ករណីគប់ស្បែកជើងទៅលើលោកនាយករដ្ឋមន្ត្រី ហ៊ុន សែន លើទឹកដីអាមេរិក ជំរុញឱ្យមានការថ្កោលទោសពីឥស្សរជននយោបាយបក្សកាន់អំណាច ប៉ុន្តែមតិផ្សេងទៀតយល់ថាជារឿងធម្មតាដែលបានកើតឡើងញឹកញាប់ក្នុងប្រទេសដែលប្រកាន់លទ្ធិប្រជាធិបតេយ្យ។
កាលពីថ្ងៃទី១២ ខែឧសភា ឆ្នាំ២០២២ ពលរដ្ឋខ្មែរអាមេរិកាំង លោក អ៊ុក ទូច បានយកស្បែកជើងរបស់គាត់គប់សំដៅទៅលើលោកនាយករដ្ឋមន្ត្រី ហ៊ុន សែន នៅក្នុងចំណោមក្រុមអ្នកគាំទ្ររបស់លោករាប់សិបនាក់ នៅឯរដ្ឋធានីវ៉ាស៊ីនតោន សហរដ្ឋអាមេរិក ខណៈមេដឹកនាំកម្ពុជារូបនេះទៅចូលរួមកិច្ចប្រជុំកំពូលអាស៊ាន-អាមេរិក។
ព្រឹត្តិការណ៍ដ៏កម្រដែលបានកើតឡើងលើមេដឹកនាំកម្ពុជានេះ ជំរុញឱ្យមានប្រតិកម្មថ្កោលទោសពីមន្ត្រីជាន់ខ្ពស់របស់គណបក្សកាន់អំណាចមួយចំនួនថាជាទង្វើមិនអាចលើកលែងទោសបាន។
ប្រធានគណៈកម្មាធិការទី៧ នៃរដ្ឋសភា និងត្រូវជាកូនប្រុសបង្កើតរបស់នាយករដ្ឋមន្ត្រី គឺលោក ហ៊ុន ម៉ានី បានបង្ហោះសារលើហ្វេសប៊ុករបស់លោក ដោយចាត់ទុកទង្វើរបស់លោក អ៊ុក ទូច នោះថា ជាការប្រមាថមកលើថ្នាក់ដឹកនាំប្រទេស ដែលមិនអាចសម្រាលទោសបាន។
លោកថា៖ «ទង្វើនេះ ពួកយើងទាំងអស់គ្នាជាសមាជិកគណបក្ស និងជាប្រជាជនខ្មែរ ដែលគាំទ្រគណបក្សប្រជាជនកម្ពុជា មិនអាចបន្ធូរបន្ថយ ឬសម្រាលទោសកំហុសដល់ពួកជ្រុលនិយមទាំងអស់នោះបានទេ»។
ប្រតិកម្មប្រហាក់ប្រហែលនេះដែរ ចំពោះរដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លោកស្រី ម៉ែន សំអន បានថ្កោលទោសបុរសនោះថា ជាក្រុមជ្រុលនិយម និងមិនអាចសម្រាលទោសបាន។
លោកស្រីថា៖ «នាងខ្ញុំមិនគាំទ្រនូវទង្វើរបស់បុគ្គល អ៊ុក ទូច សូមថ្កោលទោសយ៉ាងដាច់អហង្ការនូវទង្វើដ៏ថោកទាប ដែលប្រមាថមកលើសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រធានគណបក្សប្រជាជនកម្ពុជា […] ទង្វើដ៏ថោកទាបនេះ ប្រជាពលរដ្ឋខ្មែរមិនអាចទទួលយកបាន និងមិនអាចលើកលែងឬសម្រាលទោសកំហុសដល់ពួកជ្រុលនិយមទាំងអស់នោះបានទេ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកករណីនេះថា ជាការប្រមាថថ្នាក់ដឹកនាំដែរ ប៉ុន្តែថា គណបក្សប្រជាជនកម្ពុជានឹងមិនប្តឹងទាមទារណាមួយឱ្យចាត់វិធានការលើបុរសនោះទេ ដោយសម្អាងថា មេដឹកនាំប្រជាធិបតេយ្យមួយចំនួនក៏ធ្លាប់ជួបបញ្ហានេះគ្នា។
លោកថា៖ «រឿងនេះ វាមិនមែន [កើតឡើង] សម្រាប់តែប្រមុខដឹកនាំកម្ពុជាយើងទេ គឺនៅបណ្តាប្រទេសជឿនលឿន ដូចបារាំង អាល្លឺម៉ង់អី ក៏មានគេគប់ពងទាស្អុយដែរ មានអត់ឯណា! អ្នកដែលគេប្រឆាំងហ្នឹង គេចេះតែរកវិធី តែយើងជាអ្នកខ្ពង់ខ្ពស់ យើងជាអ្នកមានសីលធម៌ យើងជាអ្នកមានអរិយធម៌ល្អ យើងទៅតបតស្អីជាមួយមនុស្សតិរច្ឆាននោះ»។
យ៉ាងណា ខ្មែរអាមេរិកកាំង លោក អ៊ុក ទូច ដែលបានគប់ស្បែកជើងទៅលើលោកនាយករដ្ឋមន្ត្រី ហ៊ុន សែន បានសម្អាងថា ទង្វើដែលខ្លួនធ្វើនោះមិនខុសទេ បើធៀបទៅនឹងកំហុសមេដឹកនាំកម្ពុជាដែលបានកាន់អំណាចច្រើនឆ្នាំមកនេះ។
លោកថា៖ «ខ្ញុំគ្រាន់តែយកស្បែកជើងគប់ក្បាលគាត់ទេ តែគាត់បានយកគ្រាប់បែកគប់បាតុករងាប់មិនចេះតិចនៅស្រុកខ្មែរ។ អាហ្នឹងខ្ញុំមានកំហុសដែរអត់? ព្រោះ ហ៊ុន សែន សម្លាប់មនុស្សច្រើនណាស់ សម្លាប់ប្រជាធិបតេយ្យ ខ្ញុំទប់អត់បានទេ»។
អតីតតំណាងរាស្ត្រគណបក្សប្រឆាំង បច្ចុប្បន្នជាអនុប្រធានបណ្តោះអាសន្នគណបក្សកែទម្រង់កម្ពុជា លោក អ៊ូ ច័ន្ទរ័ត្ន ចាត់ទុកព្រឹត្តិការណ៍នេះថា ជារឿងធម្មតាដែលបានកើតឡើងលើទឹកដីប្រទេសលោកសេរី។ លោកកត់សម្គាល់ថា លើទឹកដីអាមេរិកកន្លងទៅ ក៏មានអ្នកសារព័ត៌មានគប់ពងមាន់ដាក់មុខប្រធានាធិបតីដែរ តែពួកគេមិនដាក់ទោសទណ្ឌទេ លើកលែងតែទង្វើនោះបង្ករបួសស្នាមឬការប្រើប្រាស់អាវុធ ទើបត្រូវផ្តន្ទាទោស។
លោក អ៊ូ ច័ន្ទរ័ត្ន គិតថា ដើម្បីកុំឱ្យបញ្ហានេះកើតឡើងតទៅទៀត មេដឹកនាំបក្សកាន់អំណាចគួរមានភាពចាស់ទុំ ហើយឱ្យតម្លៃទៅលើមតិភាគតិច។
លោកថា៖ «កាលណាគេមិនសប្បាយចិត្ត គេមានសិទ្ធិជំទាស់អ៊ីចឹងណា៎! គេមានសិទ្ធិបញ្ចេញមតិ ត្រូវតែគោរពសិទ្ធិរបស់គេ បើទោះបីយើងយកមកអនុវត្តកើតមិនកើត យើងត្រូវតែគោរពសិទ្ធិរបស់គេ»។
ប្រធានសមាគមការពារសិទ្ធិមនុស្សអាដហុក លោក នី សុខា យល់ថា មេដឹកនាំនៅប្រទេសប្រជាធិបតេយ្យបានរងនូវការតបតបែបនេះញឹកញាប់ តែពួកគេមិនដាក់ទោសអ្នកដែលផ្ទុះកំហឹងទាំងនោះទេ។ ប៉ុន្តែលោកថា អ្នកប្រើជម្រើសនេះអាចនឹងរងគ្រោះចំពោះប្រទេសដែលមិនឱ្យតម្លៃក្រុមសំឡេងភាគតិច។
លោកផ្តល់ជាយោបល់ថា ដើម្បីបញ្ជ្រាបបញ្ហានេះ អ្នកនយោបាយកម្ពុជាត្រូវបើកលំហសេរីភាពបញ្ចេញមតិ និងទទួលយកការទាមទាររបស់ក្រុមសំឡេងភាគតិចមកដោះស្រាយ និងឆ្លើយតបដោយវិជ្ជមាន ជាជាងប្រើអំណាចទៅបិទមាត់សំឡេងភាគតិច ដែលការណ៍នេះ លោកថាមិនអាចទប់កំហឹងសាធារណជនបានរហូតនោះទេ។
លោកថា៖ «ដូច្នេះ មេដឹកនាំក្នុងសង្គមប្រជាធិបតេយ្យហ្នឹងត្រូវតែទទួលយកនូវមតិប្រឆាំងទាំងអស់ហ្នឹង ដើម្បីធ្វើការពិចារណានិងដោះស្រាយ បញ្ហាដែលមតិប្រឆាំងបានលើកឡើង អាហ្នឹងដើម្បីដោះស្រាយបញ្ហា កុំឱ្យមានការខឹងសម្បាពីប្រជាពលរដ្ឋច្រើន»។
អំឡុងឆ្នាំ២០១៧ ប្រជាពលរដ្ឋម្នាក់រស់នៅខេត្តកំពង់ស្ពឺ អ្នកស្រី សំ សុខា ត្រូវបានតុលាការខេត្តនេះផ្តន្ទាទោសដាក់ពន្ធនាគារចំនួន៤ឆ្នាំ ចោទពីបទ «ប្រមាថ» និង «ញុះញង់ឱ្យមានការរើសអើង»។
ការផ្តន្ទាទោសស្ត្រីរូបនេះបានធ្វើឡើងក្រោយពីគាត់បានបង្ហោះរូបភាពលើបណ្តាញសង្គមពីសកម្មភាពយកស្បែកជើងគប់ទៅលើស្លាកសញ្ញាគណបក្សប្រជាជនកម្ពុជា ដែលមានរូបលោកនាយករដ្ឋមន្ត្រី ហ៊ុន សែន អនុប្រធានបក្ស និងលោក ហេង សំរិន ប្រធានកត្តិយសបក្ស និងជាប្រធានរដ្ឋសភា ខណៈស្ត្រីរូបនេះបានភៀសខ្លួនទៅរស់នៅប្រទេសថៃ។
ប៉ុន្តែក្រោយមក អាជ្ញាធរកម្ពុជាបានសហការជាមួយអាជ្ញាធរថៃ នាំខ្លួនស្ត្រីរូបនោះមកផ្តន្ទាទោសនៅប្រទេសកម្ពុជាវិញ តែបច្ចុប្បន្ន អ្នកស្រី សំ សុខា មានសេរីភាពវិញហើយ ក្រោយពីទទួលទោសចប់ ហើយព្រមបង់ប្រាក់ពិន័យចំនួន១០លានរៀលតាមការបង្គាប់របស់តុលាការ៕
