សមត្ថកិច្ចនៅខេត្តស្វាយរៀង ឱ្យដឹងថា បុរសជាជនជាតិវៀតណាមម្នាក់បានស្លាប់បាត់បង់ជីវិតភ្លាមៗ បន្ទាប់ពីធ្លាក់ពីលើជាន់ទី៨ នៃកាស៊ីណូមួយកន្លែងក្នុងក្រុងបាវិត ខណៈកាស៊ីណូនោះត្រូវបានគេស្គាល់ថាជាកម្មសិទ្ធិរបស់សមាជិកព្រឹទ្ធសភាមកពីគណបក្សប្រជាជនកម្ពុជា លោក កុក អាន។
នាយប៉ុស្តិ៍នគរបាលសង្កាត់បាវិត លោក ម៉ៅ ភិនភិរម្យ បានឱ្យដឹងថា ករណីស្លាប់របស់ជនជាតិវៀតណាមនោះបានកើតឡើងកាលពីថ្ងៃពុធ [សប្ដាហ៍មុន] នៅកាស៊ីណូក្រោន (Crown) ជាប់ព្រំដែនវៀតណាម។
លោកបន្តថា៖ «អ្នកដែលស្លាប់បាត់បង់ជីវិតនោះ គឺជាបុរសជនជាតិវៀតណាមដែលបានធ្លាក់ពីលើជាន់ទី៨។ យើងបានប្រគល់សពឱ្យទៅស្ថានទូតវៀតណាមក្នុងទីក្រុងភ្នំពេញរួចរាល់ហើយ ដើម្បីចាត់ចែងបន្ត»។
ទាក់ទិននឹងសំណួរថាតើមានករណីស្លាប់ផ្សេងទៀតកើតឡើងនៅកាស៊ីណូក្រោននេះឬយ៉ាងណា លោក ម៉ៅ ភិនភិរម្យ បានបដិសេធធ្វើអត្ថាធិប្បាយ។
លោកថា៖ «ប្អូនប្រុស! បានហើយ! ព័ត៌មានប៉ុណ្ណឹងគ្រប់គ្រាន់ហើយ។ ឥលូវនេះ ខ្ញុំជាប់រវល់»។
យោងតាមគេហទំព័ររបស់ក្រុមហ៊ុន ក្រោន រីសត (Crown Resorts) កាស៊ីណូនៅក្រុងបាវិតនេះ គឺជាបុត្រសម្ព័ន្ធរួមគ្នាជាមួយនឹងកាស៊ីណូក្រោននៅប៉ោយប៉ែត ជាប់ព្រំដែនថៃផងដែរ ដែលត្រូវបានគេស្គាល់ថាជាកម្មសិទ្ធិរបស់សមាជិកព្រឹទ្ធសភាមកពីគណបក្សប្រជាជនកម្ពុជា លោក កុក អាន។
ទាក់ទិននឹងកាស៊ីណូក្រោនបាវិតនេះដែរ សារព័ត៌មានក្នុងស្រុក CEN ធ្លាប់បានរាយការណ៍ពីការចាប់ខ្លួនបុរសជនជាតិចិនម្នាក់ កាលពីខែកញ្ញា ឆ្នាំ២០១៨ បន្ទាប់ពីបុរសរូបនេះបានយកទឹកក្ដៅទៅស្រោចលើម្រាមដៃជនជាតិចិនដូចគ្នាបណ្ដាលឱ្យរងរបួសធ្ងន់។ ក្នុងខែធ្នូ ឆ្នាំ២០១៨ ទីតាំងកាស៊ីណូនេះក៏មានករណីនៃការស្លាប់ជនជាតិចិនម្នាក់ មានមុខរបរជាចុងភៅ ដោយសារដួលដាច់ផ្ងារបោកក្បាលទៅលើចានបង្គន់ក្នុងបន្ទប់ទឹកកាស៊ីណូ។
យោងតាមកាសែតកូនខ្មែរម្ចាស់ប្រទេស (KMPN Asia) ក៏ធ្លាប់បានចុះផ្សាយពីករណីចាប់ខ្លួនបុរសជនជាតិវៀតណាមម្នាក់ដែលបានចាក់សម្លាប់ស្ត្រីជនជាតិវៀតណាមដូចគ្នា នៅមុខកាស៊ីណូក្រោនផងដែរ កាលពីខែកញ្ញា ឆ្នាំ២០១៩។
ជាមួយគ្នានេះ ទីភ្នាក់ងារសារព័ត៌មាន TNB បានរាយការណ៍ពីករណីស្លាប់បុរសម្នាក់នៅក្នុងបន្ទប់មួយនៃកាស៊ីណូក្រោន ក្នុងខែកុម្ភៈ ឆ្នាំ២០២០ ដោយសារគាំងបេះដូង។ កាលពីថ្ងៃទី២៨ ខែមេសា កន្លងទៅថ្មីៗនេះ ទំព័រព័ត៌មាន Tnaot ក៏បានចេញផ្សាយករណីបុរសម្នាក់ធ្លាក់ពីលើអគារជាន់ទី៨ នៃកាស៊ីណូឃីងក្រោន ដោយមិនដឹងពីមូលហេតុជាក់លាក់ផងដែរ។
ទាក់ទិននឹងករណីនេះ មន្ត្រីផ្នែករដ្ឋបាលក្នុងតំបន់មួយរូបដែលសុំមិនបញ្ចេញឈ្មោះ បានឱ្យដឹងថា កាលពីរយៈពេលប្រមាណជា៣ទៅ៤ខែកន្លងទៅ លោកក៏ធ្លាប់បានចុះទៅយកសាកសពពីទីតាំងកាស៊ីណូក្រោន ដើម្បីរៀបចំបញ្ជូនទៅកាន់ស្ថានទូតវៀតណាម។
លោកបន្តថា៖ «រាល់ពេលដែលមានករណីមនុស្សស្លាប់ក្នុងក្រុមហ៊ុន ឬកាស៊ីណូ អាជ្ញាធរតែងតែចុះទៅពិនិត្យ ដែលក្នុងនោះ ខ្ញុំធ្លាប់បានចូលរួមជាមួយពួកគេចំនួន២លើកផងដែរ»។
ទោះជាយ៉ាងណា មន្ត្រីរូបនេះមិនអាចបញ្ជាក់បានពីចំនួនជនជាតិវៀតណាមប៉ុន្មាននាក់រស់នៅក្នុងទីតាំងកាស៊ីណូក្រោនឡើយ។
ចៅសង្កាត់បាវិត ក្រុងបាវិត លោក សាញ់ សាខុន បដិសេធអត្ថាធិប្បាយជុំវិញករណីនេះ ខណៈស្នងការនគរបាលខេត្តស្វាយរៀង លោក កឹង ឃន បានបង្វែរសំណួរទៅកាន់អធិការនគរបាលក្រុងបាវិត។
អនុប្រធានភូមិបាវិតកណ្ដាល សង្កាត់បាវិត លោក ឈុន ហឿន បានឱ្យដឹងថា រូបលោកបានចុះទៅពិនិត្យសាកសពនៅកន្លែងកើតហេតុ បន្ទាប់ពីមានករណីមនុស្សធ្លាក់ពីលើអាគារកាស៊ីណូក្រោន កាលពីថ្ងៃពុធ។
ទោះជាយ៉ាងណា បុរសម្នាក់តំណាងឱ្យកាស៊ីណូក្រោន បានថ្លែងតាមរយៈទូរសព្ទ ដោយបដិសេធថា ពុំមានករណីនេះបានកើតឡើងឡើយ។
ប្រភពដែលសុំមិនបញ្ចេញឈ្មោះរូបនេះថា៖ «មិនមានករណីបែបនេះកើតឡើងនោះទេ»។
ជាមួយគ្នានេះ លោកក៏បានបដិសេធរាល់ករណីស្លាប់បាត់បង់ជីវិតទាំងឡាយដែលបានកើតឡើងនៅក្នុងកាស៊ីណូ រួមនឹងព័ត៌មានដែលថាមានមនុស្សព្យាយាមរត់គេចចេញពីទីតាំងអាគារកាស៊ីណូនេះផងដែរ៕
ប្រែសម្រួលចេញពីអត្ថបទដើមភាសាអង់គ្លេស៖ Falling Death at Senator’s Border Casino