លោកនាយករដ្ឋមន្ត្រី ហ៊ុន សែន បានចាត់ទុកជាជោគជ័យរបស់កម្ពុជា ក្រោយរកមិនឃើញអ្នកឆ្លងជំងឺកូវីដ-១៩ រយៈពេល៧ថ្ងៃជាប់ៗគ្នា គិតចាប់តាំងពីថ្ងៃទី៧ ខែឧសភាមក។
តាមរយៈសារសំឡេងប្រមាណ៥នាទីពីសហរដ្ឋអាមេរិក លោកនាយកដ្ឋមន្ត្រី ហ៊ុន សែន បានប្រកាសថា ការដែលកម្ពុជាមិនមានអ្នកឆ្លងជំងឺកូវីដ-១៩ មួយសប្ដាហ៍មកនេះ វាជាជោគជ័យរបស់កម្ពុជា ដោយមានការចូលរួមពីប្រជាពលរដ្ឋ ក្នុងការទប់ស្កាត់ការឆ្លងរីករាលជំងឺកូវីដ-១៩ នាពេលកន្លងមក។
ទន្ទឹមនេះ លោកអំពាវនាវឱ្យប្រជាពលរដ្ឋបន្តយកចិត្តទុកដាក់ ក្នុងការប្រយុទ្ធប្រឆាំង និងទប់ស្កាត់ការឆ្លងរីករាលដាលជំងឺកូវីដ-១៩ ទោះបីជារយៈពេលមួយសប្ដាហ៍នេះ មិនមានករណីឆ្លងថ្មីក៏ដោយ។
លោកថា៖ «ខ្ញុំនៅតែអំពាវនាវដល់ប្រជាពលរដ្ឋយើង បើទោះបីពេលនេះ មិនមានការឆ្លងក៏ដោយចុះ ក៏ប៉ុន្តែយើងក៏ត្រូវប្រកាន់នូវវិធានការប្រុងប្រយ័ត្នខ្ពស់ ជាមួយនឹងវិធានការសុខាភិបាលទាំងឡាយដែលបានដាក់ចេញកន្លងទៅ។ ទោះបីកាតព្វកិច្ចពាក់ម៉ាស់មិនត្រូវបានធ្វើតទៅទៀត ក៏ប៉ុន្តែរាជរដ្ឋាភិបាលក៏នៅតែបន្តលើកទឹកចិត្តសម្រាប់ប្រជាជនសម្រេចចិត្តដោយខ្លួនឯង ពាក់ម៉ាស់ឬមិនពាក់ម៉ាស់។ ខ្ញុំសូមអំពាវនាវឱ្យប្រជាពលរដ្ឋរបស់យើងចូលរួមជាមួយនឹងការទទួលវ៉ាក់សាំងដូសជំរុញឱ្យបានឆាប់តាមដែលអាចធ្វើទៅបាន»។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១៤ ខែឧសភានេះ បានប្រកាសថា កម្ពុជាមិនមានអ្នកឆ្លងជំងឺកូវីដ-១៩ថ្មីនោះទេ ខណៈអ្នកជាសះស្បើយថ្មីមានចំនួន ៣នាក់បន្ថែមទៀត។ រីឯករណីអ្នកស្លាប់ដោយសារជំងឺនេះវិញ ក៏មិនមានដែរ។
បើតាមក្រសួងសុខាភិបាល គិតត្រឹមព្រឹកថ្ងៃសៅរ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៦ ២៦២នាក់ ក្នុងនោះ អ្នកជំងឺព្យាបាលជាសះស្បើយចំនួន១៣៣ ១៨៩នាក់ និងអ្នកស្លាប់មានចំនួន៣ ០៥៦នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថាមានចំនួន១៤ ៤៥៩នាក់។
កាលពីថ្ងៃទី៧ ខែឧសភា លោកនាយករដ្ឋមន្ត្រី ហ៊ុន សែន បានចាត់ទុកថ្ងៃនោះថា គឺជាកំណត់ត្រាលើកដំបូងនៅក្នុងរយៈពេលជាងមួយឆ្នាំ ដែលកម្ពុជារកមិនឃើញអ្នកឆ្លងជំងឺកូវីដ-១៩។ លោកបានចាត់ទុកថា នេះគឺជាជោគជ័យមួយរបស់រដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩៕
