មេធាវីការពារក្ដីឱ្យលោក សៀម ភ្លុក ស្នើទៅសភាស៊ើបសួរសាលាឧទ្ធរណ៍រាជធានីភ្នំពេញដោះលែងកូនក្ដីឱ្យនៅក្រៅឃុំបណ្ដោះអាសន្ន ដោយថា ការមិនចូលទៅបំភ្លឺ មិនមែនមកពីកូនក្ដីរបស់លោករឹងទទឹងនោះទេ តែដោយសារមិនទទួលបានដីកាកោះពីតុលាការ។
ការស្នើនេះធ្វើឡើងអំឡុងពេលសភាស៊ើបសួរសាលាឧទ្ធរណ៍រាជធានីភ្នំពេញបើកសវនាការលើបណ្ដឹងសុំនៅក្រៅឃុំបណ្ដោះអាសន្ន ករណីលោក សៀម ភ្លុក អតីតស្ថាបនិកគណបក្សបេះដូងជាតិ នាថ្ងៃព្រឹកពុធនេះ។
លោក សៀម ភ្លុក ត្រូវបានតុលាការចោទប្រកាន់ពីបទ «ក្លែងបន្លំ និងប្រើប្រាស់លិខិតក្លែង» កាលពីថ្ងៃទី២៧ ខែមេសា ឆ្នាំ២០២២ និងត្រូវបានសមត្ថកិច្ចចាប់ខ្លួននិងបញ្ជូនទៅឃុំខ្លួននៅពន្ធនាគារព្រៃសភ្លាមៗនៅថ្ងៃដដែលនោះ ក្រោយពីលោកមិនបានចូលខ្លួនទៅបំភ្លឺតាមដីកាកោះរបស់តុលាការ។
លោក ជូង ជូងី មេធាវីការពារសិទ្ធិឱ្យជនជាប់ចោទឈ្មោះ សៀម ភ្លុក ប្រាប់វីអូឌីបន្ទាប់ពីបញ្ចប់សវនាការថា ការចាប់និងឃុំខ្លួនកូនក្ដីរបស់លោកនៅពន្ធនាគារ ជារឿងមិនសមស្រប ព្រោះការមិនចូលទៅបំភ្លឺនៅចំពោះមុខតុលាការ មិនមែនដោយសារកូនក្ដីរបស់លោករឹងទទឹងនោះទេ ប៉ុន្តែមកពីសមត្ថកិច្ចបញ្ជូនដីកាកោះហៅមិនដល់ដៃរបស់កូនក្ដី។
លោកបន្តថា លោក សៀម ភ្លុក គ្មានចេតនាទុច្ចរិតណាមួយដូចក្រសួងមហាផ្ទៃចោទប្រកាន់ឡើយ ខណៈកូនក្ដីរបស់លោកមិនមែនជាអ្នករៀបចំឯកសារ ដើម្បីស្នើសុំចុះបញ្ជីគណបក្សដោយខ្លួនឯងនោះទេ គឺតំណាងតាមខេត្តនីមួយៗជាអ្នកធ្វើ។ មួយវិញទៀត លោកថា ស្នាមមេដៃទាំងអស់នេះ មិនបានបង្កព្យនកម្ម ឬផ្ដល់ការខូចខាតដល់ក្រសួងមហាផ្ទៃទេ។
លោកថា៖ «យើងសម្អាងថា កន្លងមក យើងអត់ទទួលបានដីកាកោះពីតុលាការទេ អ៊ីចឹងការដែលតុលាការនាំខ្លួន វាអត់សមស្រប ហើយយើងមិនមែនរឹងរូសនឹងតុលាការទេ ហើយយើងមានទីលំនៅច្បាស់លាស់ ហើយតុលាការអត់ដែលបានកោះហៅយើងទេ ស្រាប់តែចេញដីកាឱ្យនាំខ្លួនយើង ហើយឃុំខ្លួនយើងតែម្ដង អ៊ីចឹងយើងទាមទារឱ្យដោះលែងយើងវិញ»។
ក្រោយពីបើកសវនាការ នាព្រឹកថ្ងៃពុធនេះ សភាស៊ើបសួរសាលាឧទ្ធរណ៍រាជធានីភ្នំពេញ លោក ឃុន លាងម៉េង សម្រេចថានឹងប្រកាសសាលដីកាបណ្ដឹងសុំនៅក្រៅឃុំនេះ នៅថ្ងៃទី២៦ ខែឧសភា ខាងមុខនេះ។
អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្វ្រែល (Comfrel) លោក កន សាវាង្ស យល់ថា ការចាប់និងឃុំខ្លួនលោក សៀម ភ្លុក ជាការធ្វើទុក្ខបុកម្នេញផ្នែកនយោបាយច្រើនជាងការអនុវត្តច្បាប់។ លោកបន្តថា តាមច្បាប់ បើសិនជាលោក សៀម ភ្លុក មិនបានបំពេញតាមលក្ខខណ្ឌបានត្រឹមត្រូវ នោះក្រសួងមហាផៃ្ទមានសិទ្ធិក្នុងការបដិសេធចុះបញ្ជីបង្កើតគណបក្ស។
លោកថា៖ «គាត់បំពេញលក្ខខណ្ឌមិនត្រឹមត្រូវ ក្រសួងមហាផ្ទៃមានតួនាទីបដិសេធ ដោយមិនចុះបញ្ជី! ហើយភាគីគណបក្សនយោបាយដែលដាក់ហ្នឹង គាត់មានសិទ្ធិក្នុងការប្ដឹងតវ៉ា គឺនៅក្នុងច្បាប់ ខ្ញុំមើលឃើញចំណុចប៉ុណ្ណឹង! មិនមានចំណុចណាដែលចែងថា ក្រសួងមហាផ្ទៃ នៅពេលដែលមិនបំពេញលក្ខខណ្ឌត្រឹមត្រូវ ឬលក្ខខណ្ឌរកឃើញថាមិនត្រឹមត្រូវ ប្ដឹងទៅតុលាការ ខ្ញុំអត់បានមើលចំណុចណាទុកអំណាចឱ្យក្រសួងមហាផ្ទៃ ឬភាគីផ្សេងទៀត ធ្វើតាមបណ្ដឹងហ្នឹងទេ។ អ៊ីចឹងបណ្ដឹង ចង់មិនចង់ វាប៉ះពាល់ដល់ការប្រើប្រាស់សិទ្ធិធ្វើនយោបាយក្នុងការចូលរួមប្រកួតប្រជែងហ្នឹង»។
តុលាការកំពូល កាលពីខែធ្នូ ឆ្នាំ២០២១ បានបើកសវនាការលើបណ្ដឹងទាស់របស់លោក សៀម ភ្លុក ប្រឆាំងទៅនឹងសេចក្ដីសម្រេចរបស់ក្រសួងមហាផ្ទៃ ដែលបដិសេធមិនចុះបញ្ជីឱ្យគណបក្សថ្មីថ្មោងមួយនេះក្លាយជាគណបក្សស្របច្បាប់។ ទន្ទឹមនឹងនេះ តុលាការកំពូលក៏បានតម្កល់សេចក្ដីសម្រេចរបស់ក្រសួងមហាផ្ទៃដែលច្រានចោលការចុះបញ្ជីនេះ ទុកជាបានការ។
យ៉ាងណាក៏ដោយ ការចេញដីកាបង្គាប់ឱ្យចាប់និងបញ្ជូនទៅឃុំខ្លួននៅពន្ធនាគាររបស់ចៅក្រមស៊ើបសួរសាលាដំបូងរាជធានីភ្នំពេញ លោក លិ សុខា កាលពីថ្ងៃទី២៧ ខែមេសា ឆ្នាំ២០២២ ក្រោមហេតុផលថា លោក សៀម ភ្លុក មិនចូលបំភ្លឺ ប៉ុន្តែលោក សៀម ភ្លុក ថាការមិនចូលបំភ្លឺ ដោយសារមិនបានទទួលដីកាពីតុលាការ៕