នាយករដ្ឋមន្ត្រីកម្ពុជា បានអះអាងពីការបោះបង្គោលព្រំដែនជាមួយប្រទេសវៀតណាមដែលសម្រេចបានជាផ្លែផ្កាកើនដល់៩០ភាគរយហើយ ដោយនៅសល់១០ភាគរយទៀត ភាគីទាំងពីរកំពុងចរចាគ្នាដើម្បីធ្វើការងារនេះបន្តទៀត។
ក្នុងពិធីជួបសំណេះសំណាលជាមួយពលរដ្ឋខ្មែររស់នៅសហរដ្ឋអាមេរិក និងកាណាដា នាព្រឹកថ្ងៃទី១២ ខែឧសភា ឆ្នាំ២០២២ លោកនាយករដ្ឋមន្ត្រី ហ៊ុន សែន ថ្លែងថា ក្នុងឆ្នាំ២០១៩ កម្ពុជាបោះបង្គោលព្រំដែនជាមួយវៀតណាមបានតែ៨៤ភាគរយប៉ុណ្ណោះ ប៉ុន្តែមកដល់បច្ចុប្បន្ននេះ ប្រទេសទាំងពីរបានបោះបង្គោលព្រំដែនកើនឡើង៦ភាគរយទៀត។
លោកបញ្ជាក់ថា បង្គោលចំនួន៦ភាគរយដែលបានបោះរួចនោះ ប្រទេសទាំងពីរបានឯកភាពគ្នាថានឹងចុះហត្ថលេខាទទួលស្គាល់នៅឆ្នាំ២០២២នេះ។
លោកថា៖ «ការចរចារវាងគណៈកម្មការព្រំដែនទាំងពីរ បានសម្រេចចំនួន៦ភាគរយបន្ថែមទៀត បូកទៅវាបាន៩០ភាគរយ។ អ៊ីចឹងក្នុងចំណុចនេះ ខ្ញុំគួរតែនិយាយបន្តិចថា បើគង់តែឱ្យដីគេដដែល ចាំបាច់ចរចាយូរឆ្នាំម្ល៉េះ! យើងត្រូវតែច្បាស់ត្រង់ហ្នឹង ចាំបាច់អីទៅចុះហត្ថលេខាម្ដងបានតែ៨៤ភាគរយ។ ឥលូវសម្រេចបាន៦ភាគរយទៀត ហើយយើងឯកភាពគ្នាថានឹងទៅចុះហត្ថលេខានៅឆ្នាំ២០២២ អា៦ភាគរយ! យើងត្រូវត្រួតពិនិត្យឱ្យបានច្បាស់លាស់ បោះបង្គោលឱ្យបានត្រឹមត្រូវ ហើយបង្គោលនីមួយៗសុទ្ធតែមានចាប់តាមផ្កាយរណប។ អ៊ីចឹងគេចេះតែថា ហ៊ុន សែន លក់ដីៗ ឥលូវដីនៅកន្លែងណាដែល ហ៊ុន សែន លក់? បើគង់តែថាឱ្យដីគេដដែល ចាំបាច់ចរចា ១តឹក ១ផឹង ធ្វើអី?»
លោក ហ៊ុន សែន បន្តថា បច្ចុប្បន្ន ការបោះបង្គោលព្រំដែនជាមួយប្រទេសវៀតណាមដែលនៅសល់១០ភាគរយនោះ គឺនៅតំបន់ដាក់ដាំ និងដាក់ហ៊ូត ក្នុងខេត្តមណ្ឌលគិរី ប៉ុន្តែបញ្ហានេះ ភាគីទាំងពីរកំពុងចរចាគ្នាបន្ថែមទៀត ដើម្បីឈានទៅបោះសម្រេចតែម្ដង។
វីអូឌី មិនអាចសុំការបញ្ជាក់បន្ថែមពីប្រធានគណៈកម្មការចម្រុះកិច្ចការព្រំដែន លោក វ៉ា គឹមហុង ដោយទូរសព្ទចូល គ្មានអ្នកទទួល។
ប្រធានក្រុមប្រឹក្សាឃ្លាំមើលកម្ពុជានៅប្រទេសន័រវេស លោក ម៉ែន ណាត លើកឡើងថា ទោះបីរដ្ឋាភិបាលកម្ពុជាបោះបង្គោលព្រំដែនជាមួយប្រទេសវៀតណាមបាន១០០ភាគរយក្ដី ប៉ុន្តែបញ្ហាព្រំដែនប្រទេសទាំងពីរមិនអាចបញ្ចប់បានទេ ដោយសារការបោះបង្គោលព្រំដែនកន្លងមកនេះ កម្ពុជានៅមិនទាន់មានការឯកភាពជាតិនៅឡើយ។
លោកចាត់ទុកការបោះបង្គោលព្រំដែនបច្ចុប្បន្ន ធ្វើឡើងផ្ទុយពីមាត្រា២ និងមាត្រា៥៥ នៃរដ្ឋធម្មនុញ្ញកម្ពុជា រួមទាំងកិច្ចព្រមព្រៀងសន្តិភាពទីក្រុងប៉ារីសផងដែរ។
លោកថា៖ «ប្រព្រឹត្តបទឧក្រិដ្ឋធ្ងន់ធ្ងរណាស់ បញ្ហាទឹកដីជាតិ! លោក ហ៊ុន សែន ធ្វើអ៊ីចឹងខុសប្រវត្តិសាស្ត្រហើយ ហើយបន្លំប្រវត្តិសាស្ត្រហើយ។ ដូច្នេះ វាមិនចប់សព្វគ្រប់ទេ គាត់បោះបាន១០០ភាគរយ បើរដ្ឋាភិបាលណាមួយគេស្រឡាញ់ជាតិ គេនឹងសើរើឡើងវិញ។ ទោះបីជាគាត់បោះត្រឹមត្រូវក៏ដោយ ក៏គេត្រូវតែសើរើដែរ ពីព្រោះការបោះបង្គោលហ្នឹង វាមានភាពមិនប្រក្រតី ហាមប្រាមមិនឱ្យសកម្មជននិងពលរដ្ឋកម្ពុជាទៅមើល។ ទី២ ប្រើប្រាស់ផែនទីខុសច្បាប់ ១លើ៥០ ០០០។ ហើយទី៣ ប្រើសន្ធិសញ្ញាខុសច្បាប់ ឆ្នាំ១៩៨៥ គ្រាន់តែប៉ុណ្ណឹង ខុសច្បាប់ទៅហើយ។ វាមានភាពមិនប្រក្រតីរួចទៅហើយ។ ដូច្នេះ ទោះបីជាគាត់ព្យាយាមបោះបង្គោល១០០ [ភាគរយ] យ៉ាងណា ក៏វានៅតែខុសដដែលហ្នឹង»។
លោក ម៉ែន ណាត បន្តថា បើការបោះបង្គោលព្រំដែនមានភាពមិនប្រក្រតីនេះ កម្ពុជាអាចមានសិទ្ធិក្នុងការសើរើឡើងវិញ ដោយនិរាករណ៍ឯកសារច្បាប់ទាំងឡាយដែលផ្ទុយពីរដ្ឋធម្មនុញ្ញកម្ពុជា និងកិច្ចព្រមព្រៀមសន្តិភាពទីក្រុងប៉ារីស រួចដាក់បណ្ដឹងទៅតុលាការយុត្តិធម៌អន្តរជាតិ។
មាត្រា២ នៃរដ្ឋធម្មនុញ្ញកម្ពុជា ចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួន ដែលមានកំណត់លើផែនទីមាត្រដ្ឋានខ្នាត ១/១០០ ០០០ ដែលធ្វើនៅចន្លោះឆ្នាំ១៩៣៣-១៩៥៣ ហើយត្រូវបានទទួលស្គាល់ជាអន្តរជាតិនៅចន្លោះឆ្នាំ ១៩៦៣-១៩៦៩។
ចំណែកមាត្រា៥៥ ចែងថា សន្ធិសញ្ញានិងកិច្ចព្រមព្រៀងទាំងឡាយណាដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹត្យភាព និងឯកភាពជាតិរបស់កម្ពុជា ត្រូវលុបចោល។
កម្ពុជាមានផ្ទៃដីសរុបទំហំ១៨១ ០៣៥គីឡូម៉ែត្រការ៉េ ដែលមានព្រំដែនគោកជាប់ប្រទេសវៀតណាមប្រវែង១ ២៧០គីឡូម៉ែត្រ៕