បុរសពលរដ្ឋខ្មែរអាមេរិកាំងម្នាក់បានយកស្បែកជើងគប់សំដៅទៅលើលោកនាយករដ្ឋមន្ត្រី ហ៊ុន សែន នៅក្នុងចំណោមហ្វូងអ្នកគាំទ្ររបស់លោក នៅឯរដ្ឋធានីវ៉ាស៊ីនតោន សហរដ្ឋអាមេរិក។
តាមរយៈវីដេអូឃ្លីបដែលត្រូវបានផ្សព្វផ្សាយលើបណ្ដាញសង្គមនានា បានបង្ហាញពីបុរសវ័យជាង៦០ប្លាយឆ្នាំម្នាក់ ពាក់អាវធំ ក្រវាត់ក បានដោះស្បែកជើងប៊ូរបស់ខ្លួន គប់សំដៅទៅកាន់លោកនាយករដ្ឋមន្ត្រី ហ៊ុន សែន ដែលអ្នកគាំទ្រកំពុងថតហ្សែលហ្វី (Selfie) ជាមួយលោក។ ប៉ុន្តែជាសំណាងល្អ ស្បែកជើងនេះមិនត្រូវចំលោកនាយករដ្ឋមន្ត្រី ហ៊ុន សែន នោះទេ ដោយធ្លាក់ចំទូរសព្ទដៃរបស់អ្នកគាំទ្រស្ទើរតែជ្រុះចេញពីដៃ។
ហេតុការណ៍នេះបានធ្វើឱ្យអ្នកគាំទ្រ រួមទាំងលោកនាយករដ្ឋមន្ត្រី ហ៊ុន សែន ផង ស្រឡាំងកាំង ហើយក្រោយមកបុរសគប់ស្បែកជើងរូបនោះត្រូវបានសមត្ថកិច្ចអាមេរិកបង្គាប់ឱ្យចាកចេញពីកន្លែងកើតហេតុភ្លាមៗ។
តាមរយៈវីដេអូឃ្លីបមួយផ្សេងទៀត បុរសអាមេរិកាំងដែលអះអាងថាបានគប់ស្បែកជើងទៅលើលោកនាយករដ្ឋមន្ត្រី ហ៊ុន សែន បានទទួលស្គាល់ថា ខ្លួនពិតជាមានបំណងគប់ស្បែកជើងទៅលើលោកនាយករដ្ឋមន្ត្រី ហ៊ុន សែន ពិតប្រាកដមែន។ បុរសរូបនោះបានអះអាងថា ខ្លួនមានឈ្មោះ អ៊ុក ទូច ជាអតីតទាហានសម័យសាធារណរដ្ឋខ្មែររបស់លោក លន់ នល់ ដែលបច្ចុប្បន្នកំពុងរស់នៅរដ្ឋកាលីហ្វ័រញ៉ា សហរដ្ឋអាមេរិក។
ពលរដ្ឋខ្មែរអាមេរិកាំងរូបនេះបញ្ជាក់ថា មូលហេតុដែលលោកគប់ស្បែកជើងនេះ ដោយសារលោកខឹងសម្បាអាជ្ញាធររដ្ឋាភិបាលលោក ហ៊ុន សែន ដែលបានសម្លាប់គ្រួសារគាត់និងពលរដ្ឋខ្មែរជាច្រើននាក់ អំឡុងពេលដែលលោកដឹកនាំប្រទេស។
លោកថា៖ «បានជាខ្ញុំយកស្បែកជើងគប់ក្បាល[លោក] ហ៊ុន សែន ព្រោះ ហ៊ុន សែន ជា Dictator [មេដឹកនាំផ្ដាច់ការ] They Kill My Families in Cambodia [ពួកគេបានសម្លាប់គ្រួសាររបស់ខ្ញុំនៅកម្ពុជា] ហើយ ហ៊ុន សែន ហ្នឹង ខ្ញុំគ្រាន់តែយកស្បែកជើងគប់ក្បាលគាត់ទេ ប៉ុន្តែគាត់យក Grenade [គ្រាប់បែកដៃ] យកគ្រាប់បែកគប់បាតុករងាប់មិនចេះតិចនៅស្រុកខ្មែរ។ តើខ្ញុំមានកំហុសដែរឬអត់បើធ្វើអ៊ីចឹង?»
ទោះជាយ៉ាងនេះក្ដី ប្រមុខរដ្ឋាភិបាលកម្ពុជា លោក ហ៊ុន សែន មិនបានបង្ហាញការខឹងសម្បាទៅកាន់បុរសរូបនេះឡើយ ហើយផ្ទុយទៅវិញ លោកបានអំពាវនាវឱ្យអ្នកគាំទ្ររបស់លោកនៅសហរដ្ឋអាមេរិក អត់ធ្មត់ និងមិនតបតចំពោះជនដែលបង្កហេតុ និងអ្នកដែលប្រឆាំងលោកដោយហិង្សា ដែលនាំឱ្យខុសនឹងច្បាប់សហរដ្ឋអាមេរិកនោះទេ។
លោកថា៖ «ខ្ញុំសូមផ្ដាំផ្ញើជូនបងប្អូនទាំងអស់ឱ្យមានការអត់ធ្មត់ចំពោះមុខ ការញុះញង់ ការបង្កហេតុពីជនដែលមិនចូលចិត្តរូបខ្ញុំ ប៉ុន្តែបានមកបំផ្លាញទឹកចិត្តបងប្អូននៅទីនេះ។ បើទោះបីជាគេញុះញង់ក៏ដោយ យើងពុំគួរមានសកម្មភាពតបតណាមួយចំពោះពួកគេទេ។ យើងត្រូវប្រកាន់យកឥរិយាបថថ្លៃថ្នូរ ក្នុងឋានៈជាអ្នកគាំទ្រព្រះរាជាណាចក្រកម្ពុជា គាំទ្ររាជរដ្ឋាភិបាលកម្ពុជា ឬរហូតគាំទ្រគណបក្សប្រជាជនកម្ពុជា»។
ប្រព័ន្ធផ្សព្វផ្សាយគាំទ្ររដ្ឋាភិបាលបានផ្សព្វផ្សាយជាបន្តបន្ទាប់ពីការទទួលស្វាគមន៍របស់ពលរដ្ឋខ្មែរអាមេរិកាំង ចំពោះវត្តមានរបស់លោកនាយករដ្ឋមន្ត្រី ហ៊ុន សែន ដែលអញ្ជើញទៅចូលរួមកិច្ចប្រជុំកំពូលពិសេសអាស៊ាន-អាមេរិក នៅថ្ងៃទី១២-១៣ ខែឧសភានេះ។ ក៏ប៉ុន្តែទន្ទឹមនឹងនេះ ក៏មានពលរដ្ឋខ្មែរអាមេរិកាំងមួយក្រុមទៀតបានធ្វើបាតុកម្មប្រឆាំងនឹងលោកនាយករដ្ឋមន្ត្រី ហ៊ុន សែន ផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ទទួលស្គាល់ថា នេះគឺជាសេរីភាពនៃការបញ្ចេញមតិសម្រាប់ប្រទេសប្រកាន់លទ្ធិប្រជាធិបតេយ្យ តែលោកនៅតែទទូចឱ្យអាជ្ញាធរអាមេរិកចាត់វិធានការច្បាប់លើជនបង្កហេតុ ហើយនាំយកមកទទួលខុសត្រូវចំពោះមុខច្បាប់របស់អាមេរិក។
លោកថា៖ «ទេ! នៅទីណាក៏ដោយឱ្យតែធ្វើផ្ដេសផ្ដាស ដែលបង្ក អុកឡុក ឬមួយនាំឱ្យមានអំពើអនាធិបតេយ្យនៅក្នុងអង្គប្រជុំ អាហ្នឹងគឺថាត្រូវទទួលខុសត្រូវចំពោះមុខច្បាប់ហើយ មិនថានៅស្រុកខ្មែរ មិនថានៅអាមេរិក នៅបារាំងទេ សមត្ថកិច្ចគេមិនបណ្ដែតបណ្ដោយឱ្យជនចំនួនភាគតិចលើលោកហ្នឹង គឺធ្វើអ្វីផ្ដេសផ្ដាសបង្កបរិយាកាសមិនល្អទេ»។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា បានលើកឡើងពីបរិបទនៅប្រទេសបស្ចិមលោកថា សកម្មភាពបែបនេះគឺជាការបង្ហាញឥរិយាបថមួយដែលពលរដ្ឋរបស់ពួកគេមិនពេញចិត្តចំពោះថ្នាក់ដឹកនាំប្រទេសណាមួយ។ ជាឧទាហរណ៍ ករណីគប់ស្បែកជើងទៅលើអតីតប្រធានាធិបតីអាមេរិក លោក ចក ដាប់ប៊ែលយូ ប៊ូស នៅក្នុងប្រទេសអ៊ីរ៉ាក់, ករណីយុវជនម្នាក់ទះកំផ្លៀងលោក អេម៉ានូអ៊ែល ម៉ាក្រុង ប្រធានាធិបតីបារាំង និងករណីបាញ់ថ្នាំក្រហមទៅលើមុខរបស់ឯកអគ្គរដ្ឋទូតរុស្ស៊ីប្រចាំនៅប្រទេសប៉ូឡូញ កាលពីពេលថ្មីៗនេះ ជាដើម។
លោកថា៖ «ជាឥរិយាបថមួយនៅលោកខាងលិច ការគប់ស្បែកជើង ការគប់ពងមាន់ គប់ប៉េងប៉ោះ វាជាឥរិយាបថមួយនៃការមិនពេញចិត្ត យើងអាចថាជាការប្រមាថក៏ថាបានដែរ រហូតដល់ការគប់ស្បែកជើងនេះទៅថ្នាក់ដឹកនាំកម្ពុជាកន្លងមក ដែលមិនធ្លាប់មាននៅក្នុងប្រវត្តិដឹកនាំរបស់នាយករដ្ឋមន្ត្រីកម្ពុជា វាអត់ដែលមានទេ។ អ៊ីចឹង នៅក្នុងបរិបទនៃការបញ្ចេញមតិ សម្ដែងមតិ បើមានទោស ក៏អត់មានទោសអីធំដុំទេ បើយើងនិយាយឱ្យមែនទែន។ ក៏ប៉ុន្តែនៅក្នុងបរិបទកម្ពុជា ជារឿងមួយផ្សេងទៀត យើងមិនថាទេ! តែនេះវាកើតនៅលើទឹកដីអាមេរិក»។
លោកនាយករដ្ឋមន្ត្រី ហ៊ុន សែន កំពុងស្ថិតនៅសហរដ្ឋអាមេរិក ដើម្បីចូលរួមកិច្ចប្រជុំកំពូលពិសេសអាស៊ាន-អាមេរិក តបតាមការអញ្ជើញរបស់ប្រធានាធិបតីអាមេរិក លោក ចូ បៃឌិន។ កិច្ចប្រជុំនេះធ្វើឡើងចាប់ពីថ្ងៃទី១២-១៣ ខែឧសភា ដោយពិភាក្សាទៅលើប្រធានបទសំខាន់ៗ រួមមាន ការឆ្លើយតបនឹងជំងឺកូវីដ-១៩ បញ្ហាសន្តិសុខសុខភាពសកល បម្រែបម្រួលអាកាសធាតុ និងការតភ្ជាប់ទំនាក់ទំនងសេដ្ឋកិច្ចរវាងគ្នា។ ជាមួយគ្នានេះ ភាគីទាំងសងខាងក៏នឹងជជែកគ្នាលើបញ្ហាតំបន់និងអន្តរជាតិដែលជាប្រយោជន៍និងកង្វល់រួមផងដែរ៕