លោកនាយករដ្ឋមន្ត្រី ហ៊ុន សែន ថ្លែងថា លោក សម រង្ស៊ី បន្តបាត់បង់ឱកាសក្នុងការវិលត្រលប់ចូលមកក្នុងប្រទេសកម្ពុជាវិញ ដោយសារតែលោកមិនចេះគ្រប់គ្រងឱកាស។
តាមរយៈវីដេអូឃ្លីបនៅក្នុងជំនួបជាមួយក្រុមអ្នកវិភាគតាមបណ្ដាញសង្គមរស់នៅសហរដ្ឋអាមេរិក នៅព្រឹកថ្ងៃទី១១ ខែឧសភា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន បានថ្លែងថា លោក សម រង្ស៊ី នឹងរុញលោកឱ្យចូលកៀនជញ្ជាំង ប្រសិនបើលោក សម រង្ស៊ី ផ្ញើលិខិតចូលរួមមរណទុក្ខបងប្រុសរបស់លោក ដែលទទួលមរណភាពកាលពីរសៀលថ្ងៃទី៥ ខែឧសភា។ លោកបន្តថា លោក សម រង្ស៊ី គឺជាអ្នកនយោបាយមិនចេះគ្រប់គ្រងឱកាស។
លោកថា៖ «រង្ស៊ី ភ្លាត់ស្នៀត! […] អ្នកនយោបាយបាត់ឱកាស ប្រសិនបើបងខ្ញុំ ពេលគាត់ស្លាប់ រង្ស៊ីធ្វើលិខិតចូលរួមមរណទុក្ខ រុញខ្ញុំចូលកៀនជញ្ជាំងតែម្ដង រង្ស៊ីនេះមិនចេះគ្រប់គ្រងឱកាស ថោកអីនឹងដៃ ថ្លៃអីនឹងមាត់ ធ្វើលិខិតតែបន្តិច រុញខ្ញុំចូលដល់ស្ថានភាពដ៏លំបាក។ ឥលូវខ្ញុំគួរអរគុណរង្ស៊ី ព្រោះឥលូវនេះ បើសិនជាទទួលឬមិនទទួលក៏មិនកើត ដល់តែទទួល ខ្ញុំត្រូវតែជំពាក់ឆ្លើយ ដល់តែឆ្លើយទៅ អាអ្នកនៅក្នុងស្រុកមានសង្ឃឹមថា អូមេអញនឹងវិលត្រលប់ចូលស្រុកវិញហើយ ព្រោះនាយករដ្ឋមន្ត្រីឆ្លើយហើយ»។
លោក ហ៊ុន ណេង បងប្រុសបង្កើតរបស់លោកនាយករដ្ឋមន្ត្រី ហ៊ុន សែន បានទទួលមរណភាពកាលពីរសៀលថ្ងៃទី៥ ខែឧសភា ដោយសាររោគាពាធ។ បន្ទាប់ពីទទួលបានដំណឹងមរណភាពនេះ លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ បានសរសេរសារចូលរួមរំលែកមរណទុក្ខទៅកាន់លោកនាយករដ្ឋមន្ត្រី ហ៊ុន សែន តាមបណ្តាញសង្គម។
បន្ថែមលើនេះ លោក កឹម សុខា ក៏បានដឹកនាំគណៈប្រតិភូទៅគោរពសពលោក ហ៊ុន ណេង ដោយផ្ទាល់នៅឯខេត្តកំពង់ចាម ហើយនៅក្នុងឱកាសនោះ លោក កឹម សុខា ក៏បានជួបពិភាក្សាជាង៤ម៉ោងជាមួយលោកនាយករដ្ឋមន្ត្រី ហ៊ុន សែន ផងដែរ។
ផ្ទុយពីលោក កឹម សុខា គេមិនបានឃើញលោក សម រង្ស៊ី ផ្ញើសារចូលរួមរំលែកទុក្ខលោកនាយករដ្ឋមន្ត្រី ហ៊ុន សែន នោះទេ។
វីអូឌី មិនអាចទាក់ទងសុំការឆ្លើយតបពីលោក សម រង្ស៊ី អតីតស្ថាបនិកគណបក្សសង្គ្រោះជាតិដែលត្រូវបានតុលាការរំលាយ បាននៅឡើយទេ នៅថ្ងៃនេះ។
ក៏ប៉ុន្តែលោកស្រី មូរ សុខហួរ អនុប្រធានគណបក្សសង្គ្រោះជាតិដែលត្រូវបានតុលាការរំលាយ បានថ្លែងប្រាប់ វីអូឌី តាមទូរសព្ទពីសហរដ្ឋអាមេរិកថា លោកស្រីចូលរួមមរណទុក្ខចំពោះការបាត់បង់សាច់ញតិនេះ ក៏ប៉ុន្តែបញ្ហាជាតិ គឺជាបញ្ហាសំខាន់ ដែលអ្នកនយោបាយត្រូវអង្គុយដោះស្រាយជាមួយគ្នា។
លោកស្រីថា៖ «ចំពោះរឿងគ្រួសារផ្ទាល់ខ្លួន ហើយរហូតទៅដល់មានមរណភាពនេះ យើងក៏ចូលរួមនៅក្នុងការចែករំលែកទុក្ខជាមួយគ្រួសារដែរ ក៏ប៉ុន្តែរឿងជាតិ យើងត្រូវតែដាក់ជាអាទិភាព រួមគ្នាអង្គុយជជែកគ្នា ទើបឃើញថាយើងមានឆន្ទៈពិតប្រាកដនៅក្នុងការដោះស្រាយបញ្ហាជាតិ»។
លោកនាយករដ្ឋមន្ត្រី ហ៊ុន សែន កំពុងស្ថិតនៅសហរដ្ឋអាមេរិក ដើម្បីចូលរួមកិច្ចប្រជុំកំពូលពិសេសអាស៊ាន-អាមេរិក ចាប់ពីថ្ងៃទី១២ ដល់ថ្ងៃទី១៣ ខែឧសភា ឆ្នាំ២០២២។
គួរជម្រាបជូនថា លោក សម រង្ស៊ី កំពុងរស់នៅប្រទេសបារាំង បានបរាជ័យក្នុងការវិលត្រលប់ចូលមកក្នុងប្រទេសកម្ពុជាជាបន្តបន្ទាប់ ចាប់តាំងពីមានជម្លោះនយោបាយរវាងគណបក្សកាន់អំណាច និងគណបក្សប្រឆាំង កាលពីចុងឆ្នាំ២០១៧មក៕
