មេដឹកនាំនៃប្រទេសមហាអំណាចសេដ្ឋកិច្ចចំនួន២ ក្នុងពិភពលោក បានអបអរសាទរដល់ប្រធានាធិបតីជាប់ឆ្នោតថ្មីរបស់ហ្វីលីពីន លោក ហ្វឺឌីណាន់ ម៉ាកូស ជេអ (Ferdinand Marcos Jr) បន្ទាប់ពីកូនប្រុសអតីតមេដឹកនាំផ្ដាច់ការហ្វីលីពីនរូបនេះបានប្រកាសពីជ័យជម្នះរបស់ខ្លួន និងបានសន្យាថានឹងក្លាយជាមេដឹកនាំមួយរូបសម្រាប់ប្រជាជនហ្វីលីពីនទាំងអស់។ នេះបើតាមការចុះផ្សាយដោយសារព័ត៌មាន Al Jazeera។
សេតវិមានបានឱ្យដឹងនៅក្នុងសេចក្ដីថ្លែងការណ៍មួយនៅថ្ងៃព្រហស្បតិ៍ម្សិលមិញថា ការថ្លែងអបអរសាទររបស់អាមេរិកនេះត្រូវបានធ្វើឡើងដោយលោកប្រធានាធិបតី ចូ បៃឌិន តាមរយៈទូរសព្ទ ដោយលោកក៏បានបញ្ជាក់ពីជំហរក្នុងការបន្តធ្វើការជាមួយប្រធានាធិបតីជាប់ឆ្នោតថ្មីរូបនេះផងដែរ ដើម្បីបន្តពង្រឹងទំនាក់ទំនងជាមួយហ្វីលីពីន។
លោក ចូ បៃឌិន បន្តថា រូបលោកមានបំណងក្នុងការពង្រីកកិច្ចសហប្រតិបត្តិការទ្វេភាគីលើបញ្ហាជាច្រើនដែលទាក់ទងនឹងជំងឺកូវីដ-១៩ វិបត្តិអាកាសធាតុ កំណើនសេដ្ឋកិច្ច និងការគោរពសិទ្ធិមនុស្ស ជាដើម។
យោងតាមទូរទស្សន៍រដ្ឋចិនបានឱ្យដឹងថា ប្រធានាធិបតីចិន លោក ស៊ី ជីនពីង កាលពីថ្ងៃពុធកន្លងទៅ ក៏បានទាក់ទងដោយផ្ទាល់ទៅកាន់លោក ហ្វឺឌីណាន់ ម៉ាកូស ជេអ ផងដែរ ខណៈមេដឹកនាំរូបនេះបានបញ្ជាក់ថា ប្រទេសទាំង២ គឺជាដៃគូដ៏ល្អ មិនថាស្ថិតនៅក្នុងកាលៈទេសៈណាក៏ដោយ។
លោកបន្តថា៖ «ខ្ញុំឱ្យតម្លៃខ្ពស់ចំពោះការអភិវឌ្ឍទំនាក់ទំនងចិន-ហ្វីលីពីន ហើយមានឆន្ទៈក្នុងការបន្តបង្កើតទំនាក់ទំនងការងារដ៏ល្អជាមួយប្រធានាធិបតីជាប់ឆ្នោតថ្មី លោក ហ្វឺឌីណាន់ ម៉ាកូស ជេអ ដោយប្រកាន់ខ្ជាប់នូវភាពជាអ្នកជិតខាងនិងមិត្តភាពល្អ»។
យោងតាមលទ្ធផលបោះឆ្នោត លោក ហ្វឺឌីណាន់ ម៉ាកូស ជេអ ទទួលបានសំឡេងគាំទ្រជាង ៣០លានសំឡេង ដែលចំនួននេះច្រើនជាងគូប្រជែងរបស់លោក គឺលោកស្រីអនុប្រធានាធិបតី ឡេនី រ៉ូប្រេដូ (Leni Robredo) ដល់ទៅ២ដង ខណៈលទ្ធផលបោះឆ្នោតផ្លូវការត្រូវបានពឹងថានឹងត្រូវចេញផ្សាយនៅចុងខែឧសភាខាងមុខនេះ៕