ថ្នាក់ដឹកនាំក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បញ្ជាឱ្យអាជ្ញាធរខេត្តកណ្ដាលដោះស្រាយសំណងជូនពលរដ្ឋដែលរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី ស្ថិតក្នុងស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ។
ក្នុងលិខិតចុះថ្ងៃទី៩ ខែឧសភា ឆ្នាំ២០២២ រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លោកស្រី ម៉ែន សំអន បានបញ្ជាទៅអភិបាលខេត្តកណ្ដាល លោក គង់ សុភ័ណ្ឌ ឱ្យពិនិត្យនិងដោះស្រាយសំណងជូនពលរដ្ឋចំនួន ១២១គ្រួសារ រស់នៅឃុំបឹងខ្យាង ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល ដែលកំពុងមានជម្លោះជាមួយក្រុមហ៊ុន OCIC និងក្រុមហ៊ុន CAIC ដែលជាក្រុមហ៊ុនម៉ៅការសាងសង់ព្រលានយន្តហោះភ្នំពេញថ្មី។
លិខិតដដែលបានបញ្ជាទៅលោក គង់ សុភ័ណ្ឌ ឱ្យពិនិត្យដោះស្រាយ និងផ្ញើរបាយការណ៍ស្ដីពីលទ្ធផលនៃការដោះស្រាយនោះមកក្រសួងវិញ ដើម្បីក្រសួងមួយនេះមានមូលដ្ឋានរាយការណ៍ជូនរដ្ឋាភិបាលបន្ត។
ក្នុងញត្តិរបស់អ្នកភូមិដាក់ទៅក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច កាលពីថ្ងៃទី១០ ខែមីនា ឆ្នាំ២០២២ បានឱ្យដឹងថា ពលរដ្ឋ១២១គ្រួសារដែលសុំអន្តរាគមន៍នោះមានដីសរុប ៦៣ហិកតា ៩២អា។
លោក ទួន វណ្ណៈ ដែលអះអាងថាជាតំណាងពលរដ្ឋនៅឃុំបឹងខ្យាង ប្រាប់វីអូឌីនៅថ្ងៃអង្គារនេះថា គ្រួសាររបស់លោកបានប៉ះពាល់ដីលំនៅឋាន និងដីស្រែទាំងស្រុង សរុបចំនួន ១ហិកតា ៩៨អា។ លោកថា ការពន្យារពេលមិនដោះស្រាយពីសំណាក់អាជ្ញាធរ បានធ្វើឱ្យគ្រួសាររបស់លោក និងពលរដ្ឋផ្សេងទៀត ជួបការលំបាកក្នុងជីវភាព ដោយសារគ្មានដីសម្រាប់បង្កបង្កើនផល និងជំពាក់បំណុលធនាគារទ្វេដង ខណៈពលរដ្ឋខ្លះសម្រេចទទួលយកសំណងត្រឹម ៨ដុល្លារក្នុងមួយម៉ែត្រការ៉េ ទាំងបង្ខំចិត្ត ដោយសារជីវភាពខ្វះខាត។
លោកបន្ថែមថា៖ «ពួកយើងមានការលំបាកខ្លាំង ទី១ ជីវភាពគ្រួសារ ដោយសារយើងមិនបានធ្វើស្រែ ទី២ ខ្វះខាតលុយកាក់ផ្តល់ឱ្យកូនៗសម្រាប់ទៅរៀនសូត្រ។ ហើយមួយទៀត ព្រួយបារម្ភខ្លាចមិនទទួលបានសំណង ខណៈក្រុមហ៊ុនដើរនិយាយថា បើមិនទទួល ៨ដុល្លារ [ក្នុងមួយម៉ែត្រការ៉េ] គេលែង[ដោះស្រាយ]ក្រោយបោះឆ្នោតរួច។ ឥលូវនេះ ពលរដ្ឋខ្លះ គាត់ភ័យ គាត់ក៏សម្រេចទទួលយកសំណងត្រឹម ៨ដុល្លារ ទាំងបង្ខំ។ តែសម្រាប់ពួកខ្ញុំប៉ុន្មានគ្រួសារដែលប៉ះពាល់ទាំងដីផ្ទះ និងដីស្រែ គឺមិនទទួលយកទេ»។
តំណាងពលរដ្ឋនៅឃុំបឹងខ្យាងម្នាក់ទៀត អ្នកស្រី ឃឹម ម៉ាលី ឱ្យដឹងថា រហូតមកដល់ពេលនេះ អាជ្ញាធរនៅតែរក្សាជំហរផ្តល់សំណងត្រឹមតែ «៨ដុល្លារក្នុងមួយម៉ែត្រការ៉េ» ដដែល ដែលសំណងនេះតិចតួចពេក ពួកគាត់មិនអាចទទួលយកបាន ដោយសារមិនអាចយកទៅទិញដីនៅក្បែរតំបន់ពួកគាត់រស់នៅបាន។
អ្នកស្រី ឃឹម ម៉ាលី បន្តថា អ្នកស្រីក៏ដូចជាអ្នកភូមិផ្សេងទៀត ទាមទារសំណងសមរម្យដែលអាចយកទៅទិញដីក្បែរៗនោះបាន ខណៈបច្ចុប្បន្នដីនៅក្បែរព្រលាននោះមានតម្លៃចន្លោះពី៥០ដុល្លារទៅជាង១០០ដុល្លារក្នុង១ម៉ែត្រការ៉េ។
អ្នកស្រីបន្ថែមថា៖ «ដឹងយកមកធ្វើអីត្រឹម៨ដុល្លារ? វាមិនមែនតិចពេកទេ វាតិចខ្លាំងមែនទែន វាខុសគ្នាឆ្ងាយដូចមេឃនិងដី។ យើងបារម្ភចេះតែបារម្ភហើយ តែបើយកមកនៅតែក្រដដែល អ៊ីចឹងយើងចាំមើលសិនទៅ»។
អ្នកស្រី ឃឹម ម៉ាលី អះអាងថា មុនក្រុមហ៊ុនចូលមកឈូសឆាយ ដីរបស់អ្នកស្រីត្រូវបានឈ្មួញឱ្យតម្លៃ ៧០ដុល្លារក្នុងមួយម៉ែត្រការ៉េ ប៉ុន្តែកាលនោះ អ្នកស្រីមិនព្រមលក់នោះទេ ដោយរំពឹងថា នឹងទទួលបានតម្លៃខ្ពស់ជាងនេះ នៅពេលដែលក្រុមហ៊ុនចូលមកអភិវឌ្ឍ។
វីអូឌី មិនអាចសុំការឆ្លើយតបពីអភិបាលខេត្តកណ្តាល លោក គង់ សុភ័ណ្ឌ បានទេ ពាក់ព័ន្ធករណីនេះ។
នាយករដ្ឋបាលសាលាខេត្តកណ្ដាល លោក គ្រុយ ម៉ាឡែន អះអាងថា លោកនៅមិនទាន់ទទួលបានលិខិតរបស់ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នៅឡើយទេ រហូតមកដល់ម៉ោង៤រសៀលនេះ។
កាលពីថ្ងៃទី៣ ខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្ដល់ដីរដ្ឋទំហំប្រមាណ២ ៦០០ហិកតា ដែលលាតសន្ធឹងលើស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ ទៅឱ្យក្រុមហ៊ុនវិនិយោគអាកាសយានដ្ឋានកម្ពុជា (CAIC) វិនិយោគរួមគ្នាជាមួយសាជីវកម្មក្រៅប្រទេស និងលេខាធិការដ្ឋានអាកាសចរណ៍ស៊ីវិល ដើម្បីអភិវឌ្ឍព្រលានយន្តហោះអន្តរជាតិភ្នំពេញថ្មីមួយនេះ។
កាលពីថ្ងៃទី៦ ខែកក្កដា ឆ្នាំ២០២១ ពលរដ្ឋបានចេញលិខិតចំហរមួយដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី បានធ្វើឱ្យប៉ះពាល់ប្រជាពលរដ្ឋ ៣៣០គ្រួសារ និងដីទំហំជាង១លានម៉ែត្រការ៉េ ដែលភាគច្រើនជាដីមានបណ្ណកម្មសិទ្ធិស្របច្បាប់ ស្ថិតក្នុងឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្តាលស្ទឹង ខេត្តកណ្តាល និងឃុំពត់សរ នៅស្រុកបាទី ខេត្តតាកែវ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា តាមច្បាប់រដ្ឋធម្មនុញ្ញ ច្បាប់ភូមិបាល និងច្បាប់អស្សាមិករណ៍ គឺរដ្ឋអាចដកហូតដីពលរដ្ឋមានបណ្ណកម្មសិទ្ធិស្របច្បាប់ទៅអភិវឌ្ឍបាន លុះត្រាតែមានការផ្តល់សំណងសមរម្យ និងមានការយល់ស្របពីម្ចាស់អចលនវត្ថុ។
លោកថ្លែងថា៖ «ទាំងរដ្ឋធម្មនុញ្ញ ច្បាប់ភូមិបាល ច្បាប់អស្សាមិករណ៍ គឺបានចែងយ៉ាងច្បាស់ណាស់ថា ការដែលដកហូតអចលនទ្រព្យរបស់នីតិបុគ្គល ឬរូបវន្តបុគ្គលណាមួយ គឺត្រូវតែមានសំណងសមរម្យ និងមានការយល់ព្រមពីម្ចាស់អចលនទ្រព្យហ្នឹងផងដែរ។ ហើយប្រសិនបើយកដោយពុំមានការយល់ព្រម គ្មានផ្ដល់សំណងសមរម្យអាចទទួលយកបានទេ អាហ្នឹងគឺជាការដកហូតដោយខុសច្បាប់ ហើយជាការរំលោភសិទ្ធិមនុស្សធ្ងន់ធ្ងររបស់ប្រជាពលរដ្ឋ ជាពិសេសមានដីធ្លី និងលំនៅឋានសមរម្យ»៕
