ប្រមុខរដ្ឋាភិបាល លោក ហ៊ុន សែន បានស្នើប្រទេសផ្ដល់ជំនួយពន្យារពេលបញ្ជូនវ៉ាក់សាំងមកកម្ពុជា ដោយថាវ៉ាក់សាំងនៅសល់ច្រើនក្នុងឃ្លាំង និងមិនគួរប្រើប្រាស់ខ្ជះខ្ជាយឡើយ។
ការស្នើនេះធ្វើឡើងក្នុងពិធីជួបសំណេះសំណាលរវាងលោកនាយករដ្ឋមន្ត្រី ជាមួយសហគមន៍ខ្មែរនៅអាមេរិក និងខ្មែរនៅកាណាដា នាឱកាសដែលលោកទៅចូលរួមធ្វើជាសហប្រធានសម្រាប់កិច្ចប្រជុំកំពូលពិសេសអាស៊ាន-អាមេរិក នៅថ្ងៃទី១២ ខែឧសភា ឆ្នាំ២០២២នេះ។
លោកនាយករដ្ឋមន្ត្រី ហ៊ុន សែន និយាយថា កម្ពុជាមានវ៉ាក់សាំងសម្រាប់ចាក់ឱ្យពលរដ្ឋហើយ ប៉ុន្តែកង្វល់របស់កម្ពុជានៅពេលនេះ គឺប្រើវ៉ាក់សាំងមិនទាន់អស់ពីឃ្លាំងនៅឡើយ។
លោកថា ចិនបានសន្យាផ្ដល់ជំនួយវ៉ាក់សាំងដល់កម្ពុជាចំនួន២០លានដូស ក្នុងនោះ ចំនួន៥លានដូសបានបញ្ជូនដល់កម្ពុជា។ ចំណែកអាមេរិកក៏បានសន្យាផ្ដល់ជាង៧លានដូស ក្នុងនោះ ២លានដូសបានបញ្ជូនដល់ទឹកដីកម្ពុជាហើយ។
បើតាមលោក ហ៊ុន សែន វ៉ាក់សាំងដែលជាជំនួយពីអ៊ីតាលី ហុងគ្រី អូស្ត្រាលី រួមនឹងវ៉ាក់សាំងដែលកម្ពុជាចំណាយលុយទិញ សរុបនៅសល់ជាង១២លានដូសក្នុងឃ្លាំងទៀត។
លោកថា៖ «យើងចង់ឱ្យរំកិល! ដូចជា [ជំនួយវ៉ាក់សាំង] ពីអាមេរិក យើងអាចរំកិលខែបន្តិច ទាញពេលទៅក្រោយបន្តិច ព្រោះត្រូវប្រើឱ្យអស់អា១២លាន[ដូស]សិន។ បើមិនទាន់អស់ យកទៅ បំផ្លាញចោលវ៉ាក់សាំង គឺជារឿងអកុសល។ អ៊ីចឹងយើងក៏ត្រូវគិតដែរ កុំឱ្យថាគេឱ្យមកចេះតែទទួលៗ។ ខ្មែរយើងចូលដល់ដំណាក់កាលគេហៅថា “អ្នកសុំទានមានលុយអាប់”»។
លោក ហ៊ុន សែន មានប្រសាសន៍ថា កម្ពុជាមិនគួរទទួលយកជំនួយវ៉ាក់សាំងទៅប្រើមិនអស់ឡើយ ស្របពេលប្រទេសដទៃកំពុងខ្វះខាតវ៉ាក់សាំង ដូចជាបណ្ដាប្រទេសអាហ្វ្រិក ជាមធ្យមចាក់វ៉ាក់សាំងដល់ពលរដ្ឋមិនដល់ ៥០% ផង រីឯកម្ពុជាចាក់បានពេញលេញដល់ទៅជាង ៩៣% ហើយតម្រូវការបច្ចុប្បន្នសម្រាប់តែដូសជំរុញប៉ុណ្ណោះ។
លោកបន្តថា៖ «យើងយកទៅ គ្រាន់តែជាដូសជំរុញទេ! ប៉ុន្តែយើងអត់ដឹងថាកូវីដចប់នៅពេលណាទេ ហើយចេះតែយក។ ប៉ុន្តែគ្រាន់តែថាសុំពន្យារពេល ហើយបើសិនគេមិនឱ្យ យើងក៏ត្រៀមលុយដើម្បីទិញដែរ»។
វីអូឌី មិនអាចទាក់ទងសុំការអត្ថាធិប្បាយបន្ថែមពីអគ្គនាយកបច្ចេកទេសនៃក្រសួងសុខាភិបាល លោកវេជ្ជបណ្ឌិត ហុក គឹមចេង បានទេ នៅថ្ងៃទី១២ ខែឧសភានេះ។
ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី ថ្លែងថា វ៉ាក់សាំងមិនមែនជាថ្នាំទេ ប៉ុន្តែវាជាសំបកមេរោគដែលគេកែច្នៃឱ្យទៅជាមេរោគល្អ មេរោគស្លូត ដើម្បីការពារអាយុជីវិតមនុស្ស។
យ៉ាងណា លោកថា បើមិនមានការទុកដាក់ត្រឹមត្រូវតាមលក្ខណៈបច្ចេកទេសនោះទេ វ៉ាក់សាំងនឹងក្លាយទៅជាមេរោគកាចសាហាវដែលបំផ្លាញជីវិតមនុស្សផងដែរ។
លោកថា៖ «បើសិនជាវ៉ាក់សាំងហ្នឹងមិនរក្សានៅក្នុងសីតុណ្ហភាពឱ្យបានល្អ ដើម្បីចិញ្ចឹមជីវិតវាឱ្យវារស់ឡើងដោយស្លូត វ៉ាក់សាំងហ្នឹងអាចនឹងចាក់ទៅមានហានិភ័យ ទៅជាមេរោគកាចវិញ។ គេហៅថាឆ្កែស្លូតទៅជាឆ្កែកាច ឆ្កែឆ្កួតវិញ។ ទី២ បើសិនជាវាហួសកំណត់កាល ក៏យើងមិនអាចយកមកប្រើបានដែរ។ យើងត្រូវយកទៅបោះចោល រកកន្លែងកាយដីកប់ក៏អត់បានដែរ ដុតទាល់តែរកឡជិត ឡបិទជិតហ្មង អត់ឱ្យផ្សែងហុយចេញទៀតណោះ»។
លោកថា បែបនេះ ទាមទារឱ្យក្រសួងសុខាភិបាលមានការយកចិត្តទុកដាក់ខ្ពស់លើការទុកដាក់វ៉ាក់សាំង ដើម្បីធានាថាគ្មានហានិភ័យដល់ជីវិតពលរដ្ឋ។
បើតាមលោកនាយករដ្ឋមន្ត្រី ក្នុងដំណាក់កាលកូវីដ-១៩ រដ្ឋាភិបាលបានប្រឹងប្រែងស្រោចស្រង់ជីវិតពលរដ្ឋ ដោយមិនបានទុកឱ្យពលរដ្ឋស្លាប់ឡើយ។ បើទោះជាបែបនេះក្តី លោកថាក៏មានករណីស្លាប់ដែរ តែតិចតួច បើធៀបជាមួយប្រទេសជឿនលឿន។ លោកបន្ថែមថា បច្ចុប្បន្នកម្ពុជាមានអ្នកដែលឆ្លងជំងឺនេះតិចជាងគេ ក្នុងចំណោមប្រទេសជាសមាជិកអាស៊ានទាំង១០។
គិតត្រឹមថ្ងៃទី១២ ខែឧសភា ឆ្នាំ២០២២ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន១៣៦ ២៦២នាក់ អ្នកជាសះស្បើយសរុបចំនួន១៣៣ ១៨៦នាក់ និងស្លាប់សរុបចំនួន៣ ០៥៦នាក់៕