ក្រសួងសុខាភិបាលបានប្រកាសថា កម្ពុជាមិនមានករណីអ្នកឆ្លងជំងឺកូវីដ-១៩ ថ្មីនោះឡើយកាលពីម្សិលមិញ ដែលធ្វើឱ្យកម្ពុជាមិនមានអ្នកឆ្លងជំងឺនេះរយៈពេល ៨ថ្ងៃជាប់ៗគ្នាផងដែរ។
ក្រសួងសុខាភិបាល នៅថ្ងៃទី១៥ ខែឧសភា ឆ្នាំ២០២២នេះ បានចេញសេចក្តីប្រកាសព័ត៌មាន បញ្ជាក់ថា មិនមានអ្នកឆ្លងកូវីដ-១៩ នោះទេ រយៈពេល ៨ថ្ងៃជាប់ៗគ្នា និងមិនមានអ្នកឆ្លងថ្មីនោះដែរ ខណៈអ្នកជំងឺជាសះស្បើយមានចំនួន ២នាក់កាលពីម្សិលមិញ។
តាមរយៈសារសំឡេងប្រមាណ ៥នាទីពីសហរដ្ឋអាមេរិកដែលចែកចាយលើបណ្តាញសង្គមកាលពីម្សិលមិញលោកនាយកដ្ឋមន្ត្រី ហ៊ុន សែន បានប្រកាសថា ការដែលកម្ពុជាមិនមានអ្នកឆ្លងជំងឺកូវីដ-១៩ មួយសប្ដាហ៍មកនេះ វាជាជោគជ័យរបស់កម្ពុជា ដោយមានការចូលរួមពីប្រជាពលរដ្ឋ ក្នុងការទប់ស្កាត់ការឆ្លងរីករាលជំងឺកូវីដ-១៩ នាពេលកន្លងមក។
យ៉ាងណា លោកស្នើឱ្យប្រជាពលរដ្ឋបន្តយកចិត្តទុកដាក់បន្ថែមទៀត ក្នុងការប្រយុទ្ធប្រឆាំង និងទប់ស្កាត់ការឆ្លងរីករាលដាលជំងឺកូវីដ-១៩។
លោកថា៖ «ខ្ញុំនៅតែអំពាវនាវដល់ប្រជាពលរដ្ឋយើង បើទោះបីពេលនេះ មិនមានការឆ្លងក៏ដោយចុះ ក៏ប៉ុន្តែយើងក៏ត្រូវប្រកាន់នូវវិធានការប្រុងប្រយ័ត្នខ្ពស់ ជាមួយនឹងវិធានការសុខាភិបាលទាំងឡាយដែលបានដាក់ចេញកន្លងទៅ។ ទោះបីកាតព្វកិច្ចពាក់ម៉ាស់មិនត្រូវបានធ្វើតទៅទៀត ក៏ប៉ុន្តែរាជរដ្ឋាភិបាលក៏នៅតែបន្តលើកទឹកចិត្តសម្រាប់ប្រជាជនសម្រេចចិត្តដោយខ្លួនឯង ពាក់ម៉ាស់ឬមិនពាក់ម៉ាស់។ ខ្ញុំសូមអំពាវនាវឱ្យប្រជាពលរដ្ឋរបស់យើងចូលរួមជាមួយនឹងការទទួលវ៉ាក់សាំងដូសជំរុញឱ្យបានឆាប់តាមដែលអាចធ្វើទៅបាន»។
គិតត្រឹមព្រឹកថ្ងៃទី១៥ ខែឧសភា ឆ្នាំ២០២២ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន១៣៦ ២៦២នាក់ អ្នកជាសះស្បើយសរុបចំនួន ១៣៣ ១៩៤នាក់ ស្លាប់សរុបចំនួន ៣ ០៥៦នាក់៕
