in Jail
